Asanahe be Agedihe
Da du nga gu “dee” i napepa ri rogo Yesaya 60:1, na waigu ri ‘agúari’ na ki “hási rago”?
Yesaya 60:1 a naya: “Ako de, mo gúari, mo hási rago; bambiko gamo imarago ye, na gu taarimo nga ga Yekova ye ku ri ro.” Gipai re nayugo gupai nga gu “dee” re angia Siona watadu Yerusarema, gu bagbata nangia ga Yuda ti gu regbo re. (Yes. 60:14; 62:1, 2) Yerusarema aarukuba gu rikaaboro nangia aYisaraere dunduko. Ani nika karagapai kuti asanahe ue tipa gi veresi re: Bambataha nga, ti gini regbo na waigu Yerusarema ‘agúari’ na ki hasi rago nga ga toro? Ya mo afugo Yesaya nadigiso tihe ni bakerehe ti gi gaani regbo re?
Ti gini regbo na waigu Yerusarema ‘agúari’ na ki hasi rago nga ga toro? I aima gbarasa Yerusarema gbiati gaha yekaru ho aYudo adu ni ni ziziaboro Babera yo tipa agarã 70. Ono tingbafuo aMadaio na aParaso zi Babera, i ambu agu aYisaraere naaraka rogo apapara bariwara ngbii Babera dunduko tipa i karaga tiyo ku rogo gayo ringara na ki karaga ndikidi irisombori. (Eza. 1:1-4) Ti tonatona gu garã nangia 537 Mbata fu Batikayo Kristo, gu yangara ruru aboro nanye rogo gu ngbatunga naadu 12 aima manga gipai re. (Yes. 60:4) I atona ka fu motumo fu Yekova, na kini mangi apumbo, na ka bungia yekaru. (Eza. 3:1-4, 7-11; 6:16-22) Ga Yekova taarimo atona ka hasa rago berewe kurii Yerusarema—naida ka ya si atona ka hasa rago kurii gako aboro. Na si ki sa gupai nga i da ni imarago fu gu rikaaboro nga aguyo naainongo Yekova ya.
Ono tie, kina papara ga Yesaya sangbanebi gbua nadigisitihe ti gu regbo re. Dungu aYisaraere aandunga kumbatayo kaa giasangba Mbori te. (Nem. 13:27; Mara. 1:6-8; 2:13, 14; Mt. 15:7-9) Zavura kusa, i aima ká Masiya, nga Yesu Kristo. (Mt. 27:1, 2) Rogo gu garã nangia 70 Fuo Batikayo Kristo, i agbarasi Yerusarema berewe ni uehe.
Yekova aima pe gupai kumbatayo nga gipai re nika manga amanga. (Dan. 9:24-27) Si ziazia nga, anga gako ringbisapai nangia ha tipa gu Yerusarema nga ga kpotosende digisi apapara gu sangbaanebi dunduko du rogo Yesaya kapita 60 te.
Ya mo afugo Yesaya nadigisotihe ni bakerehe ti gaani regbo? Ii, ono gipai re namanga mbiko kura dee nga gu ri narukuba kurapai kia du nga—“gu Yerusarema du ari yo.” Gu mokedi nangia Pauro ake gupai tipa ri nga: ‘Ri nga narani.’ (Gara. 4:26) Gu Yerusarema du ariyo nga papara gu ga Mbori riigbu du ngbangbaturũ yo nga gu du na ruru amaraika rogoho. Awiri nakoda Yesu gbiati gu mbedimbedi aKristano du bange yo nga 144,000, du na maabangirise ka ga ku ngbangbaturũ yo wakina gu Pauro adu na ni. Mbedimbedi aKristano nga “ziazia rika aboro”—“ga Mbori Yisaraere.”—1 Pet. 2:9; Gara. 6:16.
Waigu gu Yerusarema du ariyo ‘agúari’ na ki “hási rago”? Ri amangihe wo vurube agu awiiri du auru kpotosende nga mbedimbedi aKristano. Oni bingo wai du gayo kpiapai kina sa na gu i apehe ni sangbaanebi rogo Yesaya kapita 60.
