1. Gini gene wisigopai Wiriba Russell gbiati abakureako anaamangaha, na tipagine si adu ti ni ni wene gene wisigopai?

AGARÃ susi kama kusayo, Wiriba C. T. Russell gbiati abakureako, nangia umba badona nga ga abawiriki Fugo Mbori atona kaa dunguratiyo ku rogo ba sa. I aaida ka bihe singia i rengbe ka wirika gupai Ziazia Kekeapai ayugoho nzunzu tipa Yekova Mbori, Yesu Kristo, gupai ninaamanga ho boro akpi ni, gbiati motumo tumorii. Gayo gene wisigopai aima du taata. Boro anisanahe tipa pai, fuani, gu badona aboro re kini wisigi ai gu veresi du na ngbanya dagbaha na gupai re. Ni yangara tie, i kini ke agu apai sande i nawirikihe rogo gayo wetekaapai yo. Mbiko gu undo nga ga Yekova, agu akumba re aye ka ino badungu nyanyakipa arengo nga gu ani abihe areme na nyanyakipaha.

2. Ginipai rengbe ka sa gupai ti kura aregbo nga ani girogo sangbanebi yo nga ga Ziazia Kekeapai ni irairaha?

² Ono tie, fuo regbo ngbutuko, agu Abawiriki Ziazia Kekeapai re arugutiyo na gupai nga si ima du ni mbumbuhe gbe ka rugatise na sangbanebi nga ga Ziazia Kekeapai kisusi ka rugatise na bangua yugopai nga ga Ziazia Kekeapai. Tipagine duhe ti ni wo? Ndupai sa nga, ani ninaagia rogo agu asangbanebi yo dedede nga ga Ziazia Kekeapai wenengai ho si adigisotihe ni watadu tingbafuo si nadigisi tihe. Ono gu kura ndupai kinaho berewe. Tipa ka rugatise na sangbanebi wenengai, si naida ani wisigi gu sangbanebi re naabaha dunduko. Ka ani gbeberã rani kina kuti bangisa papara sangbanebi na ki mbupa gu kura apaparaha, ani ima rengba kadu na iraira giarogopaiyo tipaha. Na si nawira gupai nga si nga gupai niidu tipa sangbanebi sa rogo gu buku yo nga ga Yoere. Ani wisigingo gu sangbanebi re na ki sakipai tipa ndu gupai si aida ani aria gu gene ani agia rogoyo ngbaha ti ni.

3-4. Dakuti gi regbo re, waigu ani naamangasunge na gu sangbanebi du rogo Yoere 2:7-9?

 ³ Oni gedi Yoere 2:7-9. Yoere ape gupai kumbatayo nga ndurumo ayere nika gbarasa ringara Yisaraere. Si adu nga agu ayere du na rindira gbiati gburukara wakina ga abahu re nika rita kurukuru ahe dũ vuru Yisaraere! (Yoe. 1:4, 6) Tipa dungu agarã, ani naamangasunge na gu sangbanebi re nibipa gu gene ga Yekova aboro amangasunge tungusapai ngbaha wakina gu ndurumo ayere ka i arugusanga ra ya. Ani adu na gu giarogopaiyo nga gi sunge re na bakere asangbanaha kurii gu “ringara,” watadu agu aboro du kutiibe abarumbatayo rogo pambori. *

⁴ Gi sakarogopaiyo re ima rengba kaa ngera ni ruruhe ka ani ageda kina gupai sa du rogo Yoere 2:7-9. Ono tie, ho ani aberã ni wenengai kurii gu sangbanebi re naabaha dunduko, ani naye ka bi gupai nga si naida ani du na gu giarogopaiyo tipaha du kia. Ani wisigingo nduapai biama du gipai re ti ni wo.

5-6. Gini sanahe nakura ho ani ageda agu averesi ni nga (a) Yoere 2:20? (b) Yoere 2:25?

