Agu aboro namangasunge nyanyaki agundenga be sunge te. Kuba gure i nagbia ngbarago ti mangasunge nyanyaki ka gbia agu ahe i aidaha na tipa ka undo kura aboro—ka si vura dunga gu sunge i amangaha angbanga ti kura aboro te vurũ.

Singia ani naida ha watadu ani aidanga ha te, raka ima hi be agu apai du kuri boro ni tindiro. Rogo gi zegino dungu aboro aidanga na gu berãpai nga ga mangasunge nyanyaki rogoho re ya, mangasunge zanga nyomoro naye na wene sangbanapai.—Batungusipai 3:13.

“Mi ima wirika gupai nga, ho mo amangasunge ni nyanyaki, mo nadu na ngbarago gbiati gu rengba be pai du kpotose yo. Gu rengba be pai du kpotore yo ima sa re mi wiriki wai ka kpinyemu sunge. Pa du mo na nyemu ka mangasunge kakaka nika undo ro mo du na wene rimo a.”—Reyon.

BANGUA RENGO NGA GA BAIBIRI: “Rogo asunge dunduko u du rogo ho.”—Asanza 14:23.

Mo sonosi wene bipai tipa sunge ni peka mo fuo agu apai i natangaraha ane re.

Mo gbia ngbarago niwirika mo ka mangaapai wenengai. Singia mo namanga asunge, nyasa mo gu sunge i nafuhe foro sukuru yo mo mangihe kporo yo, watadu mangasunge marã, mo fu tiro sa gu sunge mo amangaha. Bara sa kindi mo narengbe ka mangasunge wenengai, mo ngere tipa agu agene rengbe mo ka mangaha ngbaha wenengai watadu ni ipo watadu ni bawenehe gbe. A wa mo nikaa gbia birĩ ti mangasunge, kina wo a mo nika gbia ngbarago ti mangasunge.

BANGUA RENGO NGA GA BAIBIRI: “Mo nabi gu boro namanga gani sunge na birĩ? kina ni nikaru ku bara bangiri abakindo; ni arú nga ku bara bangiri kungba aboro te.”—Asanza 22:29.

Mo bi agu apai si akodaha. Ho mo angera ni wenengai fuo gamo atindiro rogo dungu apai yo, kura aboro nagbia undo agbia. Ni kpiapai, ho mo amanga gamo asunge ni kakaka, mo na akpurasi gu tindiro nga ga gamo aborokporo.

BANGUA RENGO NGA GA BAIBIRI: “Fu he ngba ti dia ha.”—Amokedi 20:35.

Mo mangipai ni bakerehe. Kuba gupai nga ka mangapai gbua tooni, mo asadi ka mangapai ni bakerehe ki susi gu si naida mo mangihe. Ngba gi gene re, mo du naruga gamo raka, mangasunge ni bakerehe angianga i nazio ro azio mo mangihe wo ya ono mbiko mo du sia ka mangaha wo.—Matayo 5:41.

BANGUA RENGO NGA GA BAIBIRI: “Ka ga weneringise du nga ni dingisaro ya, ono ni nyemuhe zaza.”—Firemona 14.

Mo du na ruru bipai. Agu aboro namangasunge kakaka aira nyomoro nga yo te, na anga i a nga agu aboro namangasunge amanga ki kpi ko yo te. I naida ka du na ruru bipai, ka gbia ngbarago ti regbo mangasunge nyanyaki na ti regbo aongoda.

BANGUA RENGO NGA GA BAIBIRI: “Hi be boro sa na zereda, ngba ti hi be boro ue be sunge na pa peka kina fuo yuge.”—Batungusipai 4:6.