“Odasefo ɔmɛ je mi mi jɔmi kpo kɛ tsɔɔ i kɛ ye gbe ɔmɛ. Ligbi ko ɔ, Elaine nɛ e daa si ngɛ atsɛ̃se ɔ he ɔ ha ye gbe enyɔ ɔmɛ akpɔɔnɔɔ. Kɛ je lɔ ɔ se ɔ, be fɛɛ be nɛ wa maa su atsɛ̃se ɔ he ɔ, gbe ɔmɛ suɔ kaa a maa ya Odasefo ɔmɛ a ngɔ konɛ a ha mɛ akpɔɔnɔɔ.

“Nyɔhiɔhi fuu ba be, nɛ Odasefo ɔmɛ ya nɔ nɛ a ha gbe ɔmɛ akpɔɔnɔɔ, nɛ a kɛ imi hu sɛɛ ní, se ní sɛɛmi ɔ se kɛ we. Se i sume kaa i kɛ mɛ maa sɛɛ ní kɛ ya tsitsaa. Jamɛ a be ɔ mi ɔ, i ye maa pee jeha 70, nɛ i li níhi nɛ Odasefo ɔmɛ heɔ yeɔ. Akɛnɛ i ya sɔlemihi fuu nɛ ye kɔni mi jɔ̃ he je ɔ, i susu kaa e maa hi kaa ma kase Baiblo ɔ ngɛ ye dɛ he.

“Jamɛ a be ɔ mi ɔ, i naa Odasefohi kpahi nɛ mɛ hu a daa si ngɛ ma a mi he kpahi ngɛ atsɛ̃se ɔmɛ a he. Mɛ hu a jeɔ huɛ bɔmi su kpo. Be fɛɛ be ɔ, a haa ye sane bimi ɔmɛ a heto kɛ jeɔ Baiblo ɔ mi nɛ enɛ ɔ ha nɛ i ba he mɛ ye wawɛɛ.

Ligbi ko ɔ, Elaine bi mi ke, ‘Anɛ o le kaa lohwehi ji nike ní nɛ je Mawu ngɔ lo?’ I ha lɛ heto ke, ‘Ee, i le jã!’ Elaine kɛ mi susu Yesaya 11:6-9 ɔ he. Kɛ je lɔ ɔ se ɔ, i suɔ kaa ma kase Baiblo ɔ, se loloolo ɔ, i sume nɛ ma ngɔ womi ko ngɛ Odasefo ɔmɛ a dɛ.

“Pee se ɔ, ye bua ba jɔ i kɛ Elaine kɛ e huno Brent ní sɛɛmi ɔ he wawɛɛ, e ngɛ mi kaa wa ní sɛɛmi ɔ se kɛ we. A wo mi he wami kaa ma kane Baiblo ɔ kɛ je Mateo kɛ ya si Ní Tsumi konɛ ma le bɔ nɛ ma plɛ kɛ kase Kristo ha. Nɛ i pee jã. Be bɔɔ se ɔ, i kplɛɛ nɔ kaa Elaine kɛ Brent kɛ mi nɛ kase Baiblo ɔ. Nɔ́ nɛ ɔ ya nɔ ngɛ jeha 2016 mi ngɛ latsɛ be mi.

“I suɔ nɛ ma kase Baiblo ɔ daa otsi nɛ ma ya asafo mi kpe ngɛ Matsɛ Yemi Asa a nɔ. Ye bua jɔ wawɛɛ kaa i ngɛ nɔ́ nɛ Baiblo ɔ tsɔɔ nitsɛ ɔ kasee. Jeha kake se ɔ, i ha nɛ a baptisi mi nɛ i ba pee Odasefo no. Amlɔ nɛ ɔ, i ye jeha 79 nɛ ye bua jɔ kaa i ba na anɔkuale ɔ. Yehowa jɔɔ mi nɛ i ba piɛɛ e weku nɛ ngɛ je kɛ wɛ ɔ he.”