1-3. (a) Gini aˈariapai rengbe kadu furani ni mbumbupai tipa ani mangihe fuo zio ani bapatiza? (b) Ka si kpakara furani ani mangi sonakumbatayo wa gu ani aaberãha, gini asanahe rengbe ani ka sanaha? (Oni bi agu asura du ti tonatonaha.)

FUO Kevin wiriki rengo, ko ^[1] aida kadu na wene pagume na Yekova. Ono tie, tipa dungu agarã, ko arimisitiko ku rogo baake, vugundö, kpibuda, na kini vu bangi. Tipa Mbori idi na Kevin, si aida ko mbu gu gbegberẽ amangapai ko amangaha re. Gere nga gupai ko mangihe nikido ko kuti Yekova na gu ome du Fugoko na ni tipa ka aria aboro.—Eb. 4:12.

² Fuo zio Kevin bapatiza, ya mo ko ambu manga ariapai rogo gako raka yo? Oó, ko adu kindi na sunge beko tipa ka mangaha nga sonosa agu asino nga ga aKristano na kaa kpuruwaha. (Ef. 4:31, 32) Ni kpiapai, ko abi gupai nga pa banda tiko ti bakere imisiri ngbaduse aima du ni kpakarapai fuko. Kevin aya, “Pa za tire ti bakere zinga aima kpakara fere ti gu kura gimi gbegberẽ mangapai mi aamangaha!” Bakere kparakpee na kakaka wisigo Ziazia Kekeapai naundo Kevin ko mangi ariapai.

 ³ A wa si adu tipa Kevin, dungu rani aima manga bakere ariapai mbata fu ani zi bapatiza tipa wa ka asino rani ndu sa na gupai Ziazia Kekeapai aidaha. Fuo bapatiza, ani abi gupai nga si naida ani naamanga ariapai amanga kindi rogo rukutu apai yo tipa ka wirika Mbori na Kristo wenengai. (Ef. 5:1, 2; 1 Pet. 2:21) Ni kpiapai, si rengbe kadu nga ani abi gu kerepai ku rogo rani yo du wa gunde be aboro, perimo, watadu gu kura ngbatunga arungbura. Ya mo pa manga ani ariapai rogo gi bangiriba re aima nyaka kisusi wai ani aaberãha? Kangia wo si adu, ani ima rengba ka berã nga, ‘Wa mi naima manga bakere aˈariapai, tipagine duhe ti ni ni mbumbupai fere tipa mi mangi rukutu aˈariapai? Ginipai rengbe mi ka mangaha tipa ka mbu Ziazia Kekeapai si mangi ariapai rogo gimi raka yo?’

4. Tipagine ani arengbanga ti ni ka fu ngbarago fu Yekova rogo apai dunduko ya?

⁴ Agurani ini Yekova na ki kpinyemuko naida ka manga gupai ko akpinyemuhe na kpotoraniyo dunduko. Ono tie, ka si vura du nga gu nyemupai re kina wai vurũ, gaani zangarengba nasaha furani ni mbumbupai ti aregbo dunduko tipa ani mangi gupai Yekova akpinyemuhe. Apai furani wakina gu naadu tipa gu mokedi nangia Pauro naya: ‘Kpinyemuhe du na mi sa, ono manga gu pai ngba angba adu nga ya.’—Rom. 7:18; Yak. 3:2.

5. Gini ariapai ani mangihe mbata fu zio ani bapatiza, ono gini rungbura rengbe ani arengba kindi kaa sota na ni?

⁵ Ani ima mbu gu mangapai nga ga ingapai rengbe ka sa rani ka ani dunga ni agu aKristano du rogo dungurati ya. (1 Kor. 6:9, 10) Wa vura duhe wo, ani kindi nga aboro ingapai. (Koro. 3:9, 10) Sidu tie, rẽ ngaha ani berẽ gupai nga fuo zio ani bapatiza watadu wa ani naima manga dungu agarã ku rogo riigbu, ani arengbanga ka manga irairapai, ka kota, watadu kadu ni fudifudi rani be gbegberẽ nduapai na nyemu manga gbegberẽ apai berewe ya te. Gu kura asino kinaho nika nyeanye tirani tipa dungu agarã.