⁵ Ni bambatapai, oni bingo ga Yekova kidohe nibipa ndurumo ayere, ko aya: ‘Mi agbísa agu aboro du ku nodiyo [ayere] tuturũ ti roni.’ (Yoe. 2:20) Ka si du nga ayere narukuba aDezire Yekova wa i agiasangba ga Yesu rugute ka tungusapai na ka sa aboro ni abawiriki, tipagine ka Yekova akidohe ti ni ka gbisa yo tuturũ kusayo? (Yeze. 33:7-9; Mt. 28:19, 20) Si tie ziazia nga, Yekova agbisanga gako ruru amoyambu kusayo te, ono ko nagbisa guhe watadu gu boro kusayo namanga gako aboro gbegberẽ.

⁶ Tipa ka ino ue ndupai, oni berẽnga kurii gupai du ni kekehe rogo Yoere 2:25. Yekova nape gupai yo nga: ‘Mi akáraga garã agu ahe fu roni gugu ayere ari, abakirigba, na ayere gbarasangbi, na ayere a, nga gi bakere rimbasa aborosovura, nga gu mi akedi ku dagba roni.’ Oni bi gupai nga Yekova nakidohe nga ko nika ‘karaga garã agu ahe’ watadu ka tumo tipa agu ahe ayere nagberesi paha. Ka si du nga ayere narukuba atungusipa Kindo, gere rengbe kadu nga gu pangbanga i atungusaha nagbarasapa ahe agbarasa. Ono tie, gu pangbanga nayugo gene bata re ima rengba nzunzu ka fõngbadu kura gbegberẽ aboro yo i saberã yo. (Yeze. 33:8, 19) Nairiwo gu pa maku rengbehe kadu ngaha re fuyo!

7. Gu fugo nga ‘si ayé ka du wa gere giza’ du rogo Yoere 2:28, 29 naundo rani ani rugutirani na ginipai?

⁷ Oni gedi Yoere 2:28, 29. Biata ndupai nabipa wai agu apai du rogo gu sangbanebi re amanga ti genehe. Ya mo oni nibi gupai nga Yekova aya: ‘Si ayé ka du wa gere giza, ya mi aúka torore ku ri aboro dunduko’; naida ka ya, giza tingbafuo ayere nyasi gu sunge si adu nga ami mangihe? Ka si du nga ayere nga atungusipa ga Mbori Kindo, tipagine rengbe Yekova ka uka gako toro ti ni kurii yo giza tingbafuo nyasa yo gayo manga dezirepai? Gu rengo duho nga, zanga gu undo nga ga gu ome nga ga ga Mbori ziazia toro, ka i rengbenga kaa tungusapai kindi tipa dungu agarã ti regbo arungosiro na zavura ti agu aregbo i naima rugusa gayo asunge te.

8. Ada agu ayere i nafura tipa ra rogo Yugoti 9:1-11 arukuba yo? (Oni bi gu sura duti kpotoho.)

⁸ Oni gedi Yugoti 9:1-11. Awere tie, ani bingo biama ndupai. Mbata kusayo, ani anaape gupai nga gu ndurumo ayere i nafura tipa ra rogo Yoere aarukuba gaani sunge tungusapai mbiko gupai nga sangbanebi kinaho wakina gure rogo gu buku nga ga Yugoti. Gu  sangbanebi re nafura tipa ndurumo ayere nga agura du na kpakpura wakina kpakpu aboro na ‘akpakpari kidu rira yo wa dahabu.’ (Yugo. 9:7) Ami narungosi “agu aboro [avura Mbori] adu nga na gu nogodinogodi he nga ga Mbori ngbanda kpakpuyo ya” tipa adiwi bisue, nga gu bagizo regbo yere naaraka tipaha u ki kpi. (Yugo. 9:4, 5) Nirengo, gipai re nafura tipa ga Yekova mbedimbedi amoyambu. I natakapande pa ga Mbori sarangbanga kuti gi gbegberẽ sino raka re, na gipai re nasa agu aboro dunduko nasongodaha ka i dunga wenengai ya.

