Xíimbalnakoʼon teʼ bej táan u bin u maas sáasiltaloʼ
Xíimbalnakoʼon teʼ bej táan u bin u maas sáasiltaloʼ
«U beel le [utsoʼoboʼ] bey u sáasilil jumpʼéel túumben kʼiineʼ; ku bin u jóokʼol jujumpʼíitil tak ken jóom sáasilchajak yéetel tuláakal u muukʼ» (PROVERBIOS 4:18.)
1, 2. ¿Baʼax utsiloʼob tsʼoʼok u taasik tiʼ máaxoʼob meyajtik Jéeoba le u maas sáasilkuntaʼal u tuukuloʼoboʼ?
MIX máak jeʼel u páajtal u tsolik jach tubeel baʼax ku yúuchul ken jóokʼok le kʼiinoʼ, chéen Jéeoba, le máax beet le sáasiloʼ (Salmo 36:9.) Le ken «kʼiʼitpajak le sáasil tiʼ tuláakal yóokʼol kaab[oʼ]», «ku chíikpajal túun tuláakal u [káapiloʼob] le luʼumoʼ» (Job 38:12-14). Jeʼex u bin u maas píikʼleʼ, le baʼaloʼoboʼ ku bin u maas chíikpajal u yilaʼaloʼob, ku yilaʼal tak le baʼaloʼob yaan tu káapiloʼob le luʼumoʼ.
2 Jéeoba xaneʼ jeʼex u beetik u bin u sáasiltal ken joʼopʼok u píikʼileʼ bey xan u beetik u maas sáasiltal k-ilik bix u kʼáat ka k-meyajte (Salmo 43:3). Kex le yóokʼol kaab tiaʼan ich éekʼjochʼeʼenileʼ, Jéeobaeʼ táan u beetik u maas sáasiltal u tuukul le máaxoʼob meyajtikoʼ. ¿Baʼax utsiloʼob ku taasik lelaʼ? Le Bibliaoʼ ku yaʼalik: «U beel le [utsoʼoboʼ] bey u sáasilil jumpʼéel túumben kʼiineʼ; ku bin u jóokʼol jujumpʼíitil tak ken jóom sáasilchajak yéetel tuláakal u muukʼ» (Proverbios 4:18). Yéetel le sáasilil ku bin u maas tsʼáaikoʼ, Jéeobaeʼ ku bin u maas sáasilkúuntik u beel máaxoʼob meyajtik utiaʼal ka u naʼatoʼob bix unaj u nuʼuktaʼal u kaajal, bix unaj u naʼatal baʼax ku yaʼalik le Bibliaoʼ yéetel bix u kʼáat ka kuxlakoʼob.
Ku maas naʼataʼal bix unaj u nuʼuktaʼal u kaajal Dios
3. Isaías 60:17, ¿baʼax ku yaʼalik kun úuchul?
3 Jéeobaeʼ tu beetaj u tsʼíibtaʼal tumen le profeta Isaíasoʼ: «Tu jeel bronceeʼ, bíin in tsʼáatech oro[,] tu jeel fierroeʼ, bíin in tsʼáatech plata, tu jeel cheʼeʼ, bíin in tsʼáatech bronce tu jeel tuunichoʼobeʼ, bíin in tsʼáatech fierro» (Isaías 60:17). Jeʼex ken jeelintaʼak upʼéel baʼax maʼ jach maʼalob yéetel upʼéel baʼal maas jach maʼalobeʼ, teʼ tu «tsʼook jaʼaboʼob» tiʼ le kʼasaʼan yóokʼol kaabaʼ, máaxoʼob meyajtik Jéeobaeʼ tsʼoʼok u bin u maas naʼatkoʼob bix unaj u nuʼuktaʼal u kaajal Dios (2 Timoteo 3:1).
4. ¿Baʼax beetaʼab tu jaʼabil 1919, yéetel baʼax utsiloʼob tu taasaj?
