1, 2. Mɛni nyagba Mawu we bi kɛ ngɛ kpee mwɔnɛ ɔ? (Moo hyɛ fonihi nɛ ngɛ ní kasemi ɔ sisije ɔ.)

DƆKITAHI kɛ nɛɛsihi fuu hyɛɛ nihi nɛ hiɔ nɛ sãa nɔ ngɛ a he. A hyɛɛ hiɔtsɛmɛ nɛ ɔmɛ ejakaa a suɔ nɛ a ye bua mɛ. Se ke a ngɛ hiɔtsɛmɛ nɛ ɔmɛ hyɛe ɔ, a woɔ tade pɔtɛɛ komɛ konɛ hiɔ nɛ ngɛ ni ɔmɛ a he ɔ ko sã mɛ. Jã nɔuu kɛ̃ nɛ wɔ hu waa kɛ nihi nɛ a ngɛ su yayahi nɛ a peeɔ níhi nɛ Mawu sume nɛ ngɛ he kake. Eko ɔ, waa kɛ mɛ tsuɔ ní, aloo waa kɛ mɛ ngɛ we mi. Enɛ ɔ ngɔɔ nyagba komɛ kɛ baa.

² Ngɛ nyagbe ligbi nɛ ɔmɛ a mi ɔ, nihi a je mi bami puɛ kulaa. Womi enyɔne nɛ bɔfo Paulo ngma kɛ ya ha Timoteo ɔ tsɔɔ bɔ nɛ nihi nɛ a ja we Mawu ɔ maa pee a ní ha ngɛ nyagbe ligbi ɔmɛ a mi. (Kane 2 Timoteo 3:1-5, 13.) E ngɛ mi kaa wa sume jamɛ a su ɔmɛ mohu lɛɛ, se ke wa hyɛ we nɛ hi ɔ, nihi nɛ a jeɔ jamɛ a su ɔmɛ kpo ɔ maa ngɔ a su yaya amɛ kɛ sã wɔ. (Abɛ 13:20) Ngɛ munyu nɛ ɔ mi ɔ, wa maa na bɔ nɛ Mawu we bi a subai ngɛ slɔɔto ngɛ nihi nɛ a ngɛ je ɔ mi ɔ a he ha. Jehanɛ hu ɔ, wa maa hyɛ bɔ nɛ wa maa pee ha kɛ ye bua nihi konɛ a ba sɔmɔ Yehowa, nɛ́ jamɛ a be ɔ mi nɔuu hu ɔ, a su yaya amɛ ko sã wɔ.

3. Mɛnɔmɛ nɛ suhi nɛ a wo ta ngɛ 2 Timoteo 3:2-5 ɔ kɔɔ a he?

 ³ Bɔfo Paulo ngma ke, “Ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba.” Lɔ ɔ se ɔ, e tsɔɔ su yayahi 19 nɛ nihi ma je kpo ngɛ nyagbe be nɛ ɔmɛ a mi. Suhi nɛ e wo tã nɛ ɔmɛ ngɛ kaa suhi nɛ e wo ta ngɛ Roma Bi 1:29-31 ɔ. Se suhi nɛ Paulo wo tã ngɛ Timoteo womi ɔ mi ɔ ekomɛ ngɛ nɛ a be Kristofohi A Hela Ngmami kpa amɛ a mi. Paulo je e munyu ɔ sisi ke, “adesahi maa pee.” Se tsa pi nimli tsuo nɛ a jeɔ su yaya nɛ ɔmɛ kpo. Kristofohi lɛɛ a ngɛ su kpakpahi.​—Kane Malaki 3:18.

4. Mɛni o ma nyɛ ma de ngɛ he nɔ woli a he?

⁴ Benɛ Paulo de ke nihi babauu maa pee nihi nɛ a suɔ mɛ nitsɛmɛ a he kɛ sika suɔli se ɔ, e tsɔɔ kaa nihi maa pee fiali, he nɔ woli, kɛ pupuupu peeli. Behi fuu ɔ, nihi jeɔ su nɛ ɔmɛ kpo ejakaa a susu kaa a le ní komɛ peemi, aloo a he ngɛ fɛu, aloo a ngɛ sika loo blɔ nya pe ni kpahi. Nɔ́ nɛ nimli nɛ ɔmɛ suɔ wawɛɛ ji kaa nihi nɛ a bu mɛ, nɛ a wo a hɛ nyami. Ní lelɔ ko ngma ngɛ nihi nɛ a woɔ a he nɔ ɔ he ke: “A puɛ amaga ko ngɛ a tsui mi nɛ a kɛ jaa mɛ nitsɛmɛ a he.” Ni komɛ hu tsɔɔ kaa he nɔ womi ji su ko nɛ hí kulaa, ejakaa ke he nɔ woli po na kaa nihi ngɛ a he nɔ woe ɔ, a sume kulaa.

