Ngéda u nyéñ yi mut, jam li bisu u ga boñ li yé i bat nye le: “Jôl jon le njee?” Ibale u mbat Djob nya mbadga i, lelaa a ga timbhe we?

“Men me yé Yéhôva. Lini jon li yé jôl jem.”​—Yésaya 42:8.

Jôl li Djob li gwé mahee inyu yé nyemede. Mut bé nyen a bi ti Djob jôl jé; a bi pohol jo inyu yé nyemede. Yéhôva a bi kal le: “Lini jon li yé jôl jem mba ni mba, ini ki yon i yé tigil me nyék letee ni mba mba.” (Manyodi 3:15) Ikété Bibel, jôl li Djob li lébna iloo mangédi kiki bo Bayemlikok, Tata, Nwet, Nyambe, yak iloo môl mape kiki bo Abraham, Môsi, David, ni Yésu. Ni ki le, sômbôl i Yéhôva i yé le jôl jé li yiba. Bibel i nkal le: “Le ndi ba yi le wetama wen u yé, nu jôl jé li yé Yéhôva, u yé Nungingi ngii ‘isi hiosôna.”​—Tjémbi 83:19.

Jôl Djob li gwé mahee inyu Yésu. Ngéda a bé niiga banigil bé i soohe, Yésu a bi kal bo le haana nyen ba nlama soohe Djob: “Jôl joñ li tééba lipubi.” (Matéô 6:9) Yésu nyemede a bi soohe Djob le: “A Ta, ti jôl joñ lipém.” (Yôhanes 12:28) Li ti jôl li Djob lipém li bé jam li bisu ikété niñ i Yésu. I njom i yon i bi tinde nye i kal ikété masoohe le: ‘Me bi yis bo jôl joñ, m’a yis ki bo jo.’​—Yôhanes 17:26.

Jôl li Djob li gwé mahee inyu bet ba nyi nye. Litén li Djob li kôba li bé yi le tohi yap ni sôñ yap bi bééna maada ni jôl li Djob. “Jôl li Yéhôva li  yé litédél li ngui; mut a téé sép a njôp mu ngwéé, a yé mbédhak ngi.” (Bingéngén 18:10) “Ndi y’a léña le, tonjee a’ lôndôl Yéhôva a’ pei.” (Yôel 2:32) Bibel i ñunda le jôl li Djob li ga tibil éba bonjee ba ngwélél nye. “Inyule matén momasôna ma nhiôm, hi jada mu inyu jôl li nyambe wé, ndi bés d’a ba di nhiôm ndik inyu jôl li Yéhôva Nyambe wés mba ni mba.”​—Mika 4:5; Minson mi baôma 15:14.

Jôl li Djob li nyelene bés njee a yé. Ngandak bayimam i nkal le jôl li Yéhôva li nkobla le: “A nyilha.” Yéhôva Nyambe a bi yelel kii jôl jé li nkobla ngéda a bi kal Môsi bibuk bini le: ‘Me ga yila jam me ga pohol i yila.’ (Manyodi 3:14) Jon jôl li Djob li nyelel ndik bé libak jé li Nhek mam momasôna. Jôl jé li nyelel ngap a gwé i yila nyemede to kii a ngwés, ni i yilha bihégel gwé to kinje yom a nsômbôl le bi yila inyu yônôs bitééne gwé. Mangédi ma nla yelel tel i Djob, kunde a gwé, tole ngui yé, ndi ndik jôl jé le Yéhôva, jon li nyelel njee Djob a yé toi ni yom a nla yila.

Jôl li Djob li nyelene bés le a ntôñ toi bés. Ngobol i jôl li Djob i ñunda gwéha a gwééne bôt ba binam ni bihégél gwé gwobisôna. Ni ki le lini jam le Djob a bi yis bés jôl jé, li ñunda le a gwé ngôñ le di yi nye. A bi yoñ makidik i kal bés jôl jé ilole di mbat nye jo. Ntiik, Nyambe a gwé ngôñ le di tehe nye ha kiki ngim djob i i yé bés haa bé, ndi kiki Mut le di nla kôôge bebee.​—Tjémbi 73:28.

I gwélél jôl li Djob i ñunda i gwéha di ngwés nye. Inyu toñol jam li, u nla bat mut nu u gwé ngôñ i ba liwanda ni nye le a sébél we ni jôl joñ. Kii u ga nôgda ibale mut nu a nai le a nsébél bé we ni jôl jon? Kiki ngéda i mba i ntagbe, u ga badba too mut nu a yéñék toi ba liwanda joñ. Nlélem jam won u yé ni Nyambe. Yéhôva a bi kal bôt ba binam jôl jé, a nti ki bés makénd i gwélél jo. Ngéda di mboñ hala, di ñunda Yéhôva le di gwé ngôñ i kôôge nye bebee. Ibabé kwo, a nyimbe i bet ba ‘nhoñol ki jôl jé’!​—Malaki 3:16.

I nigil i yi jôl li Djob, i yé jam li bisu di nlama boñ inyu yi nye. Ndi di nlama bé telep ha. Di nlama yéñ yi njee a sôli mu mbus jôl li. Di nlama nigil i yi limbe libak a gwé.