4 Ka káaj u tsʼook kʼiiniloʼob le kʼasaʼan yóokʼol kaabaʼ, tu múuchʼuliloʼob le múuchʼ máakoʼob ku xokikoʼob le Bibliaoʼ (jeʼex kʼaj óolaʼanil kaʼach u j-jaajkunajoʼob Jéeobaeʼ) ku yúuchul kaʼach upʼéel votación utiaʼal u yéeyaʼal le nuxiboʼob yéetel le diaconoʼob wa le máaxoʼob kʼaj óolanoʼob bejlaʼa bey le j-áantaj nuxiboʼoboʼ. Baʼaleʼ yaan tiʼ le nuxiboʼob ku yéeyaʼaloʼoboʼ maʼatech u tsʼáaik u yóoloʼob teʼ kʼaʼaytajoʼ, yaan maʼ utstutʼaan u kʼaʼaytajoʼobiʼ yéetel yaan tak ku yaʼalikoʼob tiʼ u maasil maʼ u jóoʼloʼob kʼaʼaytajiʼ. Le oʼolal tu jaʼabil 1919, teʼ múuchʼuliloʼoboʼ tsʼaʼab utúul sukuʼun nuʼuktik le kʼaʼaytajoʼ; le sukuʼunaʼ kʼaj óoltaʼab bey director de servicio. Le sukuʼunaʼ maʼ letiʼe múuchʼulil yéeyikoʼ, tsʼaabil kaʼach u beetaʼal tumen le najil Beteloʼ. U meyaj le sukuʼunaʼ u nuʼuktik bix kun úuchul le kʼaʼaytajoʼ, u yaʼalik tuʼux kun úuchul yéetel u líiʼsik u yóol le sukuʼunoʼob utiaʼal ka táakpajkoʼoboʼ, le baʼax beetaʼabaʼ tu beetaj u maas kʼaʼaytaʼal le maʼalob péektsiloʼ.
5. ¿Baʼax úuch tu jaʼabiloʼob 1920?
5 Tu jaʼabil 1922 teʼ noj muchʼtáambal beetaʼab teʼ noj kaajil Cedar Point (Ohio, Estados Unidos), jach líiʼsaʼab u yóol le sukuʼunoʼob le ka aʼalaʼab tiʼob: «Kʼaʼayteʼex, kʼaʼayteʼex, kʼaʼayteʼex le Rey yéetel u reinooʼ». Ka kʼuch u jaʼabil 1927 aʼalaʼabeʼ utiaʼal domingos maas jach maʼalob utiaʼal u yúuchul kʼaʼaytaj joonaj joonai. ¿Baʼaxten? Tumen óoliʼ tuláakal máak ku jeʼelel utiaʼal domingos. Bejlaʼaʼ xaneʼ láayliʼ k-ilik jóokʼol kʼaʼaytaj teʼ súutukoʼob k-ojel maas kulaʼan le máakoʼob tu yotochoʼoboʼ, jeʼex utiaʼal oknaj kʼiinoʼ wa utiaʼal sábados yéetel domingos.
6. ¿Baʼax chʼaʼatuklaʼab tu jaʼabil 1931, yéetel baʼax tu líiʼsaj u yóol u beet u kaajal Dios?
6 Le Domingo 26 tiʼ julio tiʼ 1931 tiʼ upʼéel noj muchʼtáambal beetaʼab tu noj kaajil Columbus (Ohio, Estados Unidos), bey xan tiʼ uláakʼ noj muchʼtáambaloʼob beetaʼab tiʼ tuláakal yóokʼol kaabeʼ jach líiʼsaʼab u yóol u kaajal Dios utiaʼal ka u tsʼáa u yóol maas kʼaʼaytaj. Lelaʼ úuch ka tsʼaʼab u yojéeltoʼob upʼéel baʼal tsʼoʼok u chʼaʼatuklaʼal. U xóotʼ tiʼ le baʼax aʼalaʼabtiʼoboʼ ku yaʼalik: «Toʼoneʼ túuxtaʼanoʼon tumen Jéeoba utiaʼal k-beetik upʼéel meyaj tu kʼaabaʼ, yéetel tumen k-uʼuyik u tʼaaneʼ k-kʼaʼaytik le baʼax tu kaʼansaj Jesucristooʼ yéetel k-tsʼáaik kʼaj óoltbil chéen Jéeoba u jaajil Dios yéetel chéen letiʼ minaʼan u xuul u páajtalil; le oʼolaleʼ jach kiʼimak k-óol kʼamik le kʼaabaʼ jóokʼ tu chiʼ Jéeobaoʼ, k-kʼáat ka kʼaj óoltaʼakoʼon yéetel ka tʼaʼankoʼon yéetel le kʼaabaʼ u j-jaajkunajoʼob Jéeoba» (Isaías 43:10). Le túumben kʼaabaʼaʼ tu yeʼesaj baʼax meyajil jach unaj u beetaʼal tumen u kaajal Dios. Jach beyoʼ, Jéeobaeʼ tu tsʼáaj yaʼab meyaj tiʼ máaxoʼob meyajtik, yéetel letiʼobeʼ jach maʼalob tu kʼamiloʼob.
