Nirengo, wa vura duhe nga Baibiri nga gu buku nga ga birĩ-inohe te, si ni ruruhe ho si afura ni tipa agu apai nga ga birĩ-inohe. Ani wisigingo bete akpiapai nga gu nayugo gupai nga birĩ-inohe gbiati Baibiri na ngbanya dagba tihe na berewe a Baibiri na agu arengo rogoho du tipa birĩ-inohe nga gu du kia ti agu aida nangia ga gu dungu aboro naadu ti gu regbo i akehe tini.

•   Haurago na kina tonatonaha tini. (Bambata Pai 1:1) Ni gupai du kia ti gure, badungu agu apangbanga nadu bakuruyo nasakapai tipa haurago nga i aakusanga ha akusa te, ono tie baguzoro ahe du nadungura tihe kini ka kusa haurago. Ababero aidi kuti gupai nga agu ambori navungu haurago aye rogo abariwara-baime ue. Gu kura apangbanga kini pe gupai nga bakikii para du nakusi haurago.

•   Haurago nandu na a′uru du kuti agu andiko du tipa ahe, angianga ambori du du na ome kurii he ya. (Eyobo 38:33; Yeremaya 33:25) Agu apangbanga du rogo zegino nayugo gupai nga aboro adu zanga maabangirise mbata fu ariapai mangi na ti kura aregbo be gu gbegberẽ mangaapai nga ga ambori.

•   Kpotosende arunga riihe te. (Eyobo 26:7) Badungu agu aboro nadu kusayo aidi kuti gupai nga kpotosende ni kpasakpasa ha na si ru rii baiiriwo he watadu nya wa guru nga gbe wata däkädä.

•   Adi gbiati agugaabi ime nagbia ime ti gu uturo nakura rogo bariwara-baime na agu akuraha na tifuoho si kini ka na ku sende no ni mai, nduro watadu morogumba. (Eyobo 36:27, 28; Batungusipai 1:7; Yesaya 55:10; Amosa 9:6) Agu aGiriki nadu mbata aberẽ gupai nga adi aagbia ime be bariwara-baime du sende yo, na gi berãpai re andu ki da da rogo 18 kama agarã.

•   Abaagangara nata kura na kini ti, na agu abaagangara du areme re adu mbata bariwara-baime yo. (Atambuahe 104:6, 8) Kuba gure, badungu apangbanga nape gupai nga ambori du nakusa abaagangara rogo agu aba duhe rogoyo.

•   Pa giriso rago nabanda kpotose. Agu andiko i afuhe fu gu rikaaboro nangia aYisaraere aakoda agu arugapai nadu tipa zundabe ho boro anizadi kangba ni, kiso agu aboro ku dimo yo nani du na kere kaza, na kini kpisidi gu gbegberẽ rago boro animangihe. (Pa Amotumo 11:28; 13:1-5; Pa Fu Rugute ni Ue he 23:13) One tie, ziga sa dagba ga aEzipeto aziga i anaamangasunge nani ho i afu agu andiko re ni adu nga ho boro ani ho ni, i puta he na gbegberẽ rago ka maaha ku bangiri aro yo.

 Wene wisigopai nga ga Baibiri nayugo gupai nga karagapai kutini nga oó. Bete iraira abipai gere nga gu du tipa wai Baibiri afura tipa birĩ-inohe ni ruruhe:

 Ziree: Baibiri nagumba gupai nga i akusi haurago rogo a′uru sita nga gu du uru sa rogoho na asa rogoho 24.

 Rengo: Ringbisihe kuti Baibiri, Mbori akusi haurago bakuru kusayo ti gu regbo boro ainongo ho ya. (Bambata Pai 1:1) Na berewe, agu a′uru kusaahe i nafura tipaha rogo kapita 1 nga ga Bambata Pai i afuranga tipa bagizo agu aregbo si adihe te. Nirengo, gu bagizo regbo si adihe tipa i mbakadi kpotosende na ngbangbaturũ i nayambaha a nga “rago” watadu uru.—Bambata Pai 2:4.

 Ziree: Baibiri naya i akusi kurukuru ahe mbata fu kusa yo uru tipa kurukuru ahe naagbia gaha riahe behe.—Bambata Pai 1:11, 16.

 Rengo: Baibiri nayugo gupai nga uru, nga he sa dagba akerekuru yo du “ngbangbaturũ” yo, i akusihe mbata fu kurukuru ahe. (Bambata Pai 1:1) Gu imarago nga ga uru re ada ku auru kpotosende no ti bambata “uru” watadu regbo nga ga kusaahe. Wa rago aha rogo biata “uru” nga ga kusikusiahe, imarago aima rengba ka du na ome ka songoda kurukuru ahe si nagbia riahe. (Bambata Pai 1:3-5, 12, 13) Kusa du uru aye ka du gbaiga auru kpotosende.—Bambata Pai 1:16.

 Ziree: Baibiri nape gupai nga uru nake pati kpotosende.

 Rengo: Batungusipai 1:5 naya: “Uru nakura, uru ki niti, ki niipisi tihe ku rogo gu ba ha si nakura ni.” One tie, gi saka rogopai yo re gbua nayugo wai ani abi uru auru kpotosende nga si nandu. Zavura areme, boro ima rengba ka mangasunge na gu fugo nga “uru nakura” na “kini ti,” wa vura duhe vurũ nga ni ima ino gupai nga kpotosende du nake pati uru.

 Ziree: Baibiri nape gupai nga kpotosende ni kpasakpasa ha.

 Rengo: Baibiri namangasunge na gu fugo nga “digida sende yo,” anga gipai re nayugo gupai nga kpotosende ni kpasakpasa ha watadu si ru ri he te. (Amokedi 1:8) Wa kina gure a, gu fugo nga “biama durugaduruga kpotosende” nga fugo masaku nayugopa kpotosende naabaha dũ; areme boro ima rengba ka manga sunge na kina ngbatunga pa masaku wa gure tipa agu abangiriba biama du tipa kombasi.—Yesaya 11:12; Ruka 13:29.