9. Gini nyanyakipa kparakparaapai duho dagba agu ayere Yoere abira na agura Yoane afura tipa ra?

⁹ Wa vura duhe nga i fura tipa agu asangbanebi du tipa ayere rogo Yoere na rogo Yugoti, nyanyakipa kparakparaapai kina dagbaha. Oni bingo gipai re: Rogo ga Yoere sangbanebi yo, ayere nagbarasapa kurukuru ahe. (Yoe. 1:4, 6, 7) Rogo ga Yoane yuguyugupai yo, i ya fu ayere “ka ami só nga gu nvuo du auru kpotosende ya.” (Yugo. 9:4) Agu ayere Yoere abira aye Nodiyo. (Yoe. 2:20) Agura Yoane abira aye rogo gu due zanga mburuhe. (Yugo. 9:2, 3) Agu ayere Yoere afura tipa ra, i nagbisa ra kusayo tuturũ. Rogo Yugoti, i agbisanga ayere kusayo te, ono i nambu ra ami nyasi gaami sunge. Pai ho nayugo gupai nga Yekova aidanga na yo te te.—Oni bi gu sanduki nga, “ Agu Asangbanebi Du Tipa Ayere—Gu Nyanyakipa Kparakparaapai Du Dagbaha.”

10. Oni funga kpiapai nga ga Ziazia Kekeapai nga gu nayugo gupai nga agu ayere Yoere afura tipa ra gbiati agura Yoane afura tipa ra ima rengba ka rukuba apai ni bakiakia.

 ¹⁰ Gu nyanyakipa kparakparaapai du dagba agu asangbanebi ue re nasarani ani da kuti gu digisopai nga ngbanya dagbaha te. Ya mo ani nape gupai nga agu ayere Yoere afura tipa ra kia ti agu ayere du para rogo gu buku nga ga Yugoti? Ii. Rogo Ziazia Kekeapai yo, kura aregbo kinaho du gupai naru kuba kura pai na rogoyo kia ho i amangasunge ni na ni rogo kura gene kia. Ni kpiapai, rogo Yugoti 5:5, i nayamba Yesu yo nga “gu Bahu nga ga ngbatunga aYudo ru,” ono rogo 1 Petero 5:8 tigaha, i fura yo tipa Bakitingbanga ki ya ko wakina gu “bahu nata ki nipoi.” Agu apai biama ani nasakipai tipaha nayugo gupai nga si naida ani gbia kura sakarogopai yo tipa gu sangbanebi nga ga Yoere. Gini sakarogopaiyo du?

11. Waigu Yoere 1:6 na 2:1, 8, 11 aundo rani ani ini ada nga ayere?

¹¹ Ho ani awisigo gu kura averesi ni du rogo ga Yoere sangbanebi, ani naruga tirani na gupai nga gu nebi re aafura tipa gu zubohe nga ga abanzengere. (Yoe. 1:6; 2:1, 8, 11) Yekova ape gupai nga ko nika mangasunge na gako “bakere rimbasa aborosovura” (agu abanzengere nga ga Babera yo) tipa i fu mbusa fu agu aYisaraere naangianga aboro giasangba ya. (Yoe. 2:25) Si rẽarẽ i yambu agu abasovura re nga “agu aboro du ku nodiyo” bambiko gupai nga si adu nga aBabero nika zio Yisaraere nodiyo. (Yoe. 2:20) I naringbisa gu rimbasa abasovura re kuti gu ndurumo ayere du ni mbakadimbakadi ra wenengai. Yoere afura tipa yo ki ya: “[Agu abanzengere re] nandu ni ba sa sa ti kina gayo agene. . . . I nagu ku ri bakporo, i naora ri ngapa bakporo. I nabita ku rogo abambu, i narima ti abangiri abambu wa iradĩ.” (Yoe. 2:8, 9) Ya mo mo rengbe ka bi kpia gipai re berãro yo? Abanzengere rogo aba dunduko. Ba ho rengbe boro ka gbu ku rogoho te. Boro ho rengbe ka bata be gu basape nga ga aBabero te!