7. ¿Baʼax kʼeexil beetaʼab tu jaʼabil 1932, yéetel baʼaxten?
7 Kex yaʼab nuxiboʼob tu tsʼáaj u yóoloʼob kʼaʼaytajeʼ yaan xan maʼ maʼalob tu yuʼubiloʼob u yaʼalaʼal unaj u táakpajal tuláakal le sukuʼunoʼob teʼ kʼaʼaytajoʼ. Baʼaleʼ natsʼaʼan kaʼach u kʼiinil u maas naʼataʼal bix unaj u nuʼuktaʼal u kaajal Dios. Tu jaʼabil 1932 le revista La Torre del Vigía, tu yaʼaleʼ, le múuchʼuliloʼoboʼ, unaj u jáawal u yéeykoʼob nuxiboʼob yéetel diaconoʼob, baʼaxeʼ ka u yéeyoʼob u múuchʼ sukuʼunoʼob jach u kʼubmaj u yóoloʼob teʼ kʼaʼaytajoʼ, utiaʼal ka u nuʼuktoʼob le múuchʼuliloʼ. Beyoʼ le máaxoʼob kun nuʼuktikoʼob kaʼach le múuchʼuliloʼ, máakoʼob jach u tsʼaamaj yóoloʼob teʼ kʼaʼaytajoʼ; bey túun úuchik u káajal u maas kʼaʼaytaʼal le maʼalob péektsiloʼ.
Jéeobaeʼ ku maas sáasilkúuntik u tuukul máaxoʼob meyajtik
8. ¿Baʼax xuʼul u beetaʼal tu jaʼabil 1938?
8 Jéeobaeʼ tu maas sáasilkúuntaj u tuukul máaxoʼob meyajtik. Tu jaʼabil 1938 jáaw u beetaʼal votacionoʼob utiaʼal u yéeyaʼal le máaxoʼob ku nuʼuktajoʼob teʼ múuchʼuliloʼ. Tuláakal el sukuʼunoʼob ku nuʼuktajoʼob teʼ múuchʼuliloʼoboʼ kaaj u yéeyaʼaloʼob tumen u najil Betel jeʼex u nuʼuktaʼaltiʼob tumen «le palitsil chúukpajaʼan u yóol yéetel yaan u naʼat[oʼ]» (Mateo 24:45-47). Óoliʼ tuláakal u múuchʼuliloʼob u j-jaajkunajoʼob Jéeobaeʼ jach maʼalob tu kʼamiloʼob lelaʼ, le maʼalob péektsil túunoʼ tu beetaj u natsʼikuba maas yaʼab máakoʼob tiʼ u kaajal Dios.
9. ¿Baʼax jáaw u beetaʼal tu jaʼabil 1972, yéetel baʼaxten jach maʼalob le baʼax beetaʼaboʼ?
