TOLAKII Adam bo Éva ba bi ndogbene Djob, ba lôôs ki bon bap béba ni nyemb, hala a bi héñha bé sômbôl i Yéhôva inyu bôt ba binam. Ni njel Bibel, Djob a nkwés bés nkaa le sômbôl yé i nhéñha bé.

• “Bôt ba téé sép b’a kôdôl hisi, ba yén ki mu mba ni mba.”​—Tjémbi 37:29.

• “A’ milba nyemb i mba ni mba, Nwet le Yéhôva a’ tos ki gwiiha masu map momasôna.”​—Yésaya 25:8.

• “Nyemb yon y’a mélhana kiki ñoo a nsôk.”​—1 Korintô 15:26.

• “Nyemb y’a ba ha bé, to malep, to nlondok, to njiiha ki, b’a ba ha bé.”​—Masoola 21:4.

Lelaa Nyambe “a’ milba nyemb” tole ‘mélés’ yo? Kiki di ntip añ, Bibel i nkal le: ‘Bôt ba téé sép b’a . . . niñ . . . mba ni mba.’ Ndi yo ki yon i nkal le “mut a téé sép hana ’isi a ta bé . . . nu a mboñ loñge, ndi a boñ bé béba yo ki yo.” (Ñañal 7:20) Baa hala a nkobla le Nyambe a ga nwas le yak bôt ba téé bé sép ba niñ i boga ni boga? Kekikel! A ta bé le a boñ hala, inyule “Nyambe . . . a mpot bé bitembee.” (Titô 1:2) Lelaa Nyambe a ga yônôs mbônga wé inyu bôt ba binam?

Binoñ bi yé likébla Yéhôva Nyambe a bi ti inyu kobol bôt ba binam. Binoñ bi yé kiki ndamba i kôli inyu saa yom i ñôbi. Kiki bésbobasôna di yé bikwéha, Bibel i mpot maliga ngéda i nkal le: “Mut to wada a nla yaga bé kobol manyañ, to ti Nyambe binoñ inyu yé, inyule kobla i niñ yap i nhee ngandak, i nla bé mal kekikel.”​—Tjémbi 49:8, 9.

Ngéda mut a nwo, a nsaa ndigi inyu bibéba gwé; a ta bé le a kobol nyemede ndi to saa inyu bibéba bi mut numpe. (Rôma 6:7) I bé béda le, mut nu a yé peles, ngi liton li béba, nyen a ti niñ yé inyu bibéba gwés. ​—Lôk Héber 10:1-4.

I jam li yaga jon Nyambe a bi boñ. A bi om Man wé Yésu nu a bi gwéé peles hana ’isi. (1 Pétrô 2:22) Yésu nyemede a bi kal le a nlo inyu “ti . . . nom yé binoñ inyu ngandak bôt.” (Markô 10:45) Ni njel binoñ, Yésu a bi yémbél nyemb, a néhne ki bés njel i niñ boga.​—Yôhanes 3:16.

I len ini, kiki Bibel i nkal, di niñil ‘mangéda ma yé nledek kiyaga,’ hala a ñunda le di yé toi i “dilo di nsôk” di béba nkoñ ’isi unu. (2 Timôtéô 3:1) Dilo di nsôk d’a mal ngéda “ngwa mbagi ni u tjiba i bôt ba nyan Nyambe” y’a kola. (2 Pétrô 3:3, 7) Ndi bôt ba ngwés Nyambe b’a pei i tjiba i, b’a kôs ki “niñ boga.”​—Matéô 25:46.

I mbus bitugne gwap didun di bôt di ga la kôs niñ boga. Yésu a bi tugul mut ngéda a bé i tison i Nain. Mpom man munlôm u yik muda wada u bi wo, Yésu a ‘kônôl nye ngoo,’ a tugul nye. (Lukas 7:11-15) Yak ñôma Paul a kal le: “Me gwé botñem ni Nyambe  . . . le bitugne gw’a ba inyu ba ba téé sép ni ba ba téé bé sép.” I botñem i ngui i, i ñéba le Djob a ngwés bôt ba binam.​—Minson mi baôma 24:15.

Didun di didun di bôt di gwé botñem i niñ i boga ni boga. Bibel i nkal le: “Bôt ba téé sép b’a kôdôl hisi, ba yén ki mu mba ni mba” (Tjémbi 37:29) Ha ngéda i, ba ga nôgda maséé i tehe biyônôl bi bibañga bi nhôgbaha, bi ñôma Paul a tila hala a yé 2 000 nwii len: “A nyemb, yémbél yoñ i yé hee? A nyemb, mbôñ yoñ i yé hee?” (1 Korintô 15:55, MN.) Nyemb i ga ba ha bé!