6, 7. (a) Ginihe nasaha furani taata tipa ani du ni abakurea Yekova wa vura du ani na zangarengba? (b) Tipagine si aidanga ani ká ka sana Yekova ti ni tipa mbupai ya?

⁶ Gu zangarengba ani adihe ti avungurani arengbanga ka ká na ani ti du na wene pagume na Yekova watadu ka mangasunge fuko te. Ani makianga gipai re: Ho Yekova agbe rani koyo du ko ni, ko ima inoho nga ani aingapai ainga ti kura regbo. (Yo. 6:44) Wa duhe nga Yekova ima ino asino rani na gupai du ngbaduraniyo, ko aima ino gini ngbatunga zangarengba nga gu nika fuda rani afuda. Ko aima inoho nga ani ima rengba ka manga irairapai ti kura aregbo. Ono wa vura duhe wo, gipai re aakanga na Yekova ti kpinyemu ka sarani ni abakureako te.

⁷ Nyemuse afõngbadu Yekova yo ko fu bawene gamahe furani, nga gu motumo nga ga Wiriko. (Yo. 3:16) Ka si du nga ani saberã rani riimburu gi nyanyakipa gamahe re na ki gbata Yekova ko mbupai furani ho ani naingi ni, ani duadu na kido nga gaani pagume kindi na ko ni wenehe. (Rom. 7:24, 25; 1 Yo. 2:1, 2) Ya mo ani rengbe ka ká ka gbia undo be ga Yesu motumo mbiko ani nabi tirani nga ani na ingapai watadu ni bibiriko rani? Wa gusa te! Gure du wakina ka ani ká ka zunda berani ho duhe ni na biriko. Nirengo, ga Yesu motumo adu tipa aboro ingapai. Nairiwo gu bakere tambuahe du ani na ni tipa ga Yesu motumo mbiko ani rengbe kadu na wene pagume na Yekova ka si vura du nga ani na zangarengba vurũ.—Oni gedi 1 Timoteo 1:15.

8. Tipagine si aidanga ani bi gaani arungbura ti ni taata ya?

⁸ Kina rengo ngaha nga, si aidanga ani bi gaani arungbura na paha taata te. Pa sonosa ani gaani pagume na Yekova nakoda manga ome tipa ka wirika Ko gbiati Kristo wenengai  na kidu ni gu ngbatunga aboro i aida ani du nga yo. (Tam. 15:1-5) Si nakodapa manga ani ome tipa ka zatirani a ti gu nyemuapai nga ga zangarengba du tirani, na ki asadi ka nyasariipa ha ka gene du. Singia ani zi bapatiza barambeda watadu ani di dungu agarã ku rogo rengo yo, ani duwa ka ani “idihe i [ni]rugu” rani aruga kindi.—2 Kor. 13:11, New World Translation of the Holly Scriptures.

9. Wai du ini anihe nga ani ima rengba du na vovo borose ti aregbo dũ?

⁹ Si naida ani mangi ome amanga dedede i “rugu rani” tipa wa ka ani moi ‘vovo borose.’ Pauro atingidi akurako aidipase nga: “Tipa gu sino ungaroni nadu mbata, oni moi gu kuru boro ku sa yo, nazirã ku sangba gu nyemuahe yo nga nangahe. Oni dú ni vovo roni rogo gu toro yo nga ga gaoni berã, ki ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” (Ef. 4:22-24) Gu fugo nga ani ‘dú ni vovo rani’ nayugo gupai nga pa vo vovo borose nga gupai ani kaa mangaha amanga kindi. Gipai re nangarasa rani angarasa mbiko si nakido rani ka si vura du nga ani mangisunge fu Yekova tipa agarã wai vurũ, ani rengbe arengba ka manga sonakumbatayo ni manga ani agu asino nga ga aKristano na kini kpuruwaha, nga gu nika sarani ani du na vovo borose. Nirengo, Ziazia Kekeapai rengba arengba kaa aria gaani raka kindi.

10. Ginipai si aida ani mangihe tipa kaa manga ariapai amanga kindi vurube gu undo nga ga Ziazia Kekeapai, na gini asanahe rengbe ani ka sanaha?