9 Tu kʼiinil 1 tiʼ octubre tiʼ 1972 jáaw u nuʼuktaʼal le múuchʼulil chéen tumen utúul sukuʼunoʼ ka káaj u nuʼuktaʼal tumen u múuchʼ sukuʼunoʼob. Lelaʼ tsʼoʼok u tsʼáaik tuʼux u nuʼuktaʼal le múuchʼuliloʼob tumen sukuʼunoʼob yiijchajaʼan u tuukuloʼob yéetel jach ku tsʼáaikoʼob ichil u kuxtaloʼob baʼax ku yaʼalik Dios (1 Timoteo 3:1-7). Bey túunoʼ bin u maas yaʼabtal le sukuʼunoʼob ku kanikoʼob bix jeʼel u nuʼuktikoʼob le múuchʼuliloʼoboʼ. Letiʼobeʼ, ¡jach maʼalob áantaj ku tsʼáaikoʼob tiʼ le yaʼabach máakoʼob táant u yookloʼob ichil u kaajal Diosoʼ!
10. ¿Baʼax úuch tu jaʼabil 1976?
10 Le Sukuʼunoʼob Nuʼuktik u Kaajal Jéeobaoʼ (Cuerpo Gobernante) tu tʼoxubaʼob ich seis grupoʼob utiaʼal u yilkoʼob le meyajoʼ. Le 1 tiʼ enero tiʼ 1976, le seis grupoʼobaʼ káaj u nuʼuktikoʼob le meyaj ku beetaʼal tumen u kaajal Jéeoba tiʼ tuláakal le yóokʼol kaaboʼ. ¿Máasaʼ jach yaʼab utsiloʼob ku taasik u yantal yaʼab sukuʼunoʼob nuʼuktik le meeyjil kaʼansajoʼ? (Proverbios 15:22; 24:6.)
11. ¿Baʼax úuch tu jaʼabil 1992, yéetel baʼax oʼolal?
11 Tu jaʼabil 1992 úuch upʼéel baʼal jeʼex le úuch le ka suunaj le israelitaʼob yéetel u maasil máakoʼob tu kaajil Jerusalén le ka tsʼoʼok u jáalkʼabtaʼaloʼob tiʼ u kaajil Babiloniaoʼ. Teʼ kʼiinoʼob jeʼeloʼ yaan levitaʼob ku binetik utiaʼal u meyajoʼob teʼ templooʼ, le oʼolal tsʼaʼab uláakʼ meyajoʼob tiʼ le netineoʼoboʼ, kex maʼ israelitaʼobiʼ. Jeʼex úuch teʼ kʼiinoʼob jeʼeloʼ tu jaʼabil 1992 tsʼaʼab uláakʼ meyajoʼob tiʼ jujuntúul tiʼ le máaxoʼob ku keʼetloʼob yéetel «uláakʼ j-tamanoʼob[oʼ]», utiaʼal ka u yáantoʼob le palitsil chúukpajaʼan u yóol yéetel yaan u naʼatoʼ. Tsʼaʼab u yáantoʼob le Sukuʼunoʼob Nuʼuktik u Kaajal Jéeoba u tʼoxmubaʼob ich seis gruposoʼ (Juan 10:16).
12. Jéeobaeʼ, ¿bix tsʼoʼok u beetik k-nuʼuktaʼal tumen le jeetsʼeliloʼ?
12 ¿Baʼax utsiloʼob tsʼoʼok u taasik tuláakal le kʼeexoʼobaʼ? Jéeobaeʼ ku yaʼalik: «Bíin in beet a méekʼtáantaʼal [wa a nuʼuktaʼal] tumen [le] jeetsʼel[iloʼ], le tojiloʼ ku bin u nuʼuktik a beel» (Isaías 60:17). Bejlaʼeʼ yaan jeetsʼelil ichil máaxoʼob meyajtik Dios, yéetel tumen u yaabiltmoʼob baʼax tojeʼ, ku yilik u beetkoʼob baʼax ku yaʼalik Dios. Letiʼobeʼ jach maʼalob nuʼukbesaʼaniloʼob utiaʼal u kʼaʼaytkoʼob u maʼalob péektsilil le Reinooʼ yéetel utiaʼal u kaʼanskoʼob uláakʼ máakoʼob (Mateo 24:14; 28:19, 20).
