MO MAKIANGA gupai berãro yo nga, mo nandu rogo bitimo nziinzii rago rogo kura nyemu sa. Wa vura duhe nga uru ni ima ti, mo abakanga bangiro te, mbiko baro kina be ro. Ho mo atiga ha ni ku sande, mo nabi rago abi ziazia barabangiro. Na ho mo atiga ha ni kumbatayo, si nahasa gene foro mo ki ningere nga tuturũ.

Ngba kura agene, Ziazia Kekeapai wakina ngbatunga gu baro re. A wa ani nibihe rogo agu kekeapai ni du kusayo, Fugo Mbori rengbe ka undo rani ani mangipai kuti gupai du nibasa barabangirani—agu akpakarapai nga ga aˈuru ni basasa ani agbia tirani na ni rogo gi zegino re. Ono Ziazia Kekeapai namangapai susi gu re. Si nahasa rago furani tipa agu apai du kumbatayo, ka sa rani ani bi gu gene kumbatayo rengbe ka ndu na ani sa nyenye ngbarago na rengba be pai. (Atambuahe 119:105) Ngba gini gene?

Ani wisigingo agene ue nga gu Ziazia Kekeapai afu ndikidi maabangirise ngbaha furani tipa kumbatayo: 1 Si naundo rani ani du na amaabangirise, na 2 si nayugopai furani tipa wai rengbe ani ka sonosa nyenye pagume na Bakusirani.

Ziazia Kekeapai nafu arugute furani tipa wai ka mangapai kuti gaani akpakarapai, ono tie, si ima susa gu kungbo akitabu nga ga arugute. Kuba gupai nga si ni ngarasi rani tipa ani ni moiberãrani kina kuti gaani abakabangirise, Ziazia Kekeapai nayugopai furani tipa ani rugu tirani na gupai nga, kura apai kinaho nyakipaha kisusi pa agu apai ani akpinyemuhe. Gaani raka rengbe ka du na rogoyo ti ni, kina gu ka ani rugu tirani na gupai re.

Ani dinga kpiapai nga ga gi bangua rengo nga ga Ziazia Kekeapai re: “Fu he ngba ti dia ha.” (Amokedi 20:35) Ya mo mo natingidanga pa gu regbo mo aundo gu boro du na zingo aũborose? Watadu si rengbe ka du nga mo adege turo fu bakureamo ni ni kusuko agu apai du ngbaduni yo foro. Ya mo mo aagbianga ngbarago ti undo mo ni ni gbia wasa rogo gu uru re te?

Ani nagbia bakere ngbaro ho ani afuhe ni zanga berã gupai nga boro fuhe furani kubaha. Kura Bake  buku sa aya: “Gu wene gene rengbe boro ngbaha ka fuhe ki gbia mosoro kubaha susi gu ni afuhe—nga ka fuhe zanga berã gupai nga mo naida mosoro tipaha.” Ono tie, ho ani afuhe ni—gbe, fu agu aboro adunga gene beyo ka mangapai furani kubaha ya—ani nagbia mosoro agbia. Ani nadu na gu bipai du Yekova na ni. Gure nga ani namangasunge sa na Bakusirani, nga gu ko nabi ngbatunga gu mangapai nga ga nunga re wa ka i ya ani nafu he ko. (Asanza 19:17) Ko nabi gupai ani amangaha fu rungorungo aboro na nyanyakipaha, na ko nakidohe ka fu nyenye unga furani rogo paradizo auru kpotosende—nga gu bawene maabangirise tipa kumbatayo!—Atambuahe 37:29; Ruka 14:12-14. *

Gu susi nga, Ziazia Kekeapai nayugo gupai furani nga, ani ima rengba ka du na gu raka du na rogoyo ti ni ka ani airiso ndikidi Mbori nga Yekova. Fugoko nangarasa rani ani fu taarimo, iriso, na kini gi sangbako. (Batungusipai 12:13; Yugoti 4:11) Ho ani amangaha ni wo, gure nga ani namanga gupai du na nyanyakipaha kisusi: Ani nasa ngbarago ti Bakusirani. Ni rengo, ko nazinahe nga: “Mo dú ni iratatamana, ka fu ngbarago fu kpotore yo.” (Asanza 27:11) Mo berẽnga kurii gupai re—ho ani amanga diaberã ni ni tatamana ringbisihe kuti agu abangua rengo nga ga Ziazia Kekeapai, ani naye na ngbarago ku kpoto gu Barani nga boro nyemuse du ngbangbaturũ yo. Tipagine? Bambiko ko naberã pa rani na ko naida ani gbia undo ti pekafuo gako arugute. (Yesaya 48:17, 18) Nirengo, pai ho rengbe ani ka mangaha kisusi gupai nga, ka iriso Bakere Bakindo nga ga haurago ko na kini raki ngba gu gene nafu ngbarago ku kpotoko yo te.

Ziazia Kekeapai nayugopai furani a tipa ani sonosi pa bakure na Bakusirani. Si naya: “Oni mbédi na Mbori, ko ki mbedi na oni.” (Yakoba 4:8) Ti kura aregbo, ani ima rengba ka bakabangirani si ngia ani rengbe ka du nzunzu ni bakurea gu Bakusiahe du na tanduapai dũ. Ono Ziazia Kekeapai nakido rani nga, ani ‘gbata Mbori,’ ani ki ‘rugu tirani na pako,’ mbiko “ko aturã nga na ani wa sa te.” (Amokedi 17:27) Gu zinahe Ziazia Kekeapai afuhe tipa ani du ni bakurea Mbori na undo ti ni furani tipa gaani raka ku mbatayo. Ngba gini gene?

Ani makianga gipai re: Ka ani vura asada aasada wai vuru, boro ho dagbarani ka ne gu bakere vura rani nga Kpio te. (1 AKorindo 15:26) Ono tie, Mbori nyeanye kindi. Ko akpingo te, na ko naida abakureako raki nyeanye kindi a. Ni mangasunge na gi taata afugo re, Ziazia Kekeapai nasaka gupai Yekova aidaha tipa agu aboro nagbata ko: “Kpotoroni yo nye anyé ni unga kindi.”—Atambuahe 22:26.

Wai gu rengbe mo ka sonosa ngbatunga gu nyenye pa bakure re na Mbori? Mo nindu kina ku mbatayo kaa wirikapai tipa ko rogo Fuko yo nga Ziazia Kekeapai. (Yoane 17:3; 2 Timoteo 3:16) Mo gbata gako undo tipa ka gia rogo Ziazia Kekeapai yo. Ziazia Kekeapai nakido rani nga, ka ani ‘a sána Mbori’ tipa tatamana, ko fuhe afu furani. * (Yakoba 1:5) Ni yangaraha, mo mangi ome tipa ka mangapai kuti gupai mo awirikaha, ki nimbu Fugo Mbori si hasi rago wa ‘baro tipa nduro’ na wa ‘imarago ngba ga gene’—awere na nyeanye kindi.—Atambuahe 119:105.