Ee, e ma ha heto. Baiblo ɔ mi munyuhi kɛ níhi a si kpami nɛ nihi ná ngɛ a si himi mi ɔ maa nɔ mi kaa Mawu haa sɔlemihi a heto. Baiblo ɔ de ke: ‘Nihi nɛ yee Mawu gbeye ɔ, e peeɔ a hiami ní kɛ haa mɛ. E buu a kue fami ɔmɛ hu tue, nɛ e heɔ a yi wami.’ (La 145:19) Se, ke Mawu ma ha o sɔlemi heto jio, e be heto hae jio, e daa si ngɛ o nɔ.

Níhi nɛ Mawu ngɛ hlae nɛ waa pee ke wa ngɛ sɔlee

•   E sa nɛ waa sɔle ha Mawu, se pi Yesu, Maria, he tsɔli, bɔfohi, aloo amagahi. Yehowa Mawu pɛ lɛ “Buɔ kue fami tue.”​—La 65:2.

•   E sa nɛ níhi nɛ wa maa sɔle kɛ bi ɔ kɛ Mawu suɔmi nya ní peemi nɛ a tsɔɔ ngɛ Baiblo ɔ mi ɔ nɛ kɔ.​—1 Yohane 5:14.

•   E sa nɛ waa sɔle kɛ gu Yesu biɛ mi kɛ tsɔɔ kaa wa ngɛ bu kɛ ha he blɔ nɛ e ngɛ ɔ. Yesu de ke, “Nɔ ko nɔ ko yɛ Tsɛ ɔ ngɔ kaa ja e gu ye nɔ.”​—Yohane 14:6.

•   Mo ná hemi kɛ yemi kaa Mawu ma ha o sɔlemi heto. Mo bi Mawu nɛ e ha nɛ o hemi kɛ yemi ɔ mi nɛ wa.​—Mateo 21:22; Luka 17:5.

•   E sa nɛ waa ba wa he si nɛ waa je wa tsui mi tsuo kɛ sɔle. Baiblo ɔ de ke: ‘Yehowa ngɛ hiɔwe lokoo mohu, se nɔ nɛ baa e he si ɔ, e hɛ hii e nɔ.’​—La 138:6.

•   E sɛ nɛ wa kɔni mi nɛ wo nyu. Yesu de ke: “Nyɛ bi, nɛ a ma ha nyɛ.”​—Luka 11:9.

Níhi nɛ Mawu hyɛ we loko e haa sɔlemi heto

•   O he womi nɔ su aloo ma nɛ o je mi. “Mawu hyɛ we nɔ hɛ mi, se mohu ma tsuaa ma mi ɔ, nɔ nɛ yee Mawu gbeye, nɛ e peeɔ nɔ́ nɛ da a, lɛ ji nɔ nɛ saa e hɛ mi.”​—Bɔfo Ɔmɛ A Ní Tsumi 10:34, 35.

•   Bɔ nɛ o maa pee o nɔmlɔ tso ɔ ha ke o ngɛ sɔlee. O ma nyɛ maa sɔle ngɛ si himi, si bami, si kplami, loo si dami nya.​—1 Kronika 17:16; Nehemia 8:6; Daniel 6:10; Marko 11:25.

•   Ke o maa sɔle ngɛ o yi mi jio, munyu ɔmɛ maa je kpo jio. Ke o sɔle ngɛ o yi mi nɛ nihi nɛ ngɛ o kasa nya a nui po, Mawu ma ha heto.​—Nehemia 2:1-6.

•   Ke o haomi ɔ kle jio, e kle we jio. Mawu ngɛ mo he wami woe kaa o ‘ngɔ o haomi ɔmɛ tsuo ngɔ fɔ e nɔ; ejakaa lɛ nɛ e hyɛɛ o nɔ.’—1 Petro 5:7.