Jéeobaeʼ ku beetik u maas naʼataʼal baʼax ku yaʼalik le Bibliaoʼ
13. Tu jaʼabiloʼob 1920, Jéeobaeʼ, ¿bix tu yáantil u kaajal utiaʼal u maas naʼatik baʼax ku yaʼalik le Bibliaoʼ?
13 Jéeoba xaneʼ tsʼoʼok u beetik u bin u maas naʼataʼal le baʼax ku yaʼalik le Bibliaoʼ. Lelaʼ bey tsʼoʼok u yúuchul yéetel le baʼax ku yaʼalik Apocalipsis 12:1-9. Teʼeloʼ ku yúuchul tʼaan tiʼ «juntúul koʼolel» ku síijsik u chaambal, tiʼ «juntúul nojoch chak kaan» yéetel tiʼ «juntúul xibi paal». ¿A wojel wa baʼax u kʼáat u yaʼal cada utúul tiʼ letiʼob? Lelaʼ tsoʼol teʼ xook ku kʼaabaʼtik “Nacimiento de la nación” jóokʼ teʼ revista 1 tiʼ marzo tiʼ 1925 The Watch Tower (ich mayaeʼ bejlaʼeʼ kʼaj óoltaʼan bey U Pʼíich Tulumil Kanan). Yoʼolal le revistaaʼ, u kaajal Dioseʼ tu maas naʼataj le profecíaʼob ku tʼaanoʼob tiʼ bix u síijil le Reinooʼ yéetel kʼuch u maas naʼateʼ yaan máaxoʼob yanoʼob yáanal u nuʼuktaj Jéeoba yéetel yaan máaxoʼob yanoʼob yáanal u nuʼuktaj Satanás. Ka tsʼoʼokeʼ, tu jaʼabiloʼob 1927 yéetel 1928, u kaajal Dioseʼ tu xulaj u kʼiimbesik le Navidad yéetel le kʼiin kʼaabaʼoboʼ, tumen kʼuch u naʼateʼ le kʼiimbesajoʼobaʼ tiaʼanoʼob tu contra le baʼax ku yaʼalik le Bibliaoʼ.
14. ¿Baʼaxoʼob kʼuch naʼatbil tu jaʼabiloʼob 1930?
14 Tu jaʼabiloʼob 1930 naʼataʼab tubeel baʼax ku yaʼalik le Biblia yoʼolal óoxpʼéel kaʼansajoʼoboʼ. Ich yaʼabach jaʼaboʼobeʼ, le múuchʼ máakoʼob ku xokikoʼob le Bibliaoʼ tu yojéeltoʼobeʼ le «yaʼabkach máakoʼob» ku chʼaʼachiʼitik Apocalipsis 7:9-17, maʼ letiʼe 144,000 kun gobernaroʼob yéetel Cristo teʼ kaʼanoʼ (Apocalipsis 5:9, 10; 14:1-5). Kex beyoʼ, maʼ jach u yojloʼob kaʼach máax le «yaʼabkach máakoʼob[oʼ]». Baʼaleʼ, jeʼex u bin u maas chíikpajal u yilaʼal le baʼaloʼob ken joʼopʼok u sáastaloʼ, ka máan le jaʼaboʼoboʼ kʼuch u naʼatoʼob tubeel. Bey túunoʼ, tu jaʼabil 1935 kʼuch u naʼatoʼobeʼ le «yaʼabkach máakoʼob[oʼ]» letiʼe máaxoʼob kun pʼáatloʼob kuxaʼanil ken tsʼoʼokok le «nojoch yaayaj óolaloʼ» yéetel kun kuxtaloʼob utiaʼal minaʼan u xuul way Luʼumoʼ. Teʼ jaʼab xanoʼ naʼataʼab upʼéel baʼal yaan u yil yéetel u paalal le j-jaajkunajoʼob ku binoʼob xookoʼ. Teʼ kʼiinoʼob jeʼeloʼ, kex tiʼ tuláakal yóokʼol kaab táan kaʼach u yaʼalaʼal ka u sen yaabilt máak u luʼum yéetel ka tak kíimik tu yoʼolaleʼ, u j-jaajkunajoʼob Jéeobaeʼ kʼuch u naʼatoʼob maʼ maʼalob ka u saludartoʼob le banderaoʼ. Maʼ yaʼab jaʼaboʼob tiʼ leloʼ, kʼuch xan naʼatbileʼ Jesucristoeʼ kíim tiʼ upʼéel cheʼ toj, maʼ tiʼ upʼéel cruziʼ (Beetaʼanoʼob [Hechos] 10:39).
