Ukampis janitï wali amuyump apnaqapkaspa ukhajja, aka jan walinakanwa celularajj chacha warmir uñjasiyaspa:

• Janiw chacha warmejj parltʼasiñatak tiemponëjjapjjaspati.

• Trabajon lurapjjañapäki ukanaksa utaruw apapjjaspa.

• Jan walinaksa jupanakat maynejj lurkaspa ukhamwa amuyjjapjjaspa, jan ukajj yaqhampiw engañj-jjapjjaspa.

JUNTÜPKTA UKHA

Michael sat mä esposojj akham siwa: “Awisajja, esposajamp juntöpkta ukhajja janis jupajj ukankkaspa ukhamawa. Jupajj celularapak jan tiempon uñaski, ukat akham situwa: ‘Ay, perdontʼita, mensajenak liytʼañatakejj janiw jichhakam tiemponïkayätti’ sasa”. Jonathan sat yaqha esposojj akham sarakiwa: “Awisajj mä chacha warmejj pachpa lugarankasipkchisa, walja kilometronak jayankapkaspas ukhamwa amuyasipjje” sasa.

AK AMUYTʼAM: Esposojampïkta jan ukajj esposajampïkta ukhajja, ¿qhawqha kutis mensajenakasa llamadanakas tiempo apaqetu? (EFESIOS 5:33).

TRABAJO

Yaqhep jaqenakajj 24 horanakaw trabajiñatakejj tiempo apsusipjjañapa. Yaqhepasti janiw ukham walja tiempo trabajipkarakiti, ukampis jupanakatakejj utar puripki ukhajja trabaj jaytañajj wali chʼamawa. Lee sat chachajj akham siwa: “Esposajampïñatak tiempo apsuskta ukhajja, trabajot jawsanipkitu uka llamadanak jan contestañasa, mensajenak jan uñjjatañasa nayatak wali chʼamawa” sasa. Joy sat warmejj akham sarakiwa: “Utajatpach trabajta, ukatwa nayatakejj kuna ratus jan trabaj-jjañaja uk amtañajj wali chʼamajja. Trabajor jan sint chuym uchañatakejj chʼamachasiñajawa” sasa.

AK AMUYTʼAM: Chacha warmjam parltʼasipkta ukhajj ¿wali sumti jumajj istʼta? (LUCAS 8:18).

JAN JAYTJASIRÏÑA

Chacha warminakar jisktʼaskäna ukarjamajja, kunsa maynejj redes sociales ukanakar apkati uka kawsaw walja matrimonionakajj jan waltʼayasipjje sasaw yatisiwayi. Jisktʼasiwayki ukanakat yaqhepajja, esposopana jan ukajj esposapana jan uñjkataw redes sociales ukanakar kunaymaninak apkatapjje.

Ukatwa waljanejj redes sociales ukanakajj casadonakatak wali peligrosow sasin amuyapjje, adulterio juchar kunaw purtʼasipjjaspa. Yaqhep abogadonakajj akhamwa divorcio toqet sapjje: ‘Redes sociales kawsaw matrimonionakajj jaljtapjje’ sasa.

AK AMUYTʼAM: ¿Maynimp parlkta uka mensajenak esposomatsa jan ukajj esposamatsa imantañti yatta? (PROVERBIOS 4:23).

KUNAS JUMATAK NAYRANKI UK AMUYTʼAM

Mä jaqetï jan sum manqʼaskaspa ukhajj usuntaspawa. Ukhamarakiw mä chacha warmitï parlasiñatak jan tiempo apstʼasipkani ukhajja, matrimoniopan jan waltʼäwinakajj utjaspa (Efesios 5:28, 29).

Aka ewjjtʼanakat kawkïrinaksa lurañ munapjjta uk amuytʼapjjam, jan ukajj kunsa lurañ munapjjta uk qellqtʼasipjjam:

• Urun may kutikis junto manqtʼasiña.

• Awisajj celular jan ukajj yaqha ukhamanak jaytaña.

• Mä suma lugarar panik saraña, jan ukajj kunatï panpachanir gustapktam uk luraña.

• Arumanakajj celular jiwtʼayaña ukhamarak jaya cheqar uchaña.

• Sapüru 15 minutonak jan kunamp jarkʼayasis parltʼañatak tiempo apstʼasiña.

• Kuna horakamakis Internet apnaqapjjäta uk amtaña.