5. Mɛni ha nɛ Mawu sɔmɔli komɛ nɛ a ye lɛ anɔkuale be ko nɛ be ɔ wo a he nɔ?

⁵ “He wo,” aloo he nɔ womi ji su ko nɛ Yehowa sume kulaa. (Abɛ 6:16, 17) Ke nɔ ko woɔ e he nɔ ɔ, e be nyɛe maa hɛ kɛ su Mawu he. (La 10:4) Jã pɛ nɛ Abosiami ngɛ ɔ nɛ. (1 Tim. 3:6) Aywilɛho sane ji kaa Yehowa sɔmɔli anɔkualetsɛmɛ komɛ po ná su yaya nɛ ɔ eko. Yuda matsɛ Uzia kɛ anɔkuale yemi sɔmɔ Yehowa jehahi fuu. Baiblo ɔ de ngɛ e he ke, ‘Benɛ Uzia tsɛ yemi ɔ ba he si ɔ, e wo e he nɔ, nɛ nɔ́ nɛ ɔ ha nɛ e hɛ mi kpata. E ya sã tsopa kɛ e he via ngɛ tsopa kɛ e he via sami la tɛ ɔ nɔ ngɛ Yehowa we ɔ, nɛ e kɛ nɔ́ nɛ ɔ tɔ̃ Yehowa e Mawu ɔ nɔ.’ Matsɛ Hezekia hu wo e he nɔ, se pee se ɔ, e tsake.​—2 Kron. 26:16; 32:25, 26.

6. Jinɛ mɛni ma nyɛ ma ha nɛ David nɛ wo e he nɔ, se mɛni he je nɛ e wo we e he nɔ ɔ?

⁶ Ni komɛ woɔ a he nɔ akɛnɛ a he ngɛ fɛu, a he biɛ, a le lami, a le ní komɛ peemi, a ngɛ he wami, aloo a woɔ a he nɔ ngɛ he blɔ ngua ko nɛ a ngɛ ɔ he je. David ná ní nɛ ɔmɛ tsuo, se e ba e he si e wami be tsuo. Benɛ David gbe Goliat nɛ Matsɛ Saul ngɔ e biyo ɔ kɛ ha lɛ kaa e yo ɔ, David de ke: “Mɛnɔ ji mi, nɛ ye tsɛ we ɔ hu mɛnɔmɛ ji mɛ ngɛ Israel, nɛ́ imi nɛ ɔ i ba peeɔ matsɛ lɛɛ e ngatsɛ?” (1 Sam. 18:18) Mɛni ye bua David nɛ e wo we e he nɔ? Ke pi nɛ Yehowa “ma e yi si,” aloo e ba e he si kɛ ye bua David ɔ, jinɛ David ko ná we he blɔhi kɛ ní kpahi nɛ wa wo a ta kɛ sɛ hlami ɔ. (La 113:5-8) David le kaa ní kpakpahi tsuo nɛ e ngɛ ɔ, ekoeko be nɛ pi Yehowa nɛ e ha lɛ.​—Kɛ to 1 Korinto Bi 4:7 ɔ he.

