KE A tu Kojomi Ligbi ɔ he munyu ɔ, mɛni susumi lɛ baa o juɛmi mi? Nihi babauu a susumi ji kaa, a maa ngɔ klaahi ayɔ akpehi abɔ kɛ ba Mawu matsɛ sɛ ɔ hɛ mi, nɛ a maa kojo mɛ kakaaka. A susu kaa hiɔwo nɛ ni komɛ ma ná ji kaa a ma ya jɔɔ a he ngɛ hiɔwe, nɛ ni komɛ hu a ma pii mɛ kɛ ya neneene. Se pi jã kulaa nɛ Baiblo ɔ de ngɛ Kojomi Ligbi ɔ he. Mawu Munyu ɔ tu be nɛ ɔ he munyu kaa, e ji hɛ nɔ kami be nɛ a maa pee nɔ́ tsuaa nɔ́ ehe, se pi sawale numi be.

Wa kaneɔ bɔ nɛ bɔfo Yohane tu Kojomi Ligbi ɔ he munyu ha a ngɛ Kpojemi 20:11, 12 ɔ ke: ‘Kɛkɛ nɛ i na matsɛ sɛ hiɔ ngua ko, kɛ Nɔ nɛ hii si ngɛ nɔ ɔ, nɛ zugba kɛ hiɔwe tu fo ngɛ e hɛ mi, nɛ a nɛ blɔ ha mɛ. Nɛ i na ni gbogboe ɔmɛ, ni tsɔwi kɛ ni nguahi nɛ a daa si ngɛ matsɛ sɛ ɔ hɛ mi. A bli womihi a nya, nɛ a bli womi kpa ko nɛ ji wami womi ɔ hu nya. Nɛ a kojo ni gbogboe ɔmɛ, ni tsɔwi kɛ ni nguahi, ngɛ níhi nɛ a ngma ngɛ womi ɔmɛ a mi ɔ nya, bɔ nɛ sa a ní tsumi ɔmɛ.’ Mɛnɔ ji Kojolɔ nɛ a tu e he munyu ngɛ hiɛ ɔ?

Yehowa Mawu ji adesahi a Kojolɔ ngua pe kulaa. Se e ngɔ kojomi ní tsumi ɔ kɛ wo nɔ kpa dɛ. Kaa bɔ nɛ Bɔfo Ɔmɛ A Ní  Tsumi 17:31 ɔ tsɔɔ ɔ, bɔfo Paulo de ke Mawu “to be pɔtɛɛ ko, nɛ e hla nɔ ko nɛ e maa gu e nɔ kɛ kojo je ɔ tsuo ngɛ dami sane yemi nya.” Kojolɔ nɛ a hla nɛ ɔ ji Yesu Kristo, nɔ nɛ a tle lɛ si kɛ je gbeje ɔ. (Yohane 5:22) Se mɛni be Kojomi Ligbi ɔ maa je sisi? Nɛ be enyɛmɛ e maa ye?

Kpojemi womi ɔ tsɔɔ kaa Kojomi Ligbi ɔ maa je sisi ke a puɛ Satan blɔ nya tomi nɛ ngɛ zugba a nɔ ɔ ngɛ Harmagedon ta a mi ɔ se. * (Kpojemi 16:14, 16; 19:19–20:3) Ngɛ Harmagedon se ɔ, a maa wo Satan kɛ e mumi yayami ɔmɛ tsu ngɛ muɔ voo ko mi jeha akpe. Ngɛ jamɛ a be ɔ mi ɔ, nimli 144,000 ɔ maa pee kojoli nɛ ‘a kɛ Kristo maa ye matsɛ jeha 1,000’ ngɛ hiɔwe. (Kpojemi 14:1-3; 20:1-4; Roma Bi 8:17) Kojomi Ligbi ɔ pi nɔ́ ko nɛ a maa pee lɛ kpatakpata ngɛ ngmlɛfia 24 mi. E maa ye jeha akpe.

Ngɛ jeha akpe ɔ mi ɔ, Yesu Kristo maa kojo “nihi nɛ a hɛ ngɛ, kɛ ni nɛmɛ nɛ a gbo ɔ tsuo.” (2 Timoteo 4:1) “Nihi nɛ a hɛ ngɛ ɔ” ji “nimli asafo” nɛ a maa po Harmagedon ɔ nɛ. (Kpojemi 7:9-17) Jehanɛ ɔ, bɔfo Yohane na “ni gbogboe ɔmɛ . . . nɛ a daa si ngɛ matsɛ sɛ ɔ hɛ mi” konɛ a kojo mɛ. Kaa bɔ nɛ Yesu wo si ɔ, kɛ gu gbogboehi a si temi ɔ nɔ ɔ, ‘nihi tsuo nɛ ngɛ yɔkɔ ɔmɛ a mi ɔ maa nu [Kristo] gbi, nɛ a maa je kpo.’ (Yohane 5:28, 29; Bɔfo Ɔmɛ A Ní Tsumi 24:15) Se mɛni ji nɔ́ nɛ a maa da nɔ kɛ kojo mɛ?