12. Wai du gu ga Yoere sangbanebi du tipa ayere adigisitihe?

¹² Wakina ayere, aBabero (watadu aKasado) azi Yerusarema rogo 607 Mbata fu Batikayo Kristo. Ziazia Kekeapai nafu gu tingidipai nga: ‘Gu bakindo nangia ga aKasado ko, naaimi paranga awiriyo ni basape aadunga na nunga aparanga akumba na paranga ade ti ko te, na nunga kuru boro na gbinza boro a te. Yekova ki fu yo dunduko ku be ko. Ko azokodi ga Mbori bambu, ki kuadi ngapa bakporo Yerusarema dunduko ku sande, ki zokodi gu nyanyaki aba dunduko naadu yo ni we, ki gbarasi gaha bawene aũsunge dunduko.’ (2 Peka 36:17, 19) Ho aBabero anyasi gbarasa gu ringara re ni, aboro anaaya: “Si nga vurubate, zanga boro watadu nya; i fu he ku be aKasado.”—Yere. 32:43.

13. Oni sakingo rogo gupai yo du rogo Yeremaya 16:16, 18.

¹³ Agarã wa 200 tingbafuo ga Yoere sangbanebi, Yekova amangisunge na Yeremaya tipa ko pe gu kurapai kumbatayo tipa gi zubohe re. Yekova ape gupai nga agu aboro naaye ka zubo Yerusarema re nika ta tipa agu aYisaraere sirisiri namangi gbegberẽ apai na ki zi yo dunduko. “‘Oni ngére, mi nakeda sunge tipa dungu abaziatiõ, wo poi Yekova, i azía yo. Mi ki kedi sunge giza tipa abamangi anya, i ki nigbata yo ri abaagangara yo ni ba sa sa na ri agangara na rogo siambia yo. Mi ki fu mosoro tipa gayo irairapai bara ue na tipa gayo ingapai.’” Bariwara-baime ho watadu bure naarengbe ka batasa agu aYisaraere naasanga berãyo re ya be aBabero te.—Yere. 16:16, 18.

14. Ti gini regbo du Yoere 2:28, 29 adigisitihe?

¹⁴ Yoere na wene pangbanga ngbako nga ga karaga apai berewe kubaha. Ringara nika zugo azugo berewe. (Yoe. 2:23-26) Sidu, tingbafuo gure kumbatayo, regbo aduadu ho riahe nga ga toro nika du kpaima. Yekova aya: “Mi aúka torore ku ri aboro dunduko, awironi nga akumba na agu awironi nga ade i ki nigumba pai . . . Mi aúka torore a wo ni gu arago re, ku ri akanga nga akumba na ku ri agu akanga nga ade.” (Yoe. 2:28, 29) Gipai re aamanganga nibasa fuo aYisaraere kuru Babera yo ki ga ku rogo gayo ringara te. Kuba gure, si amangi fuo akama agarã kusa, rogo gu garã nangia 33 Fuo Batikayo Kristo rago Pendekote. Ani naino gipai re wai?

15. Ringbisihe kuti Amokedi 2:16, 17, gini ariapai Petero amangihe ti agu afugo du rogo Yoere 2:28, na ginipai gupai re ayugoho?