7. Mɛni maa ye bua wɔ konɛ waa ba wa he si?

⁷ Mwɔnɛ ɔ, Yehowa we bi bɔɔ mɔde kaa a maa ba a he si kaa David. E ngɛ nyakpɛ kaa Yehowa nɛ ji nɔ nɛ kle pe nɔ fɛɛ nɔ ngɛ hiɔwe kɛ zugba a nɔ ɔ po baa e he si. (La 18:35) Wa bɔɔ mɔde kaa waa kɛ ga womi nɛ nyɛɛ se ɔ ma tsu ní: “Nyɛɛ wo mi mi sami nɛ mi kuɔ, mi mi jɔmi, he si bami, he jɔmi, kɛ tsui si tomi.” (Kol. 3:12) Wa le hu kaa suɔmi ‘fĩɛ, nɛ e pee we pupuupu.’ (1 Kor. 13:4) Ke nihi na  kaa wa baa wa he si ɔ, lɔ ɔ ma nyɛ ma ha nɛ a kase Yehowa he ní. Kaa bɔ nɛ yigbayihi a je mi bami nɛ munyu tumi piɛɛ we he ma nyɛ ma tsake a hunomɛ nɛ a be anɔkuale ɔ mi ɔ, jã nɔuu nɛ ke wa baa wa he si ɔ, lɔ ɔ ma nyɛ maa gbla nihi kɛ ba Mawu ngɔ.​—1 Pet. 3:1.

8. (a) Kɛ ni komɛ naa fɔli nɛ a bui mɛ ɔ ha kɛɛ mwɔnɛ ɔ? (b) Mɛni ga womi Ngmami ɔ kɛ ha bimɛ?

⁸ Paulo tsɔɔ bɔ nɛ adesahi kɛ a sibi maa hi si ha ngɛ nyagbe ligbi nɛ ɔmɛ a mi. E tsɔɔ kaa ngɛ nyagbe ligbi ɔmɛ a mi ɔ, bimɛ be a fɔli bue. E ngɛ mi kaa mwɔnɛ ɔ, womihi, sinihi, kɛ tiivi nɔ ní peemihi ha nɛ nihi nɛ́ tɔmi ko ngɛ su nɛ ɔ he, se ngɛ anɔkuale mi ɔ, nɔ buimi su nɛ ɔ ngɛ wekuhi puɛe. Nihi nɛ a hi si blema a po le enɛ ɔ. Kaa nɔ hyɛmi nɔ́ ɔ, ngɛ blema Hela bi a kusumi nya a, ke nyumu ko wo e nine nɔ ngɛ e fɔli a nɔ ɔ, a ngɔɔ he blɔhi tsuo nɛ e ngɛ kaa ma a mi no ɔ ngɛ e dɛ. Ngɛ Roma bi a mlaa nya a, a naa nɔ nɛ wo e nine nɔ ngɛ e fɔli a nɔ ɔ kaa nɔ gbelɔ. Hebri Ngmami ɔ kɛ Kristofohi A Hela Ngmami ɔmɛ tsuo wo bimɛ ga kaa a bu a fɔli.​—2 Mose 20:12; Efe. 6:1-3.

9. Mɛni lɛ maa ye bua nihewi kɛ yihewi konɛ a bu a fɔli tue?

⁹ Bimɛ ma nyɛ maa bɔ a he mɔde konɛ nɔ buimi su nɛ ngɛ je ɔ mi ɔ ko sã mɛ. Loko a ma nyɛ maa pee jã a, ja a susu ní kpakpahi nɛ a fɔli ɔmɛ pee ha mɛ ɔ he. E sa nɛ bimɛ nɛ a nu sisi kaa Mawu nɛ ji wɔ tsuo wa Tsɛ ɔ ngɛ blɔ hyɛe kaa a maa bu a fɔli. Ke bimɛ tu a fɔli a he munyu kpakpa a, enɛ ɔ ma ha nɛ nihewi kɛ yihewi kpahi hu maa kase, nɛ mɛ hu a maa pee jã. E ji anɔkuale kaa ke fɔli nui nɔ́ he hí a bimɛ ɔ, e he waa kɛ haa bimɛ ɔmɛ kaa a maa je a tsui mi nɛ a bu a fɔli ɔmɛ. Se ke bimɛ na kaa a fɔli ngɛ suɔmi nitsɛnitsɛ kɛ ha mɛ ɔ, enɛ ɔ woɔ mɛ he wami nɛ a buɔ a fɔli ɔmɛ tue ke e he wa ha mɛ kaa a maa pee jã po. Niheyo ko nɛ a tsɛɛ lɛ ke Austin de ke: “Be komɛ ɔ, i suɔ kaa ma pee níhi nɛ i suɔ, se ye fɔli ɔmɛ woɔ mi mlaahi nɛ sisi numi ngɛ he. A tsɔɔ mi nɔ́ he je nɛ a woɔ jamɛ a mlaa amɛ, nɛ a kɛ mi sɛɛɔ ní faa. Enɛ ɔ yeɔ bua mi nɛ i buɔ mɛ tue. I ba na kaa a susuɔ ye he, nɛ lɔ ɔ ha nɛ ye bua jɔ he kaa ma pee níhi nɛ ma ha a bua maa jɔ.”