¹⁰ Si naida ani mangi ome amanga ka si du nga ani naida ka mbugene fu Fugo Mbori si ni aria gaani raka. Ono tipagine si aida ani mangi bakere ome ti ni? Ka si du nga Yekova nafu maku kurii gaani asadatise, ya mo si aidanga sonakumbatayo rogo toro du taata te? Ya mo Yekova arengbanga ka dia gaani gbegberẽ nyemuapai kusayo ki saha furani taata ani mangi gupai du ni ruruhe te?

11-13. Tipagine Yekova aida ani mangi ome tipa ka diabe gaani arungbura ti ni?

¹¹ Ho ani aberã ni riipa wai Mbori ambakadi zegino, ani nabi gupai nga ko na bakere ome beko. Ni kpiapai, ko akusi uru na bakere ome ti ni na aregbo dunduko uru akusa imarago gbiati faaha. Wa vura duhe nga kina wiri betehe gbua nada furani auru kpotosende no, faaha gbiati gaha imarago rẽarẽ tipa ka undo raka auru kpotosende. (Tam. 74:16; Yes. 40:26) Yekova nafu ome afu gako amoyambu ho i aidaha ni. (Yes. 40:29) Nirengo, Mbori ima rengba ka fu ome furani ani dibe gaani arungbura dunduko zanga ani sota asota na ni watadu zanga ani du na nyemu gbegberẽ mangapai. Tipagine ko amanganga ha ti ni wo ya?

¹² Yekova ima fu gu bakere gamahe furani nga ranirii. Ka ani sia ka manga gupai Mbori akpinyemuhe na kini mangi ome nyanyaki tipa ka mangaha, ani nayugo bakio gaani nyemuse fu Yekova na wai du ani na nyemu ka fu ngbarago fuko. Ani nasongoda gako bakere pagbia a. Satana nasovura kuti ga Yekova rengo tipa ka zogarago, ho ani agiasangba Yekova ni, ani nayugoho nga ani naida ko du ni gaani Bazogo, na ani rengbe kadu na kido nga gu Barani du ngbangbaturũ yo re nabi gaani ome na nyanyakipaha. (Eyo. 2:3-5; Snz. 27:11) Ono tie, ho ani amanga omeni tipa ka zatirani ti gaani arungbura ka si vura du vurũ nga si taata ka mangaha te, gure nga ani niruru rani fu Yekova na si nayugoho nga ani naida ko du ni gaani bazogo.

¹³ Rogo gi gene re, Yekova nape gupai furani nga ani mangi ome “nyanyaki” tipa ka sonosa agu asino nga ga aKristano. (Oni gedi 2 Petero 1:5-7; Koro. 3:12) Ko naida ani mangi ome nyanyaki tipa ka banda gaani  aberã na gaani abipai. (Rom. 8:5; 12:9) Ka ani mangi bakere ome rogo gi bangiriba re, ani nadu na bakere ngbarago ho ani abi gupai ni nga Ziazia Kekeapai kindi naˈaria gaani raka.

14, 15. Ginipai rengbe ani ka mangaha tipa ka sonosa agu asino Yekova akpinyemuhe? (Oni bi gu sanduki nga “ Ziazia Kekeapai na Kparakpee Naaria Gayo Raka.”)

¹⁴ Ginipai rengbe ani ka mangaha tipa ka sonosa agu asino nga ga aKristano na ki sa ngbarago ti Yekova? Si naida ani mangi ome ni bakerehe kisusi gupai gbua nga ka mbakada asino rani. Si naida ani mangi ome na ki pekefuo ga Mbori arugute mbiko ARomo 12:2 naya: “Ka oni ríngbisi nga tironi na gi zegino re ya, ono oni sá tironi asa ni mbakada berãroni berewe, oni kpária pa gu he nga ga Mbori nyemu he du ni wene he, nzunzu, ni ziazia ha.” Yekova naundo rani ani ini gupai ko akpinyemuhe vurube Fugoko na ziazia toro, na si naˈaria gaani raka tipa ani rengbe kada ti gupai ko aidaha. Gu ome ani mangaha nakoda geda Ziazia Kekeapai, berãkurii averesi, na kini kpari tipa ziazia toro. (Rk. 11:13; Gara. 5:22, 23) Ka ani degeturani kuti gu ngbembatayo nga ga ga Mbori ziazia toro na kini mbu gaani aberãpai si ndu sa na ga Yekova abipai a wa duhe rogo Fugoko yo, gaani aberãpai, afugo, na mangaapai nika fu ngbarago fu Mbori. Na ka si vura duwo, si naida ani bandatirani ti mbu tirani fu arungbura.—Snz. 4:23.

