Gu Bipai Nga Ga Baibiri

“Kere Ambaro” Ya Mo Si Naida Mo Ngihe?

“TI AGI AREGBO RE, DUNGU RANI ADUNGA NI AGU ABORO NANDU KAA SUNGO GBUA KAA BI AMBARO BEREWE YA, ONO NANGI AGU AMBARO A DU WA, KAA GITO TIARAYO NA AGU AHE ABORO NAAGITO NA NI TIARAYO, KAA DAKPA GBANGAGBANGA ABAAGANGARA, WATADU KAA SUNGO RII HE SI NIFU NA BORO RII GU IME NAFU TI MBIA, NA KAA TA WAGIA NA GU BATIO NGA SHARKS.”—GU WARAGA APANGBANGA NGA WILLOW GLEN RESIDENT.

Gi pangbanga re nafura tipa gu dungu ngbatunga ambaro nga gu aboro angihe. Agu ambaro nga gu naima maapai areme aboro naima inopai tipaha gbe wa gu nga, kaa gu ngbawege, kaa bita kputakputa nduro, ka ru rogo tuturũ ba ka gito kusande, gbiati gu kura ambaro nayugo pa gu zegino areme nga gu du na agu aboro rogoho namaa gayo raka ngbapai yo. I namangasunge na ahe wa, agu ahe nasayo i nita rii kputakputa nduro, agu angbagida nadakpa mbia, gbiati gu kura ngbatunga ahe ni bakiakia tipa si undo yo i rengbe ka du na rengba ka bita gu kere bazezerenge abaagangara du ti ni, ka dakpa gu gbangagbanga ambia du pati abaime, watadu ka gu rogo tuturũ ba ka gito ku rogo gu kura ba. A wa gu magazini nga Time agumbaha, pa wai “kere ambaro”—nga agu ambaro gu boro nangihe amaa gani raka ngbapai yo rogoho amaapai areme—nayugo gu nyemupai du amirioni aboro na ni ka manga agu apai “du ni kere kpakarakpakaraha tipa ka dia be gayo gunde na ki du na bakere ngbarago rogo gayo raka yo, aguyo namanga agi apai re ti digido aposo, na agu abangimbaro naima sa gi ngbatunga ambaro re ni gayo sunge kaa ngihe ti marã, i na ngbatunga gu bipai nga i naasada ka manga gupai nga gu arengbanga omeyo na ni ya.”

Mbiko gupai nga kere ambaro ima da ni agu ambaro dungu aboro naima inopai areme tipaha, aboro namanga agu ambaro du ni wenehe ngba kere kpakarakpakara gene na dungu aboro nagbiatiyo na pai ho i amangaha ni wo. Nibipa kura ambaro tigaha, sangbanaha ima du ni kere iiriwoho a wadu he ni yuguyuguhe nibipa namba agu aboro nakpi nibipa agu apai nabi pa ngi kere ambaro. Agu aboro nangi ngbatunga gi kere ambaro re ima rugatiyo na pa gu kerepai du ti ni. Gu kura dee sa nanaangi kere ambaro ape gupai nga: “Ho mi anaangihe ni, mi anaaberã gupai ti aregbo dũ nga mi ima rengba ka kpi.” Gu kura wene ba ini wai ka ora rii kputakputa nduro afura tipaha ngba gi gene re, ko aya, “ka mo ahonga ti regboho ya, gure nga mo ata asadanga ka manga ome nyanyaki te.”

Fuo ino ani pa gu kere apai awere du ti gu kere ambaro re, ya mo aKristano rengbe ka ngihe? Waigu rengbe Baibiri ka undo rani ani diberã singia ani rengbe ka rimiso tirani kurogo gu ngbatunga kere ambaro re? Pa saka ani pai tipa pa gu bipai du Mbori na ni tipa pa du raka ni ziaziaha nika undo rani ani karagapai kuti agu asanahe re.

Ga Mbori Bipai Tipa Unga

Baibiri nagumba gupai furani nga Yekova nga “gugaabi unga” watadu mburu unga. (Atambuahe 36:9) Ku gii gu nga ko akusi aboro, ko aberẽ parani a ni fuko agu ahe furani ani aidaha tipa ka gbia ngbarago rogo raka yo. (Atambuahe 139:14; Amokedi 14:16, 17; 17:24-28) Si ruaru tie furani ani da kuti gu digisopai nga ko naida gupai berani nga ani ngerefuo guhe wenengai ko nafuhe furani rogo weneringise yo. Agu andiko gbiati gu bangua arengo i afuhe fu gu rikaaboro nangia aYisaraere naundo rani ani da kuti gi digiso pai re.

