Bibliat jukʼamp yatxatañataki

3. Yanaptʼayasiñasawa

Edward John Eyre chachax jan uñtʼat lugaranak saririxa (explorador), Australia markan llanura de Nullarbor sat chiq paskasax uka chiqan jakasiri jaqinakampiw yanaptʼayasïna. Jupanakampixa, eucalipto quqanakata ukat qalar uñtat chʼallax wayramp apat montontʼaski uka thiyat allsusaw um apsuñ yatiqäna, ukham yanaptʼayasitapatxa qhipat janiw umatjamax jiwkänti.

AKA sarnaqäwitxa, ¿kuns yatiqsna? Kuna lurañanakatï chʼamäni ukhaxa mä yatxatatan yanaptʼapampiw sum lursnaxa ukwa yatiqawaytanxa. Jïsa, Biblia liyiñax niya ukhamarakiwa, sum amuytʼañatakix mä yanaptʼiriw munasi.

Jesusax arkirinakapan Diosan Arupat sapak amuytʼapxañapxa janiw ukhamak suykänti. Mä kutix Jesús pachpaw “Qillqatanakatx jupanakarux amuytʼayäna” (Lucas 24:45). Biblian yatichäwinakapat sum amuytʼañatakixa, yanaptʼaw munasi uk Jesusax sum yatïna.

¿Kawkins yanaptʼa jikxatsna?

Jesusax arkirinakaparuw mayninakar yanaptʼapxañapatakix mayïna. Janïr alaxpachar sarkasaxa akham sänwa: “Taqi akapachankir jaqinakar yatiyir sarapxam, nayar arkir tukuyapxam [...]. Yatichapxarakim taqi kuntix nayax jumanakar yatichapksma ukanaka phuqhaña” sasa (Mateo 28:19, 20). Jïsa, chiqpach cristianonakan irnaqäwipax mayninakar Bibliat yatichañawa, kunjamsa yatiqirix jakäwipan Biblian iwxanakaparjam sarnaqaspa uk sum amuytʼayañasawa. Ukhamaxa, chiqpach cristianonakaw mayninakar Bibliat sum amuytʼapxañapatakix yanaptʼapxañapa.

Arkirinak tukuyanipxam sasin Jesusax siskäna uka qhipatxa, ¿kunas paspachäna? Uka tuqit jichhax amuytʼañäni. Mä kutixa, jilïrit uttʼayat etíope jaqix Isaiasan profeciap liytʼasax janiw sum amuykänti siw Bibliaxa. Uka profeciax Isaías 53:7, 8 ukan jikxatasi, akham siwa: “Khariñ ovejar uñtatwa jiwayañatak  apapxäna, jupasti amukïskänwa, janiw kunsa arsuskänti, kunjämatix mä ovejax tʼawra yawiratax jan jachkix ukhama. Jan chiqa uñjäwimpiw apasipxäna, janirakiw khitis juparux arxataskänti, janirakiw khitis jupatxa llaktʼaskänti. Aka uraqitxa jikʼinukupxänwa” sasa (Hechos 8:32, 33).

¿Taqi yänakxar uttʼayat etíope jaqix kuns luräna? Diosan Arupat wali sum yatxattʼat Felipe cristianompi yanaptʼayasiñatakiw akham jisktʼäna: “¿Khitits profetax ukxa parli? ¿Jupa kikpatti, jan ukax yaqhatcha?” sasa (Hechos 8:34). Etíope jaqix Jerusalén templon chiqpach Diosar yupaychawayasaw kuttʼaskäna. Inas uka tʼaqat sum amuytʼañatak Diosat mayischïna. Taqi chuymaw sum yatiqañatak liytʼaskäna ukax qhanpachaw amuyasi. Ukampisa, janiw uka qillqatat sum amuytʼkänti. Ukatwa altʼat chuymampi yanaptʼa mayïna, ukat Felipex jankʼakiw qhanañchtʼarakïna. Uka qillqatat sum amuytʼasaxa, etíopex wal kusisïna ukat cristianüxañatakix jankʼakiw bautisasiñ munäna (Hechos 8:35-39).

