¿Khitinakas wawanakar yatichapxañapa?

“Janiw khiti yatiqiris yatichiripatxa jukʼampïkiti, yatiqañ tukuyxaspa ukkhasa yatichiripjamarakïspawa.” (LUCAS 6:40)

YAQHIP awk taykanakaxa wawanakapar Diosat yatichañatakix janis wakichtʼatäpkaspa ukhamwa amuyasipxi. Inas yatichañatakix janis yatxatatäpkaspa jan ukax Diosat janis wal yatipkaspa ukham amuyasipxchi. Ukatwa Diosat yatichapxañapatakix familiaranakaparu jan ukax religionanakan pʼiqtʼirinakapar jaytxapxi.

Ukampis ¿khitis Diosan chiqa yatichäwinakapata ukat sum sarnaqañ tuqit wawanakar yatichaspa? Uka tuqit kamsis Bibliaxa ukat yatxattʼat jaqinakax kamsapxarakisa uk uñjañäni.

Kunsa awkix lurañapa

Kunsa Bibliax yatichi: “Awkinaka, jumanakax wawanakamarux jan colerayapxamti, jan ukasti chiqapar yatichasina sum uywapxam, Tatitur iyawsapxañapataki” (Efesios 6:4).

Yatxattʼatanakax kamsapxisa: Diosar yupaychañat yatxatatäñaxa, ¿kunjamsa awkir yanaptʼi? Uka tuqitxa, mä qillqatax akham sänwa: “Religionankañaxa, wawanakap sum uywañatakiw mä chacharux yanaptʼaspa. Religión tuqiw yanapsa, jaqi masimp sum apasiñatak kamachinaksa  katuqi, ukat ukanarakwa sum jakasiñataki yatichäwinaksa katuqaraki” sasa, uka qillqatax 2009 maranwa apsusïna (Fathers’ Religious Involvement and Early Childhood Behavior).

Kunja wakiskiris awkix wawanakapar uywañapa ukat yatichañapa uk Bibliax sum qhanañchi (Proverbios 4:1; Colosenses 3:21; Hebreos 12:9). ¿Uka iwxtʼanakax jichhürunakan walikïskpachati? Kunjamsa awkinakax wawanakapar yanaptʼapxaspa uka tuqitwa Florida (Estados Unidos) markan utjki uka jachʼa yatiqañ utax mä qillqat 2009 maran apsüna. Yatxattʼatanakax akham sapxiwa: ‘Awkinakax wawanakapar yatichapxi ukhaxa, wawanakax jupanak pachpaw munasipxi ukat yaqhanakan sumankañapsa thaqhapxarakiwa. Yuqall wawanakax sumwa sarnaqapxi ukat imill wawanakax suma amuytʼasirïpxarakiwa’ sasa. Ukhamasti, Biblian iwxtʼanakapax jichhürunakan wali wakisirikïskiwa.

Kunsa taykax lurañapa

Kunsa Bibliax yatichi: “Janikiy taykaman yatichäwinakapxa jiskʼachamti” (Proverbios 1:8).

Yatxattʼatanakax kamsapxisa: Kunjamas wawanakax amuyupan jikxatasipxi uka tuqit yatxatasaxa, akham sasaw 2006 maranx mä libronx qhanañchasïna: “Awkinakat sipansa, sapa pataka horanakatxa 65 ukat 80 horanakaw taykanakax wawanakapampi chikäpxi. Ukat yaqha markanakansa ukhamarakiwa” sasa (Handbook of Child Psychology). Ukham chikäpxatapatxa, taykan arunakapasa luratanakapasa ukat amuyunakapasa, kunjamsa wawanakax jilsupxani ukatakiw yanaptʼi.

Taykanakax wawanakapar Diosat yatichapxi ukhaxa, pä tuqitwa yanaptʼasipki. Nayraqatxa, Jehová Diosamp sum apasiñapatakiw yanaptʼi, ukax jakäwipanwa yanaptʼani. Ukatxa, kunjamsa chacha warmix kuntï amtawayapki uk phuqañatak purapat yanaptʼasipxi ukwa uñjaraki (Colosenses 3:18-20). Yaqhanakas awk taykanakar wawanak uywañ yanaptʼapkchixa, awk taykaw wawanakapar Diosata ukat kunjamsa familian kusisita jakasipxaspa uk yatichapxañapa.

Ukhamasti, ¿kunjamsa yatichapxaspa? ¿Kunanakas yatichañatak yanaptʼaspa?