Gu Gbiamotumo nangia Eri adu na awiriko ue ni akumbagude naamangasunge ni aboromotumo banye yo. Arimo yo angia Ofeni na Finasa. I aairisanga ga Yekova andiko te, na i anaamangapai na aboro ngba gbegberẽ gene. Ho aYisaraere anaaye ni na motumo fu Yekova, aOfeni na Finasa anaadia kina boro gu pasio naaningba angba gbe tipa tiyo. Eri aima gia agu apai awiriko anaamangaha, ono ka ko amanganga pai tipaha ya. Ya mo Yekova arengbe ka mbu gipai re si niimangi amanga kindi?

Wa vura duhe nga Samuere adu ni tooni ko ti aOfeni na Finasa, ko aawirikanga gayo mangaapai te. Rago aima ngba ti Yekova na Samuere. Rogo gu kura yuru sa ho Samuere aara ni, ko agi fugo boro ni niyambu ko. Ko aguari kuari, ki oro koyo du Eri ni, ki ya: ‘Mi gere!’ Ono Eri ki ya: ‘Mi naayambanga ro te. Mo karaga tiro ka pi.’ Samuere ki karaga tiko ki pi. Kina gipai re ki mangi berewe. Ho Samuere agi gu fugo ni re berewe ni biataha, Eri abi gupai nga Yekova du naayamba Samuere. Eri ki ya fu Samuere wẽ, ka ko gi gu fugo re berewe, ko ki ya: ‘Yekova, Mo fura. Ga moyambu nagiaha.’

Samuere ki karaga tiko ki pi. Fuani, ko ki gi fugo si niyambu ko nga: ‘Samuere! Samuere!’ Ko ki karagapai ki ya: ‘Mo fura, ga  moyambu nagiaha.’ Yekova ki ya fuko: ‘Mo ya fu Eri wẽ, mi nika fu mbusa fuko na fu gako aborokporo. Ko ima inoho ya awiriko namanga gbegberẽpai rogo gi banye, ono ko amanganga pai sa ni te.’ Ho rago agiri ni, Samuere azaki ngbadimo banye a wa gu ko anaamangaha ti aregbo dũ. Ko aagunde agunde ka pe gupai re fu gbiamotumo nga gu Yekova apehe. Ono Eri ayambuko na ki sanako nga: ‘Ginipai Yekova nipehe foro wire? Mo pekenga ha fere dunduko.’ Sidu, Samuere ki peke agu apai re fuko dunduko.

Wa Samuere aasona, Yekova adu na ko kindi. Rogo gu ringara re dunduko, aYisaraere dunduko aima inoho nga Yekova ima sia Samuere ko du ni nebi na ni basapungbanga.