Kaa bɔ nɛ Yohane na ngɛ nina a mi ɔ, “a bli womihi a nya,” nɛ ‘a kojo ni gbogboe ɔmɛ ngɛ níhi nɛ a ngma ngɛ womi ɔmɛ a mi ɔ nya, bɔ nɛ sa a ní tsumi ɔmɛ.’ (Kpojemi 20:12) Anɛ níhi nɛ nihi pee blema ji níhi nɛ a ngma ngɛ womi nɛ ɔmɛ a mi ɔ lo? Dɛbi, a be níhi nɛ a pee loko a gbo ɔ nɔ dae kɛ kojo mɛ. Kɛ wa pee kɛ le enɛ ɔ kɛɛ? Baiblo ɔ de ke: “Ke nɔ ko gbo ɔ, e kɛ yayami gba mi.” (Roma Bi 6:7) Enɛ ɔ he ɔ, a maa ngɔ nihi nɛ a ma tle mɛ si ɔ a he blema yayamihi tsuo kɛ pa mɛ. Lɔ ɔ he je ɔ, womi nɛ ɔmɛ ma nyɛ maa da si ha ní kpa komɛ nɛ Mawu maa suɔ kaa a pee. Ja nihi nɛ maa po Harmagedon kɛ nihi nɛ a ma tle mɛ si ɔ ye Mawu mlaa amɛ kɛ mlaa hehi tsuo nɛ Yehowa  maa wo ngɛ jeha akpe ɔ mi ɔ a nɔ, loko a maa hi si kɛ ya neneene. Lɔ ɔ he ɔ, nɔ́ nɛ nɔ tsuaa nɔ maa pee ngɛ Kojomi Ligbi ɔ mi ɔ nɔ a maa da kɛ kojo lɛ.

Kojomi Ligbi ɔ maa pee kekleekle be nɛ nimli ayɔ akpehi abɔ ma ná he blɔ kɛ kase Mawu suɔmi nya ní peemi konɛ a nyɛɛ ngɛ nya. Enɛ ɔ tsɔɔ kaa tsɔsemi ní tsumi ko maa ya nɔ ngɛ he tsuaa he. Ngɛ anɔkuale mi ɔ, ‘a maa kase nɔ́ nɛ ji dami sane yemi.’ (Yesaya 26:9) Se pi nɔ tsuaa nɔ nɛ maa suɔ kaa e pee Mawu suɔmi nya ní. Yesaya 26:10 de ke: “E ngɛ mi kaa o naa yiwutsotsɛmɛ mɔbɔ lɛɛ, se a kase we nɛ a pee nɔ́ nɛ da. E ngɛ mi kaa a ngɛ nihi nɛ peeɔ nɔ́ nɛ da a zugba nɔ lɛɛ, se yayami mohu a ngɛ pee kpamisa; a yɔse we kaa Mawu Kpetekpleenyɛ ji mo.” A ma kpata yayami peeli nɛ ɔmɛ a hɛ mi pɛsɛpɛsɛ ngɛ Kojomi Ligbi ɔ mi.—Yesaya 65:20, NW.

Loko Kojomi Ligbi ɔ maa ba nyagbe ɔ, nihi nɛ a he a yi wami ɔ ‘maa ba wami mi’ nitsɛnitsɛ kaa nihi nɛ a ye mluku. (Kpojemi 20:5) Enɛ ɔ tsɔɔ kaa, a maa kpale ngɔ adesahi kɛ ba mluku yemi si himi mi ekohu ngɛ Kojomi Ligbi ɔ mi. (1 Korinto Bi 15:24-28) Enɛ ɔ se ɔ, nyagbe ka maa ba. A ma je Satan kɛ je tsu ɔ mi nɛ a ma ha lɛ he blɔ nɛ ji nyagbe nɔ́, konɛ e ba sisi adesahi. (Kpojemi 20:3, 7-10) Nihi nɛ be Satan blɔ hae nɛ e sisi mɛ ɔ, Baiblo siwo nɛ ɔ maa ba mi nitsɛnitsɛ ngɛ a blɔ fa mi: “Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:29) Niinɛ, Kojomi Ligbi ɔ maa pee jɔɔmi ha adesahi anɔkualetsɛmɛ tsuo!