Si aaida mbedimbedi aKristano “gúari” mbiko i adu rogo gu bitimo narukuba kurapai ho gu yugopai nga ga abasamungu kuti ndikidi pambori agbataka ni tifuo amokedi kpiki. (Mt. 13:37-43) Ti gu regbo re, i adu tii gu maapai rii nga ga Babera du ni Bakerehe, nga bariwara ngbii ziree pambori. Mbedimbedi aKristano adu ni zizi yo da kina “ho zegino ka nyasa ni,” nga gu regbo natona rogo 1914. (Mt. 13:39, 40) Ngbutuko tingbafuo gu re, rogo 1919, i akuru tii gu sunge zio re na i ki tona hasa rago nga ga toro berewe ni tungusa yo pai. b Vuru agu agarã yo ninaasusa, ngbatunga aboro dunduko ima ye ku rogo gu imarago re, kodihe na gu yangara yo nga ga Mbori Yisaraere—du nga agu “abakindo” i napepa yo rogo Yesaya 60:3.—Yugo. 5:9, 10.
Kumbatayo, mbedimbedi aKristano nika gbaraga gu imarago naye be Yekova ngba bakere gene. Waigu i nika mangaha wo? Ho i nika nyasa gayo sunge ni auru kpotosende, i nika da ni papara “vovo Yerusarema,” watadu gu dee Kristo nika dia ri du nga agu abakindo na aboromotumo nika du na ko du bange yo nga 144,000.—Yugo. 14:1; 21:1, 2, 24; 22:3-5.
Vovo Yerusarema nika manga nyanyakipa pai rogo papara digisidigisi gupai yo du rogo Yesaya 60:1. (Oni ringbisinga Yesaya 60:1, 3, 5, 11, 19, 20 na Yugoti 21:2, 9-11, 22-26.) Kina wai gu Yerusarema naadu auru kpotosende angia gbata fu airangbii rogo gu Yisaraere naadu mbata, sidu, vovo Yerusarema, gbiati Kristo nika da ni agu airangbii nga ga vovo zegino. Waigu vovo Yerusarema “[azora] ngbangbaturũ yo yo du Mbori ni”? Ni mangaha gupai du na maapai kurii kpotosende. Agu aboro nagunde ti Mbori dagba ngbatunga aboro yo dunduko “atá rogo gaha imarago.” I amanganga ingapai berewe na kini kpiki te. (Yugo. 21:3, 4, 24) Gu sangbanapai nika du nga “mbakada arago dũ,” wakina gu Yesaya gbiati kura anebi aima gumbaha. (Amo. 3:21) Gu mbakada ahe dunduko re atona ho Kristo ada ni ni Bakindo na si nika digo ti digido gako Zogarago Tipa Agarã Kutu.
a Gu fugo i namangisunge na ni rogo Yesaya 60:1 nga oni, rogo ndikidi pa-Ebere, si afura tipa boro sa nga gu nabipa dee. Sidu, ani ima rengbe ka ya ho i aya ni oni si nafura tipa dee.
b Gu mbakada ahe dunduko nga ga toro nga gu namangi rogo 1919, i ima fura a tipaha rogo Yezekere 37:1-14 na rogo Yugoti 11:7-12. Yezekere aima gumbapa gu mbakada ahe dunduko nga ga toro nga ga mbedimbedi aKristano dunduko tingbafuo i du ni zizi yo tipa gbanga regbo. Gu sangbanebi du rogo Yugoti nafura tipa gu vunga boro berewe rogo toro yo narukuba kurapai kia nga ga gu tooni badona nga ga mbedimbedi awirina nga aguyo naangbe mbata yo rogo apai, tingbafuo ho i aadunga ni na rengba ka iriso Yekova wenengai tipa bete regbo ya, ho i amoi yo ni ku bambukiso yo zanga i mangi gbegberẽpai amanga. Rogo 1919, i amoi yo ni “kangara moyambu.”—Mt. 24:45; oni bi gu buku nga Pure Worship of Jehovah—Restored At Last!, kpe. 118.
