• Mbori nika siako. “Mi moi gi bakindo . . . mi afu arikaaboro foro ni gamo ũkumbo, na digida kpotosende yo ni gamo.”—Atambuahe 2:6, 8.

• Dikumbo Bakindo Davide. “Bambiko i vungu gude fu rani, i fu wiri fu rani nga kumbagude . . . Kia pa gako zoga aboro na pa zereda digidaha adú nga ti ni te, auru ga Dawidi mbatabakindo, ku ri gako ngbi, ka nyakasa ha.”—Yesaya 9:6, 7.

• I Avunga ko Betereme Yo. “Ako Betereme . . . , boro ayé yo du mo ni tipa re nikadu ni bazogo . . . ko adú awere ni bahe ki da ti digida kpotosende.”—Mika 5:2, 4.

• Aboro Asoga ko na ki Imi Ko. “I apayasi ko wa gu boro i nioko kpakpuse ti ni, ka ani aberã nga pa pa ko ya. . . . Ono i ahogi ko tipa gaani samungu, i aimisi ko tipa gaani irairaapai.”—Yesaya 53:3, 5.

• I Azingisi ko be Kpio na ki Tumbasi pa Ko. “Mo ambu nga mbisimore ku Baatoro kpikpi aboro yo te, mo afu nga ga ziazia ko, ko bi zirã a te. . . . Rogo kumbabero du aũngbarago ni nye anye kindi.”—Atambuahe 16:10, 11.

Rogo gu pangbanga nga ga aboro, kina bangisa boro sa agu apai re amangi tipa ni, gu boro re nga Yesu Kristo. Nirengo, maraika agumba gupai fu Maria nangia na Yesu nga: “Mbori amáa ko ni bakindo a wa titako adu nangia Dawidi, . . . gako ngbi adíga nga te.”—Ruka 1:31-33.

Yesu aadanga ni Bakindo auru kpotosende ane te. Kuba gure, si adu nga ko nika zoga aboro ngbangbaturũ yo ni Bakindo ga Mbori Kindo. Ginipai nasa Yesu ko du ni wene Bakindo? Ani sakingo pai tipa gupai Yesu amangihe ho ko adu ni auru kpotosende ane.

•   Yesu angerefuo aboro. Yesu aundo akumba na adee, paranga aboro na gbinza yo, zanga bipa agu apai naadu tipa yo. (Matayo 9:36; Marako 10:16) Ho boro ngbataka azungodi ko ni nga: “Ka mo kpi nyemu he, mo húsi re ahusa,” nunga asa Yesu ko husi ko.—Marako 1:40-42.

• Yesu ayugupai furani tipa wai ka sa ngbarago ti Mbori. Ko aya: “Ka oni ata ra nga fu Mbori nira fu ũzegino a te.” Ko agumba gupai a nga si naida ani mangipai fu kura aboro kina wai ani aida i mangipai furani—nga gu bangua rengo i ayambaha areme nga Gu Rugute Duwa Dahabu. Kurigure, ko ayugupai a nga Mbori na nyemu gupai ani aberãha na gaani abipai angianga kina agu apai ani amangaha ya. Sidu, tipa ka sa ngbarago ti Mbori, si naida ani du na zatise nibipa agu apai ani aberãha kpotorani yo. (Matayo 5:28; 6:24; 7:12) Na ko anyakasi gupai nga tipa ani du na ngbarago nzunzu, si naida ani wirikipai tipa gupai Mbori aida ani mangihe na fuoho ani ki mangihe.—Ruka 11:28.

• Yesu ayugupai tipa kpinyemu kura aboro. Afugo Yesu na agu apai ko aamangaha adu na bakere ome ti ni na si ki zi ngbadu agu aboro yo naadegatuyo fuko. “Gako yugopai airiwo ti arimbasa; bambiko ko ayugu pai fu yo wa gu boro du na tandu.” (Matayo 7:28, 29) Ko ayugupai fuyo nga: “Oni kpí nyemu avuraroni.” Ko amangi kparakpee a tipa agu aboro naadu kugii pa imoko: “Buba, mo vú yo; bambiko i aina nga gu pai i amanga te re.”—Matayo 5:44; Ruka 23:34.

Yesu ima rẽ nzunzu tipa ka du ni gu bazogo zegino nafu undo fu aboro na du na wenesino. Ono gini regbo du ko nika tona zogarago?