Ga Moize Andiko aaida gupai nga boro mangi diandue tipa ka banda gu raka nga ga kura aboro. Ka si du nga gipai re aamanganga te na boro ki zanga gani raka, gu boro naima rengba ka banda gipai re ka si mangingo ya ani rengbe ka du ni gu boro du na bape kure kuri ni. Ni kpiapai, i afu gu zinahe fu airakporo dunduko nga ho i ame gayo vovo gbanga bambu ni nga gu du na akuraha kuriihe, si naida i mangi ndugu pati ni. Ka ni amanganga ha wo ya, bape kure ima rengba ka du kurini ka si dunga boro nika zutuka rogo gu gbanga bambu re ka ti. (Pa Fu Rugute ni Ue he 22:8) Ka si du nga babagara zubo boro ki imi ni zanga boro ini paru bairaru adunga na pai kuriko te. Ono kuba gure, si ani du nga ka si du nga aboro aima inopa gu babagara re nga u nga zingizingi nya na i ki ima za bairaru ono ka gu baira babagara re abandanga ru ya, fuoho u kini zubo boro kini imi ni, baira gu babagara re ani rengbe ka du ni gu boro du na bape kure kurini na si ani idi i imi ni nibasa. (Gate 21:28, 29) Wadu he nga raka rani na nyanyakipaha fu Yekova, gako Ndiko nayugo wai furani rengbe ani ka bi raka na nyanyakipaha na kini bandaha.

Ga Mbori ruru amoyambu aima rugatiyo a na gupai nga, gi bangua arengo re nabipa agu apai abi a namaa raka boro nitini ngbapai yo. Rogo gu kura pangbanga sa nga ga Baibiri Davide ayugu gu gako nyemupai nga ga ‘mbira gu ime nga ga guga Betereme.’ Betereme adu ku be aFereseto ti gu regbo nangiaha re. Ho ga Davide abanzengere biata ainipa gu nyemupai ni ko adu na ni, i andu ngbaome kurogo gu bataya nga ga afereseto ki tu ime rogo gu guga nadu Betereme yo ki ye na ni fu Davide. Waigu Davide amangipai? Ko aambira nga gu ime re te, kuba gure ko akusuko ho kusande. Ko aya: “Gi Mbori aza re ti ni ya ka mi mangi nga gere ya. Mi mbiri kure agu aboro fu ungayo ku ngba pai yo? Bambiko i niye na ni nifu ungayo ku ngba pai yo.” (1 Pekapai 11:17-19) Bangiri Davide tigako, si aarunga agu aboro re moi raka yo ngbapai yo tipa ka mbiisa gako nyemupai te.

Yesu amangipai wa kina gure ti gu regbo si awira wa rogo yuguyugu kpiapai nadu ho Bakitingbanga aasadi ko ni nga ko gito rii ngbaõ yekaru yo ka bihe singia amaraika rengbe ka banda ko ka ko õnga ya. Yesu ki ya fu ko: “Ka mo ásadi nga Gbia nga gamo Mbori ya.” (Matayo 4:5-7) Nirengo aDavide na Yesu aima ida kuti gupai nga gbegberẽpai du ngaha bangiri Mbori ka manga gupai rengbe ka maa gu raka nga ga aboro ngbapai yo.

Na agi akpiapai re berãrani yo, ani ima rengba kaa bakabangirani nga, ‘Waigu rengbe ani ka ino ginihe nga kere ambaro, watadu agu ambaro namaa raka boro ngbapai yo? Wadu he nga gu kungbo ambaro nga ga zambuasitise nga gu arengbanga zaatu ka maa raka boro ngbapai yo nitihe ya, i ima rengba ka saha si da ni kere ambaro wai gu rengbe ani ka ino gini ambaro si aida ani ngihe?’

Ya mo si Rengbe ka Maa Raka Re Ngbapai?

Dia regbo ka wisigo ai agu ambaro sirisiri ani aberãpa ngihe ima rengba ka undo rani ani gbia karagapai kuti gu sanahe re. Ni kpiapai, ani ima rengba ka sana tirani nga, ‘Bange aboro wai gbiatiyo na béno mbiko gi ngbatunga mbaro re? Ya mo mi gbia gu rabahe watadu agu ahe bere nga gu rengbe mi ka banda tire na ni be aro? Gini sangbanapai rengbe ka manga ka si dunga nga mi nika ti watadu mi nika gusa wai mi nika gu watadu agu ahe mi abanda tire na ni kà ka mangasunge? Ya mo si rengbe ka du nga wiri tooni béno du ka du watadu gopai kinaho nayugoho nga mi ima rengba ka hõ nyanyaki aro watadu ka kpi?’

Ka Kristano ta inoaino kaa ngi agu ambaro rengbe ka maa raka ni ngbapai, ni ima rengba ka ba gberãrago ti Yekova na ni arengbanga ka du ni wene kpiapai ka rẽ tipa amomu rogo dungurati te. (1 Timoteo 3:2, 8-10; 4:12; Tito 2:6-8) Zavura ti agu aregbo ani amanga agu apai nga ga zambuasitise, si naida aKristano berãpa Yekova na pa wai du raka na nyanyaki paha fuko