¹⁵ Ga Mbori toro adu kugii gu mokedi nangia Petero ko ki mangisunge na Yoere 2:28, 29 nibipa gu iiriwopai namangi rogo gu uru nangia ga Pendekote. Bara saa ribua rogo gu wiso re, Mbori auka gako ziazia toro, na agu aboro naagbiaha ki tona gumba “agu apai du na tandu nga ga Mbori.” (Amo. 2:11) Ga Mbori toro adu kugii Petero ko ki mangisunge na agu afugo naadu kia tooni ho ko aafura ni tipa ga Yoere sangbanebi. Ya mo mo bi gu ariapai ko amangihe? (Oni gedi Amokedi 2:16, 17.) Kuba gupai nga Petero tona agu afugo re na gu fugo nga “si ayé ka du wa gere giza,” watadu giza tingbafuo gure, ko amangisunge na agu afugo nga: ‘Ti yangara rame,’ na gu yangara arame ko aafura tipaha re angia gu yangara arame nga ga ga aYudo sino raka. Si adu nga ti gu regbo re, i nika uka ga Mbori ziazia toro “ku ri aboro dunduko.” Gipai re nayugo gupai nga bakere regbo aima susa ga Yoere sangbanebi kini ru ka digiso tihe.

16. Gini sangbanapai ga Mbori ziazia toro adu na ni kurii sunge tungusapai rogo bambata sa kama agarã, na gini sangbanapai duhe na ni kuriihe areme?

 ¹⁶ Tingbafuo Mbori uka gako toro kurii agu aKristano naadu rogo bambata sa kama agarã, i atona sunge tungusapai nga gu si adu nga fuo regbo kusa, si nika manga rogo zegino dunduko. Ti gu regbo gu mokedi nangia Pauro ake gako waraga fu aKorosaio bara rogo gu garã nangia 61 Fuo Batikayo Kristo, ko aima rengba ka fura tipa wene pangbanga ki ya i ima tungusaha “rogo arago tii ngbangbaturũ yo dũ.” (Koro. 1:23) Ho Pauro aya ni wẽ, “arago tii ngbangbaturũ yo dũ,” si aayugo pa agu apapara zegino Pauro na kura aboro anidu na rengba ka ndu ku rogoho. Mbiko gu undo nga ga ga Yekova ziazia toro du na ome ti ni, sunge tungusapai ima gbandaka ti gi gaani regbo re ni bakerehe kisusi ki da ku—“digida sende yo”!—Amo. 13:47; oni bi gu sanduki nga “ Mi Aúka Torore.”

17. Waigu i naˈaria gaani giarogopaiyo tipa gu sangbanebi nga ga Yoere du tipa ayere?

¹⁷ Ani awere na ndikidi giarogopaiyo tipa gu sangbanebi du rogo Yoere 2:7-9. Ka pepai ngba taata gene, agi averesi re afuranga tipa gaani zaaza sunge tungusapai te, ono si nafura tipa gu mangaapai nangia ga agu abanzengere nangia ga Babera yo, nga aguyo nazi Yerusarema rogo gu garã nangia 607 Mbata fu Batikayo Kristo.

18. Ginipai aˈarianga tihe tipa ga Yekova aboro ya

¹⁸ Si ni rengo nga gaani giarogopaiyo tipa gu sangbanebi du rogo Yoere 2:7-9 ima ariatihe, ono gaani kakaka nyemu tungusapai aˈarianga tihe te. Ga Yekova aboro nandu kindi kumbatayo kaa tungusa wene pangbanga rogo aba dunduko, ni mangayo sunge na ai gu gene duho. (Mt. 24:14) Zogarago ho rengbe ka ká na ani ti manga ani pai kuti gu zinahe du tipa sunge tungusapai te. Na mbiko gu undo nga ga Yekova, ani namangasunge zaaza kisusi gu naadu mbata, kini tungusi gu wene pangbanga nga ga Kindo ni ngarã! Ani nandu kindi kumbatayo kaa ngera koyo du Yekova ni tipa ko undo rani ani rugutirani na gu sangbaanebi nga ga Ziazia Kekeapai, bambiko ani na gu kido nga ho gu regbo rẽarẽ nika da ni, ko nika ngbe furani kumbatayo “sa rengo dunduko”!—Yo. 16:13.