 Kunjamtï Felipesa ukat nayrïri patak maranakan (siglo I) cristianonakas Diosan Arup yatichapkänxa, uka kikparakiw jichhürunakan Jehová Diosan Qhanañchirinakapax jaqinakar yatichasipki. Kuntï Bibliax yatichki ukanakaxa pä patak kimsa tunk phisqani jila markanakan taqi chuym yatichasipkaraki. Sapa kuti maynir Bibliat yatichkasaxa, Bibliat apstʼat yatichäwinak walja kutiw yatichtʼapxaraki. * ( “Jisktʼanakar Bibliamp qhanañchtʼañataki” siski uka recuadro uñxattʼäta.)

“Taqi jisktʼanakajaruw Bibliax qhanañchitu”

Qalltanxa, Steven, Valvanera ukat Jo-Anne jupanakatwa parltʼaskayätanxa, ¿kuns lurapxpachäna? Jupanakax Jehová Diosan Qhanañchirinakapampiw Bibliat yatiqañ qalltapxatayna. ¿Kuna askinaksa jikxatapxi? Stevenax akham siwa: “Jisktʼanakajar qhanañchtʼäwi jikxatañax janiw chʼamäkataynati ukaw muspharayitu. Walja jiskʼa tʼaqanaka ukat Bibliankki uka sarnaqäwinakwa igualtʼaytxa. Janipuniw nayrax ukham lurirïkayätti. Ukhamax Bibliat sum yatxatañatakixa janiw yaqhanakamp jiskhisiñax wakiskataynati ukaw wal kusisiyitu” sasa.

Valvanerarux uka kikparakiw pasatayna, jupax akham siwa: “Biblian yatichäwinakapaxa amuytʼkaña ukat qhana ukhamätaynawa. Uk naya pachpaw yatxawayta ukatwa Bibliarux atinista janiw iglesianakan yatichapkitäna ukarjamaki amuyxayätti” sasa. Ukat Jo-Anne jupax akham sarakiwa: “Taqi jisktʼanakajaru Bibliax qhanañchitu ukhatxa, taqi chuymamp Diosar respetañ qalltawayta. Taqi jisktʼanakasaru qhanañchañatakiw Diosax Arup qillqayatayna, ukax muspharkañapuniwa” sasa.

Jumasti, ¿Jehová Diosan mä Qhanañchiripar uñtʼaraktati? Kunjamas Bibliat yatichañatak wakichäwipaxa uka tuqit sum yatxatañatakix jisktʼarakismawa. Jan maynirus uñtʼksta khaxa, aka revistan pä janan uñstki uka direccionaruw qillqtʼasma, ukhamatwa Jehová Diosan mä Qhanañchiripax Bibliat yatichiri utamar jutani. Bibliat yatiqañax janiw kuna chʼamäñapäkisa. Bibliat jukʼamp yatxatañatakix kimsa tuqit uñjawayktan ukanakaw yanaptʼätamxa: Jehová Diosar qullan ajayup mayiña, suma amuyumpiw liytʼañasa ukat mayni yatxattʼatamp yanaptʼayasiña.

[Qhanañchäwi]

[8 janan recuadropa/fotopa]

 Jisktʼanakar Bibliamp qhanañchtʼañataki

Jehová Diosan Qhanañchirinakapaxa, Bibliat yatichkasax aka jisktʼanakaruw qhanañchapxi:

• ¿Kunas Diosan amtapax aka Uraqitakixa?

• ¿Kawkinkapxisa jiwatanakaxa?

• ¿‘Qhipa urunakankxtanti’?

• ¿Kunatsa Diosax tʼaqhisiñanaka utjayaskakpacha?

• ¿Kunjamatsa familiasampi kusisit jakassna?

[7 janan fotonakapa]

Bibliat jukʼamp yatxatañatakixa, Diosaruw yanaptʼa mayisiñasa suma amuyumpiw liytʼañasa ukat maynimpi yanaptʼayasiñasawa