¹⁵ Kupati geda Ziazia Kekeapai na aˈuru dunduko, si naida ani wisigi Fugoko kodihe na gaani awaraga nga ga aKristano na gu berãpai nga ani naida ka wirika ga Yekova wene asino. Gu kura aboro narogoda averesi na gu kura kekeapai rogo Ngbaõbambu Sinziri na Awake! tipa kaa fugoho ti gu kura aregbo, gbe agu du ni wenehe tipa ka sonosa agu asino nga ga aKristano watadu ka dia be arungbura.

16. Tipagine si aidanga ani du na gberãrago ti ni ya ka si du nga ani arengbanga ka amanga aˈariapai ni ipo te?

¹⁶ Ka si du nga mo asonanga rogo toro yo ni ipo te, mo tingidi gupai nga sona rogo toro yo nadia regbo adia. Pa sonosa agu asino nga ga aKristano nga gupai ani kaa mangaha amanga kindi. Si naida ani du na kina hipai wa ani ambu Ziazia Kekeapai tipa si ni mangi wene ariapai kindi rogo gaani raka yo. Ti bambataha, si ima rengba ka ida ani rugutirani tipa ka manga gupai Ziazia Kekeapai aya si du ni ruruhe. Fuo bete regbo, si ima rengba kadu furani taata tipa ani berẽ na kini mangipai wa aKristano, na aberã rani gbiati gaani mangapai ki tona kadu yeeye wakina ga Yekova Mbori.—Tam. 37:31; Snz. 23:12; Gara. 5:16, 17.

17. Ka ani du niruru rani fu Yekova, gini wene maabangirise kumbatayo rengbe ani ka ngera tipaha?

¹⁷ Ga Yekova amoyambu du niruru yo nika du na momu tipa ka mangasunge fuko nyeanye kindi ni rengberengbe yo. Ti gu regbo re, pa manga asino Mbori adunga ni mbumbuhe berewe te, ono si nika du ti aregbo dunduko ni pa ngbarago. Ono wa du rago re, ani na tambuahe tipa ga Yesu motumo mbiko si naza gene furani ani irisi gaani Mbori. Wa vura duhe nga ani na zangarengba awere, si naida ani mangi ome tipa ka mbu Fugoko si mangi ariapai rogo gaani raka yo.

18, 19. Wai du rengbe ani kadu na kido nga Ziazia Kekeapai na ome behe tipa kaa aria gaani raka aˈaria kindi?

¹⁸ Kevin ani nifura tipa ko ti tonatonaha, ko amangi ome ni bakerehe tipa ka za tiko ti bakere zinga. Ko aberẽkurii agu arugute nga ga Ziazia Kekeapai, na ki di gu undo na arugute akurako aKristano afuhe fuko. Vuru agu agarã susi, Kevin ima manga bakere ariapai. Niyangaraha, ko arẽ tipa ka mangasunge moundo abaakumba, na tipa agarã 20 kusayo, ko mangisunge ni bakumba rogo dungurati. Wa vura duhe wo, ko nabihe nga si naida ko banda tiko abanda ko andu ka kota rogo toro yo.

¹⁹ Ga Kevin kpiapai nayugo gupai nga Ziazia Kekeapai naundo ga Mbori aboro i nimangi wene ariapai rogo gayo raka yo. Sidu, ka ani henga mbugene fu Fugo Mbori tipa si nimangi ariapai amanga kindi tirani ya na ki ye na ani ku rogo wene pagume na Yekova ya. (Tam. 25:14) Wa ani ka bi ga Yekova amaku kurii gaani manga ome, si nika yugoho gbaiga nga Ziazia Kekeapai rengbe arengba kaa aria gaani raka aaria kindi.—Tam. 34:8.