Kʼari yatichäwinaka

NAYRA patak maranakanxa, apóstol Pablox mä cartwa cristianonakarux qillqäna, ukanxa akham sasaw iwxtʼäna: “Wal amuyasipxam, janiraki sallqjayasipxamti khitinakatix kʼari amuytʼanakapampi sallqjañ munapxtam ukanakampixa. Jupanakasti janiw Tatitur iyawsapkiti, jan ukasti jaqinakan sarnaqäwinakaparu, amtatanakaparukiw phuqhapxi kuna tuqinsa” sasa (Colosenses 2:8).

Ukham iwxtʼatpachasa, patak phisqa tunka maranakanxa, yaqhip cristianonakax iyawsäwipat yatichañatakix nayra tiempon jakasiri, Diosar jan uñtʼir filósofo jaqinakan yatichäwinakaparjamaw yatichañ qalltawayapxäna. ¿Kunats ukham yatichapxäna? Roma imperionkir yatxattʼat jaqinakax cristianismo sat yupaychäwir jukʼamp mantapxañapataki.

Uka cristianonakat maynïrixa, Justino Mártir satänwa, Diosan sapa Yuqapax janïr aka Uraqir jaqjam jutkäna ukhaw Greciankir filosofonakar uñstäna sasaw amuyäna. Justino Mártir sat chachan amuyuparjamasa ukat yupaychäwi tuqit yatxattʼat yaqha jaqinakan amuyuparjamasa, filosofía ukat mitología sat yatichäwinakaw cristianismo sat yupaychäwirux wali askir tukuyani taqi jaqinakan askipataki sasaw amuyapxäna.

Justino Mártir chachaw cristianismo sat yupaychäwin yatichäwinakap mayjtʼayäna, ukhamat uka yupaychäwirux waljan mantxapxäna. Ukampisa, uka machaq yatichäwinakap jan chhaqhañapatakix yaqha yatichäwinak uñstayañaw wakisxäna, ukhamatwa walja kʼari yatichäwinakax uñstawayäna. Jichhürunxa, cristianüpxtwa sirinakax uka yatichäwinakwa yatichasipkaraki. ¿Kawkïrinakas uka kʼari yatichäwinakax uk yatxatañ munasmati? Uka yatichäwinakatxa, kunsa walja libronakax qhanañchtʼi ukat kunsa Bibliax chiqpachapun yatichi uk sum yatxatañamatakiw chʼamañchtʼanipxsma.

[3 janan fotonakax khitinakan apsutasa]

Diablo: Barrators—Giampolo/The Doré Illustrations For Dante’s Divine Comedy/Dover Publications Inc.; angelanaka: Art Resource, NY; Trinidad: Museo Bardini (Florencia)