Biɛ Enyɛmɛ Nɛ Mawu Ngɛ?

FIAA

Nɔ́ nɛ Baiblo ɔ de

Mawu ngɛ biɛ kake pɛ. Bɔ nɛ a ngmaa Mawu biɛ nɛ ɔ ha ngɛ Hebri gbi ɔ mi ji יהוה. A tsɔɔ biɛ nɛ ɔ sisi ngɛ Dangme mi ke “Yehowa.” * Mawu ha nɛ e gbalɔ Yesaya ngma ke: ‘Ye biɛ ji Yehowa.’ (Yesaya 42:8) Biɛ Yehowa a je kpo maa pee si 7,000 ngɛ blema Baiblohi nɛ a kɛ nine ngma amɛ a mi. Biɛ nɛ ɔ je kpo si abɔ ngɛ Baiblo ɔ mi pe sablaihi nɛ a kɛ tsɛɛ Mawu kɛ nihi a biɛhi nɛ ngɛ Baiblo ɔ mi ɔ tsuo. *

Anɛ Yehowa ngɛ biɛ kpahi lo?

E ngɛ mi kaa ngɛ Baiblo ɔ mi ɔ, biɛ kake pɛ nɛ a kɛ tsɛɛ Mawu mohu lɛɛ, se e ngɛ sablaihi fuu. Sablaihi nɛ nyɛɛ se nɛ ɔmɛ kɛ bɔ nɛ a tsɔɔ a sisi ha a, haa nɛ wa naa bɔ nɛ Yehowa ngɛ ha, kɛ e su komɛ.

Sablai	He nɛ e je kpo ngɛ	Nɔ́ nɛ e tsɔɔ
Allah	(E be Baiblo ɔ mi)	A ná munyungu nɛ ji “Allah” a kɛ je Arabic mi. E sisi ji “Mawu,” se tsa pi Mawu biɛ nitsɛ ji lɔ ɔ, mohu ɔ, e ji sablai. A tsɛɛ “Mawu” ke “Allah” ngɛ Baiblohi nɛ a tsɔɔ sisi kɛ ya Arabic kɛ gbi kpahi a mi ɔ mi.
Ope	1 Mose 17:1	E ngɛ he wami nɛ se be. Hebri munyungu nɛ ji ‘El Shad·dai’ nɛ e sisi ji “Mawu Ope” ɔ, je kpo si kpaago ngɛ Baiblo ɔ mi.
Alfa kɛ Omega	Kpo Jemi 1:8; 21:6; 22:13	“Kekleekle ɔ kɛ sekpɛ ɔ” aloo “sisije ɔ kɛ nyagbe ɔ” nɛ́ a kɛ tsɛ Yehowa ngɛ Baiblo ɔ mi ɔ tsɔɔ kaa Mawu kpa ko sɛ́ we Yehowa hlami, nɛ e se hu eko be. (Yesaya 43:10) Ngɛ Hela gbi mi ɔ, Alpha ji kekleekle ningma okadi, nɛ omega hu ji nyagbe ningma okadi.
Nɔ nɛ ngɛ daa	Daniel 7:9, 13, 22	E be sisije; e ngɛ kɛ je blema lokoo. E ngɛ loko nɔ́ fɛɛ nɔ́ ba wami mi.—La 90:2.
Bɔlɔ	Yesaya 40:28	Lɛ nɛ e bɔ níhi tsuo.—Kpo Jemi 4:11.
Tsɛ	Mateo 6:9	Lɛ nɛ e ha wɔ wami.
Mawu	1 Mose 1:1	Nɔ́ ko nɛ a jaa; nɛ e ngɛ he wami. Hebri munyungu nɛ ji ‘Elo·him’ ɔ tsɔɔ kaa Yehowa je agbo, nɛ e hɛ mi ngɛ nyami wawɛɛ.
Mawu nɛ pe mawuhi tsuo	5 Mose 10:17	Lɛ ji Mawu nɛ e nɔ kuɔ pe mawu kpahi nɛ nihi jaa a tsuo.—Yesaya 2:8.
Tsɔɔlɔ kpanaa	Yesaya 30:20, 21	E tsɔɔ wɔ ní, nɛ e tsɔɔ wɔ nɔ́ nɛ e sa kaa waa pee konɛ e hi ha wɔ nitsɛmɛ.—Yesaya 48:17, 18.
Bua jɔmi Mawu	1 Timoteo 1:11	E ji bua jɔmi Mawu.—La 104:31.
Sɔlemi tue bulɔ	La 65:2	E buɔ nɔ fɛɛ nɔ nɛ e sɔleɔ kɛ haa lɛ ngɛ hemi kɛ yemi mi ɔ tue.
Imi Ji Nɔ Nɛ I Ji	2 Mose 3:14	E plɛɔ e he kɛ peeɔ nɔ́ fɛɛ nɔ́ nɛ e suɔ konɛ e nyɛ nɛ e tsu e yi mi tomi he ní. A tsɔɔ munyu nɛ ɔ sisi hu ke, “Ma Plɛ Ye He Kɛ Pee nɔ́ fɛɛ nɔ́ nɛ i suɔ” aloo “Ma Plɛ Ye He Kɛ Pee Nɔ́ Nɛ I Suɔ Kaa Ma Pee. (The Emphasised Bible nɛ J. B. Rotherham tsɔɔ sisi; New World Translation) Enɛ ɔ yeɔ bua wɔ nɛ wa naa nɔ́ nɛ Mawu biɛ nɛ ji Yehowa nɛ ngɛ 2 Mose 3:15 ɔ tsɔɔ.
A kɛ lɛ plee we nɔ́ he	2 Mose 34:14	A kɛ lɛ plee we jami he. A tsɔɔ munyu nɛ ɔ sisi hu ke, “e suɔ kaa a ja lɛ pɛ.”—New World Translation.
Neneene Matsɛ	Kpo Jemi 15:3	E matsɛ yemi ɔ be sisije, nɛ e be nyagbe hulɔ.
Nyɔmtsɛ	La 97:5	Nɔtsɛ; ngɛ Hebri mi ɔ, a deɔ ke, ‘A·dhohn’ aloo ‘Adho·nim’.
Nɔ Klɔuklɔu Pe Kulaa	Abɛ 9:10	E ngɛ klɔuklɔu, nɛ e he tsɔ pe nɔ fɛɛ nɔ.
Buɛ puɛlɔ	Yesaya 64:8	E ngɛ he wami ngɛ mahi, kɛ nɔ fɛɛ nɔ nɔ, kaa bɔ nɛ buɛ puɛlɔ ngɛ he wami ngɛ zu nɛ e kɛ puɛɛ buɛ ɔ nɔ ɔ.—Roma Bi 9:20, 21
Yi wami helɔ	Yesaya 41:14	E gu e bi Yesu Kristo kpɔmi afɔle sami ɔ nɔ kɛ he wa yi wami aloo kɛ kpɔ wɔ kɛ je yayami kɛ gbenɔ dɛ mi.—Yohane 3:16.
Tɛ sa	La 18:2, 46	Yehowa ji wa wesa he kɛ wa yi wami helɔ.