10, 11. (a) Mɛni suhi nɛ nihi jeɔ kpo nɛ tsɔɔ kaa a be suɔmi kɛ ha ni kpahi? (b) Kɛ suɔmi nɛ anɔkuale Kristofohi ngɛ kɛ ha ni kpahi ɔ mi wa ha kɛɛ?

¹⁰ Paulo wo su kpahi ta nɛ tsɔɔ kaa nihi be suɔmi náe kɛ ha ni kpahi. Ngɛ “nihi nɛ a bui a fɔli” ɔ se ɔ, Paulo tsɔɔ kaa nihi maa pee a he nihi nɛ li sina. Sisi numi ngɛ he kaa Paulo to e munyu ɔ nya jã, ejakaa nihi nɛ a li sina a bua jɔɛ kpakpa nɛ ni kpahi peeɔ mɛ ɔ he. E de hu kaa nihi maa pee nihi nɛ a jeɔ nɔ se. A hí kɛ somi ko somi, nɛ tsɔɔ kaa a be kplɛɛe nɛ a dla a kɛ ni kpahi a kpɛti. A maa pee a he musu bɔli kɛ nɔ se blɔ tsɔɔli, nɛ tsɔɔ kaa a maa tu munyu yayahi kɛ si nimli kɛ Mawu po. Nihi maa pee a he nɔ he guɛ gbeli, nimli nɛ a yeɔ lakpa kɛ puɛɔ ni kpahi a biɛ. *

¹¹ Ngɛ suɔmi nɛ nihi be mwɔnɛ ɔ tsuo se ɔ, nihi nɛ a jaa Yehowa lɛɛ a ngɛ slɔɔto, ejakaa a jeɔ suɔmi nitsɛnitsɛ kpo kɛ haa nimli tsuo. Jã nɛ Mawu we bi ngɛ kɛ je blema. Yesu tsɔɔ kaa mlaa nɛ pe kulaa nɛ ngɛ Mose Mlaa a mi ɔ ji kaa nɔ ko maa suɔ Mawu. Mlaa nɛ nyɛɛ lɔ ɔ se ji kaa nɔ ko maa suɔ e nyɛmi nɔmlɔ, nɛ lɔ ɔ  hu ngɛ kaa a·gaʹpe. (Mat. 22:37-39) Yesu tsɔɔ hu kaa suɔmi nɛ Kristofohi ma ná kɛ ha a sibi ɔ lɛ ma ha nɛ nihi maa na kaa a ji anɔkuale Kristofohi. (Kane Yohane 13:34, 35.) E tsɔɔ kaa anɔkuale Kristofohi maa suɔ a he nyɛli po.​—Mat. 5:43, 44.

12. Mɛni Yesu pee kɛ tsɔɔ kaa e suɔ ni kpahi?

¹² Yesu je suɔmi agbo kpo kɛ ha nihi. E hia blɔ kɛ ya mahi a nɔ, nɛ e fiɛɛ Mawu Matsɛ Yemi ɔ he sane kpakpa a. E tsa hɛ yuyuili, glɔtsɛmɛ, kpititsɛmɛ kɛ nihi nɛ a tue nui nɔ́, nɛ e tle gbogboehi si. (Luka 7:22) Nihi fuu sume Yesu sane, se kɛ̃ ɔ, e gbo kɛ ha adesahi tsuo. Yesu je suɔmi nitsɛnitsɛ kpo kaa e Tsɛ ɔ nɔuu. Ngɛ je ɔ mi tsuo ɔ, Yehowa Odasefohi jeɔ suɔmi nitsɛ kpo kɛ tsɔɔ nihi.

