PWONY ME 21
Kitye ka Tito Kwena Man Maber-ri Nining?
Macok cok-ki, Jehovah bitic ki Kerre me jwayo pekkiwa ducu. Man obedo kwena maber adada ma mitte ni dano ducu gunge. Yecu onongo mito ni lulub kore gunywak kwena man ki dano ducu! (Matayo 28:19, 20) Lucaden pa Jehovah gitye ka tiyo tic man ma Yecu ociko ni kitim-mi nining?
1. Lok ma tye i Matayo 24:14 tye ka cobbe i kare-ni nining?
Yecu otito ni: “Lok man me kwena maber me ker pa Lubanga gibitito i wi lobo ducu.” (Matayo 24:14) Lucaden pa Jehovah gitye ka tiyo tic man ma pire tek-ki ki yomcwiny. Watye ka tito kwena maber-ri i wi lobo ducu i leb makato 1,000 kulu! Tic man madit-ti mito kero madwong ki bedo ma wayubbe maber adada. Tic man pe twere labongo kony pa Jehovah.
2. Ngo ma watimo wek watit kwena maber-ri bot dano ducu?
Watito kwena man ka mo keken ma watwero nongo iye dano. Calo Lukricitayo me cencwari me acel, watito kwena i “paco pa dano.” (Tic pa Lukwena 5:42) Yo man me tito kwena kore ki kore-ni, konyowa me lok ki dano milion mapol mwaka ki mwaka. Kit macalo dano pol kare pe gibedo gang, wan bene watito kwena i dye lwak ka ma dano pol iye. Kare ducu watute me nywako ki dano lok i kom Jehovah kacel ki yubbe.
3. Obedo tic pa anga me tito kwena maber-ri?
Lukricitayo me ada ducu myero gunywak kwena maber-ri ki jo mukene. Watero ticwa man calo gin ma pire tek adada. Watito kwena ki kerowa ducu pien wangeyo ni man twero laro kwo pa dano. (Kwan 1 Temceo 4:16.) Pe kiculowa pi tic man, pien Baibul waco ni: “Wun wugamo nono labongo cul mo, wumi bene nono labongo cul.” (Matayo 10:7, 8) Pe dano ducu gijolo kwenawa. Ento pud wamedde ki tito kwena pien timo man nyuto ni watye ka lubo cik pa Jehovah dok man yomo cwinye.
NONG NGEC MATUT
Nong ngec matut i kom kit ma Lucaden pa Jehovah i wi lobo ducu gitye ka tito kwena, dok inen kit ma Jehovah konyogi kwede.
Tito kwena maber-ri i lobo: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Watute matek me oo bot dano ducu
Lucaden pa Jehovah gitute matek me tito kwena maber-ri bot dano i kabedo ducu. Tuk VIDIO, ci wunyam lapeny man ma lubo.
-
Gin ango ma ogudo cwinyi ki i kit ma Lucaden pa Jehovah gitute kwede me tito kwena?
Kwan Matayo 22:39 ki Jo Roma 10:13-15, ci wunyam lapeny magi ma lubo:
-
Ticwa me tito kwena nyuto nining ni wamaro jo mukene?
-
Jehovah winyo nining i kom jo ma gitito kwena maber-ri?—Nen tyeng me 15.
5. Wan lutic kacel ki Lubanga
Jami mutimme i kwo pa dano mapol nyuto ni Jehovah tye ka doro ticwa. Me labolle, i lobo New Zealand omego mo ma nyinge Paul orwatte ki dako mo i kare ma en tye ka tito kwena i ot ki ot i dyeceng. I odiko me nino meno, dako-ni onongo olego bot Lubanga kun tiyo ki nyinge Jehovah, dok olego ni Lubanga ocwal ngat mo obin olime. Paul owaco ni, “I nge cawa adek keken, ao i doggolane.”
Kwan 1 Jo Korint 3:9, ci wunyam lapeny man:
-
Gin man mutimme i lobo New Zealand nyuto nining ni Jehovah tye ka doro tic me tito kwena?
Kwan Tic pa Lukwena 1:8, ci wunyam lapeny man:
-
Pingo wamito kony ki bot Jehovah me cobo ticwa me pwony?
Tika onongo ingeyo?
Cabit ducu i cokkewa ma bedo i dye cabit, wanongo pwonnye ma konyowa i tic me tito kwena. Ka dong ibedo tye i cokkewa man, itamo ningo i kom pwonnye ma wanongo?
6. Walubo cik pa Lubanga me tito kwena
I cencwari me acel, lumone pa lulub kor Yecu gutute matek me jukogi ki tito kwena. Lukricitayo magi gupido wa i kot pi twerogi me tito kwena ki ‘laro lok pi kwena maber wek omok matek.’ (Jo Pilipi 1:7) Lucaden pa Jehovah i kare-ni bene gitimo kit meno. a
Kwan Tic pa Lukwena 5:27-42, ci wunyam lapeny man:
NGAT MO ROMO PENYI NI: “Pingo Lucaden pa Jehovah gicito i gangi pa dano ka tito kwena?”
-
In iromo gamone ningo?
WOT WIYE WIYE
Yecu ociko lulub kore me tito kwena maber-ri i wi lobo ducu. Jehovah tye ka konyo jone me timo tic man.
Ngo ma ipwonyo?
-
Kitye ka tito kwena maber-ri i wi lobo ducu nining?
-
Ticwa me tito kwena nyuto nining ni wamaro jo mukene?
-
In tika itamo ni tic man me tito kwena-ni twero keliwa yomcwiny? Pingo itamo kit meno?
TIM KWED
Nen kit ma Lucaden pa Jehovah gitito kwede kwena maber-ri i boma madongo.
Gin ango ma Lucaden pa Jehovah gutimo me konyo luring ayela?
Nen ka laminwa mo tito pingo nywako i tic me tito kwena pi kare me kwone ducu okele yomcwiny.
Pwony lok ma pigi tego madok i kom cik ma kot omoko ma oweko odoko yot botwa me tito kwena.
“Lutit Kwena me Ker-ri Gucwalo Kokogi i Kot” (God’s Kingdom Rules!, dul me 13)
a Lubanga aye ma ominiwa twero me tito kwena. Pi meno, pe mitte ni Lucaden pa Jehovah gunong twero ki bot luloc me lobo-ni ka wek gutit kwena maber-ri.