Nɔ́ he je nɛ e sa kaa waa le Mawu biɛ ɔ, nɛ waa ngɔ kɛ tsu ní

Mawu biɛ nɛ ji Yehowa a he hia lɛ wawɛɛ. Enɛ ɔ he je ɔ, e ha nɛ a kɛ tsu ní ngɛ Baiblo ɔ mi maa pee si akpehi abɔ.—Roma Bi 10:13.
Yesu, nɛ e ji Mawu Bi ɔ tsɔɔ si abɔ kaa Mawu biɛ ɔ he hia wawɛɛ. Kaa nɔ hyɛmi nɔ́ ɔ, e sɔle kɛ ha Yehowa ke: “Ha nɛ o biɛ ɔ he nɛ tsɔ.”—Mateo 6:9; Yohane 17:6.
Nihi nɛ a le Mawu biɛ ɔ, nɛ a kɛ tsɛɛ lɛ ɔ nyɛɔ nɛ a kɛ Yehowa ba peeɔ huɛ. (La 9:10; Malaki 3:16) Huɛ bɔmi nɛ ɔ ma ha nɛ a ma ná Mawu si womi ɔmɛ a he se. Mawu de ke: ‘Nɔ nɛ suɔ mi, nɛ e le ye biɛ Yehowa a, ma he e yi wami, nɛ ma bu e he.’—La 91:14.
Baiblo ɔ de ke: “Ní komɛ ngɛ nɛ a tsɛɔ mɛ mawuhi ngɛ hiɔwe aloo zugba a nɔ, kaa bɔ nɛ ‘mawuhi’ fuu kɛ ‘nyɔmtsɛmɛ’ fuu ngɛ ɔ.” (1 Korinto Bi 8:5, 6) Se kɛ̃ ɔ, Baiblo ɔ ha nɛ wa le anɔkuale Mawu kake pɛ ɔ biɛ. E biɛ ji Yehowa.—Yesaya 42:8.

^ Nihi nɛ a le Hebri gbi ɔ wawɛɛ ɔ a kpɛti ni komɛ susu kaa e sa nɛ a tsɔɔ Mawu biɛ ɔ sisi ke “Yahweh.”

^ Mawu biɛ nɛ a po lɛ kpiti ke “Yah” a je kpo maa pee si 50 ngɛ Baiblo ɔ mi. Biɛ nɛ ɔ je kpo ngɛ munyungu ko kaa “Haleluyah” loo “Alleluia” a mi. “Haleluyah” sisi ji a “je Yah yi.”—Kpo Jemi 19:1; American Standard Version; King James Version.