13. Kɛ suɔmi nɛ wa jeɔ kpo kɛ haa nihi ɔ maa ye bua mɛ konɛ a ba le Yehowa ha kɛɛ?

¹³ Suɔmi nɛ wa jeɔ kpo ha nihi ɔ haa nɛ a ba leɔ wa Tsɛ nɛ e ngɛ hiɔwe ɔ. Kaa nɔ hyɛmi nɔ́ ɔ, benɛ nyumu ko nɛ e je Thailand ɔ ya kpokpa nɔ kpe ko ɔ, suɔmi nɛ e na ngɛ wa nyɛmimɛ ɔmɛ a kpɛti ɔ pee lɛ nyakpɛ wawɛɛ. Benɛ e ya su we mi ɔ, e bi konɛ a kɛ lɛ nɛ ba kase Baiblo ɔ si enyɔ daa otsi. E fiɛɛ kɛ ha e weku li, nɛ nyɔhiɔ ekpa se ɔ, e pee e kekleekle Baiblo kanemi ngɛ Matsɛ Yemi Asa a nɔ. Ke wa suɔ nɛ waa le bɔ nɛ suɔmi nɛ wa ngɛ kɛ ha ni kpahi ɔ ngɛ ha a, wa ma nyɛ ma bi wa he ke: ‘Anɛ i bɔɔ mɔde kaa ma ye bua ye weku li, nyɛmimɛ nɛ a ngɛ ye we asafo ɔ mi, kɛ nihi nɛ i kɛ kpeɔ ngɛ fiɛɛmi mi ɔ lo? Anɛ i bɔɔ mɔde kaa ma na nihi kaa bɔ nɛ Yehowa naa mɛ ɔ lo?’

14, 15. Mɛni su yayahi nɛ nihi jeɔ kpo, se kɛ a ti ni komɛ tsake ha kɛɛ?

¹⁴ Ngɛ nyagbe ligbi nɛ ɔmɛ a mi ɔ, nihi jeɔ su yaya komɛ hu kpo nɛ lɔ ɔ he je ɔ, e sa kaa Kristofohi nɛ a yu a he ngɛ nimli nɛ ɔmɛ a he. Nihi nɛ a sɔmɔ we Mawu ɔ sume nɔ́ kpakpa, aloo kaa bɔ nɛ Baiblo sisi tsɔɔmi komɛ hu de ɔ, “a teɔ si  kɛ woɔ nɔ́ kpakpa.” Ni komɛ maa pee nihi nɛ a be he nɔ yemi, kɛ nihi nɛ a hɛ mi jɔɛ. Nihi maa pee a tsui nya ní aloo a maa pee a ní basabasa.

¹⁵ Nimli nɛ jinɛ be ko nɛ be ɔ, a peeɔ a ní kaa lohwehi ɔ tsake a je mi bami. Baiblo ɔ de kɛ fɔ si kɛ je blema kaa tsakemi kaa jã maa ba ngɛ nihi a si himi mi. (Kane Yesaya 11:6, 7.) Ngmami ɔ tsɔɔ kaa lohwehi nɛ a he ngɛ gbeye kaa ogbetee kɛ jata kɛ we mi lohwehi kaa jijɔ bi kɛ na bi maa hi si ngɛ tue mi jɔmi mi. Mo kadi kaa nɔ́ nɛ maa ngɔ tue mi jɔmi ɔ kɛ ba ji lemi nɛ ‘zugba a tsuo maa le Yehowa’ a. (Yes. 11:9) Akɛnɛ lohwehi be nyɛe maa kase Yehowa he ní he je ɔ, gbami nɛ ɔ kɔɔ nimli nɛ a tsake a je mi bami ɔ he.

