Nihi nɛ a hɛ mi wa kɛ ní tsumi ɔ tui ní tsumi nya fo. Mohu ɔ, a tsuɔ ní wawɛɛ, ke ní tsumi ɔ hɛ mi be nyami po, konɛ a nyɛ nɛ a hyɛ a he nɛ a ye bua ni kpahi hulɔ.

Ke o suɔ jio, o sume jio, blɔ nya ní tsumi fuu ngɛ nɛ e sa kaa wa tsu a he ní ngɛ wa si himi mi. Akɛnɛ wa ngɛ je nɛ nihi fuu sume ní tsumi mi he je ɔ, ke o hɛ mi wa kɛ ní tsumi ɔ, o náa he se wawɛɛ.​—Fiɛlɔ 3:13.

“I na kaa ke nɔ ko tsuɔ ní wawɛɛ ɔ, e nɔ gbagba tee nɛ e tsui nɔɔ e mi. Jamɛ a bua jɔmi ɔ nɛ jeɔ ní tsumi mi kɛ baa a ha nɛ i na kaa e sa nɛ ye bua nɛ jɔ ní tsumi he. Ke o tsuɔ ní wawɛɛ ɔ, nihi a bua jɔɔ o he wawɛɛ, nɛ e haa nɛ o náa biɛ kpakpa.”​—Reyon.

BAIBLO SISI TOMI MLAA: “Ke o tsu ní ɔ, o maa na nɔ́ ko kɛ je mi.”​—Abɛ 14:23.

Moo pee níhi nɛ a wo ta ngɛ hiɛ ɔ konɛ e ye bua mo nɛ o bua nɛ jɔ ní tsumi he.

Moo kase bɔ nɛ a peeɔ níhi saminya ha. Ke o ngɛ we mi níhi pee jio, o ngɛ ní tsumi nɛ a ha mo kɛ je sukuu ɔ he ní tsue jio, o ngɛ ní tsumi kpa ko tsue jio ɔ, ngɔɔ o tsui tsuo kɛ wo mi. Ke o le nɔ́ ko he ní tsumi ɔ, hla blɔ nɛ o ma nyɛ maa gu nɔ kɛ ya o hɛ mi nɛ o nyɛ nɛ o pee lɛ saminya, nɛ o he nɛ sɔ hulɔ. Ke o le nɔ́ ko he ní tsumi saminya a, lɔ ɔ ma ha nɛ o bua maa jɔ ní tsumi nɛ o ngɛ tsue ɔ he.

BAIBLO SISI TOMI MLAA: “Anɛ o le nɔ ko nɛ tsuɔ ní saminya lo? Jamɛ a nɔ ɔ, matsɛmɛ nɛ e ma sɔmɔ; pi ni guhi.”​—Abɛ 22:29.

Moo ngɔ o juɛmi kɛ ma nɔ́ nɛ maa je mi kɛ ba a nɔ. Behi fuu ɔ, ke o tsu o blɔ nya ní tsumihi a he ní saminya a, ni kpahi náa he se. Kaa nɔ hyɛmi nɔ́ ɔ, ke o tsu o we mi ní tsumi saminya a, o jeɔ tloomi ngɛ ni kpahi a kuɛ nɔ ngɛ o weku ɔ mi.

BAIBLO SISI TOMI MLAA: “Bua jɔmi babauu ngɛ nɔ́ hami mi pe nɔ́ ngɔmi.”​—Ní Tsumi 20:35.

Moo pee babauu. Mo ko pee bɔbɔyoo pɛ, moo bɔ mɔde nɛ o pee babauu. Ke o pee jã a, e haa nɛ a naa kaa mo nitsɛ nɛ o suɔ nɛ o pee babauu, se pi kaa a ngɛ o nɔ nyɛe kaa o pee.​—Mateo 5:41.

BAIBLO SISI TOMI MLAA: “Nɔ́ kpakpa nɛ o maa pee ɔ, o ko pee ngɛ nɔ nyɛmi nya, se mohu ngɛ mo nitsɛ o suɔmi nya.”​—Filemon 14.

Moo ngmɛ pɛpɛɛpɛ. Nihi nɛ a hɛ mi wa kɛ ní tsumi ɔ pee we hejɔ̃, nɛ lɔ ɔ hu tsɔɔ we kaa be fɛɛ be ɔ, a ngɛ ní tsue. A bɔɔ mɔde nɛ a ngmɛɛ pɛpɛɛpɛ. A bua jɔɔ ní tsumi nɛ a ngɛ tsue ɔ he, nɛ ngɛ jamɛ a be ɔ mi nɔuu ɔ, a náa be kɛ jɔɔ a he hulɔ.

BAIBLO SISI TOMI MLAA: “Afani nɔ́ ko bɔbɔyoo nɛ tue mi jɔmi ngɛ he pe nɛ o kɛ o nine enyɔ ma gbo yaka dengme kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.”​—Fiɛlɔ 4:6.