Yesu nyɛ nɛ e ye Samaria yo ko odase be mi nɛ e be fiɛɛmi tso mi ejakaa e ngɔ ní sɛɛmi kɛ je sisi. Mɛni wa maa pee konɛ wa nyɛ nɛ waa kɛ nihi nɛ wa lí mɛ ɔ nɛ je ní sɛɛmi sisi?

• Mo je huɛ bɔmi su kpo kɛ tsɔɔ nihi. E ngɛ mi kaa pɔ tɔ Yesu he mohu lɛɛ, se e gu nyu nɛ e bi yo ɔ nɔ kɛ je ní sɛɛmi ɔ sisi. Mo hu o ma nyɛ maa ngɔ ngami kɛ je sisi, nɛ o tu kɔɔhiɔ mi tsakemi loo nɔ́ ko nɛ ya nɔ kɛ we ɔ he munyu. Mo kai kaa sisije ɔ lɛɛ e ji ní sɛɛmi kɛkɛ, lɔ ɔ he ɔ, moo tu nɔ́ tsuaa nɔ́ nɛ ke o hyɛ ɔ, nɔ ɔ bua maa jɔ he ɔ he munyu. Ke e bua jɔɛ he ɔ, lɔ ɔ puɛ we nɔ́ ko. Moo bɔ mɔde kaa o kɛ nɔ kpa maa sɛɛ ní. Mo bi Yehowa nɛ e ha mo kã.​—Neh 2:4; Nít 4:29.

• Pee klaalo kaa he blɔ fɛɛ he blɔ nɛ o ma ná a, o kɛ maa fiɛɛ sane kpakpa a. Se koo ye o ya. Ha nɛ ní sɛɛmi ɔ nɛ pee bua jɔmi. Ke o kɛ ní sɛɛmi ɔ nyɛ e nɔ ɔ, eko ɔ, e bua be sane ɔ he jɔe, nɛ e ma kpa ní ɔ sɛɛmi. Ke o nyɛ we nɛ o ye nɔ ɔ odase loko ní sɛɛmi ɔ ba nya gbe po ɔ, o kɔni mi nɛ ko jɔ̃. Ke sane kpakpa a he munyu nɛ o maa tu ɔ woɔ o he gbeye ɔ, lɛɛ mo kɛ pee oti kaa o kɛ nihi maa sɛɛ ní se pi kaa o maa ye mɛ odase. [Je kekle video ɔ nɛ nyɛ susu he.]

• Bɔɔ mɔde kaa o maa tu nɔ́ ko nɛ o heɔ yeɔ he munyu ngɛ blɔ nɛ maa ta nɔ ɔ tsui he ɔ nɔ. Enɛ ɔ ma bli blɔ ha nɔ ɔ nɛ e ma bi mo sane konɛ o tsɔɔ munyu ɔ mi. Munyu nɛ Yesu tu ɔ ha nɛ yo ɔ hla kaa e maa le níhi fuu. Enɛ ɔ he ɔ, e bi Yesu sanehi. Benɛ Yesu ngɛ yo ɔ sane bimi ɔ heto hae ɔ, e gu ga blɔ nɔ nɛ e fiɛɛ sane kpakpa a kɛ tsɔɔ lɛ. [Je video enyɔne ɔ nɛ nyɛ susu he, lɔ ɔ se ɔ, je video etɛne ɔ nɛ nyɛ susu he.]