16. Kɛ Baiblo ɔ ye bua nihi nɛ a tsake a je mi bami ha kɛɛ?

¹⁶ Nihi babauu ngɛ nɛ be ko nɛ be ɔ, jinɛ a ngɛ kaa ogbeteehi ejakaa a hɛ mi jɔɛ, se amlɔ nɛ ɔ, a kɛ nihi hiɔ si ngɛ tue mi jɔmi mi. O ma nyɛ maa kane nimli kaa jã a he sane ngɛ munyu nɛ ji “Baiblo ɔ Tsakeɔ Nihi A Si Himi” ngɛ jw.org. Nihi nɛ a ba le Yehowa nɛ a ngɛ lɛ sɔmɔe ɔ be kaa nihi nɛ a naa mɛ kaa Mawu jali se a kua e mi he wami ɔ. Nimli nɛ ɔmɛ peeɔ kaa nɔ́ nɛ a ngɛ Mawu jae, se a ní peepee tsɔɔ we jã. Yehowa we bi nɛ be ko nɛ be ɔ, a hɛ mi jɔɛ ɔ “wo su ehe ɔ nɛ́ a bɔ ngɛ Mawu suɔmi nya ngɛ dami nitsɛnitsɛ kɛ se fimi nitsɛnitsɛ mi ɔ.” (Efe. 4:23, 24) Ke nihi ngɛ Mawu he ní kasee ɔ, a naa kaa e sa nɛ a ba a je mi ngɛ Mawu mlaa amɛ a nya. Enɛ ɔ yeɔ bua mɛ nɛ a ngmɛɔ níhi nɛ a heɔ yeɔ ɔmɛ a he, nɛ a tsakeɔ a su kɛ a je mi bami. Tsakemi kaa jã be gbɔjɔɔ, se Mawu mumi ɔ ma nyɛ maa ye bua nihi nɛ a suɔ kaa a maa pee Mawu suɔmi nya ní ɔ.

17. Mɛni maa ye bua wɔ konɛ wa ko kase nihi nɛ a jeɔ su yayahi kpo ɔ?

¹⁷ Amlɔ nɛ ɔ, e he wɛ kaa wa maa na slɔɔto nɛ ngɛ Mawu sɔmɔli kɛ nihi nɛ a sɔmɔ we Mawu ɔ a kpɛti. Akɛnɛ wa ji Mawu sɔmɔli he je ɔ, e sa nɛ wa hɛ nɛ hi wa he nɔ saminya konɛ wa ko kase su yayahi nɛ nihi jeɔ kpo ɔ eko. Nile ngɛ mi kaa waa kɛ ga womi nɛ ngɛ 2 Timoteo 3:2-5 nɛ tsɔɔ kaa wa je wa he kɛ je a he ɔ ma tsu ní. Ngɛ anɔkuale mi ɔ, wa be nyɛe maa yu wa he kulaa ngɛ a he. Ejakaa waa kɛ mɛ nɛ tsuɔ ní, waa kɛ mɛ nɛ yaa sukuu nɛ waa kɛ mɛ lɛ ngɛ he kake. Se wa ma nyɛ ma kua a susumihi kɛ a ní peepee ɔmɛ. Wa ma nyɛ maa pee jã kɛ gu Baiblo ɔ nɛ wa maa kase, kɛ nihi nɛ a sɔmɔɔ Yehowa nɛ waa kɛ mɛ maa bɔ gbagbanii ɔ nɔ. Enɛ ɔ ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa saminya.

18. Kɛ wa munyu tutui kɛ wa je mi bami ma nyɛ maa ye bua ni kpahi konɛ a le Mawu ha kɛɛ?

¹⁸ E sa nɛ waa bɔ mɔde nɛ waa ye bua nihi konɛ a ba le Yehowa. Mo hla he blɔhi nɛ o kɛ maa ye nihi odase. Mo kpa Yehowa pɛɛ nɛ e ye bua mo konɛ o nyɛ nɛ o de mɛ nɔ́ ko nɛ maa ta a tsui he. E sa nɛ wa ha nɛ ni kpahi nɛ a le kaa wa ji Yehowa Odasefohi. Ke wa pee jã a, wa je mi bami kpakpa a maa wo Yehowa hɛ mi nyami, se pi wɔ nitsɛmɛ. Yehowa tsɔɔ wɔ bɔ nɛ wa maa pee ha kɛ “kua ní peepeehi nɛ sɛ Mawu hɛ mi kɛ je mi akɔnɔhi, nɛ waa kɛ juɛmi nɛ mi tsɔ kɛ dami kɛ Mawu gbeye yemi nɛ hi si ngɛ níhi a blɔ nya tomi nɛ ɔ mi.” (Tito 2:11-14) Ke wa ba wa je mi saminya a, ni kpahi maa na, nɛ a kpɛti ni komɛ po ma de ke: ‘Waa kɛ nyɛ maa ya, ejakaa wa nu kaa Mawu kɛ nyɛ ngɛ.’​—Zak. 8:23.