15. ¿Baʼax kʼiin yéetel bix úuchik u jach naʼataʼal bix u yilik Dios le kʼiʼikʼoʼ?
15 Le táan u kaʼapʼéel nojoch baʼateloʼ tiʼ tuláakal le soldadoʼob ku yúuchul loobeʼ ku tsʼaʼabal kʼiʼikʼ tiʼob, baʼaleʼ ka tsʼoʼok le nojoch baʼateltáambalaʼ u j-jaajkunajoʼob Jéeobaeʼ kʼuch u naʼatoʼob bix u yilaʼal le kʼiʼikʼ tumen Diosoʼ. Le revista La Atalaya 15 tiʼ noviembre tiʼ 1945 tu yaʼaleʼ «le máaxoʼob meyajtik Jéeoba, u kʼáatoʼob kuxtal utiaʼal minaʼan u xuul tu túumben yóokʼol kaabeʼ, unaj u naʼatkoʼob jach kiliʼich u yilaʼal le kʼiʼikʼ tumen Jéeobaoʼ yéetel jach unaj u beetkoʼob le baʼax ku yaʼalik Dios yoʼolal lelaʼ».
16. ¿Baʼax jaʼabil ka jóoʼsaʼab le Traducción del Nuevo Mundo de las Santas Escrituras, yéetel baʼaxoʼob eʼesik jach maʼalob sutaʼanik?
16 Tu jaʼabil 1946 ilaʼab u kʼaʼananil u beetaʼal u upʼéel túumben Biblia tuʼux kun jóoʼsbil u yutsil le túumben baʼaloʼob tsʼoʼok u yojéeltaʼaloʼob yaan u yiloʼob yéetel le Bibliaoʼ; unaj u beetaʼal upʼéel Biblia maʼ u tsʼáaik naʼatbil mix upʼéel kaʼansaj ku taal tiʼ le religionoʼob maʼatech u kaʼanskoʼob u jaajiloʼ. Le Bibliaaʼ káaj u suʼutul u tʼaanil tu mesil diciembre tiʼ u jaʼabil 1947. Tu jaʼabil 1950 jóoʼsaʼab ich inglés le Biblia Traducción del Nuevo Mundo de las Escrituras Griegas Cristianas. Le Kiliʼich tsʼíiboʼob ich Ebreo jujunjaatsil jóoʼsaʼabik, cinco jaatsoʼob jóoʼsaʼab tiʼ. Lelaʼ káaj u beetaʼal tu jaʼabil 1953, yéetel u tsʼook jaatseʼ jóoʼsaʼab tu jaʼabil 1960, tu doce jaʼaboʼob káajak u suʼutul. Tu jaʼabil túun 1961 jóoʼsaʼab tu chúukaʼanil le Traducción del Nuevo Mundo de las Santas Escrituras. Le Bibliaaʼ jach maʼalob sutaʼanik yéetel tsʼoʼok u jóoʼsaʼal ich yaʼab tʼaanoʼob. Ku taasik u kʼaabaʼ Dios tuláakal tuʼux unaj u yantal; tsʼoʼoleʼ tumen jach ilaʼab u suʼutul jach jeʼex u yaʼalik u yáax tsʼíibiloʼob le Bibliaoʼ jach maʼalob u meyaj utiaʼal u naʼataʼal u tuukuloʼob Dios.
17. ¿Baʼax kʼuch naʼatbil tu jaʼabil 1962?
17 Tu jaʼabil 1962 naʼataʼab máaxoʼob le «jalaʼach wíinikoʼob» ku yaʼalaʼaloʼob teʼ Romailoʼob 13:1 yéetel naʼataʼab xan tak tuʼux unaj u yuʼubal u tʼaanoʼob. Le ka jach xakʼaltaʼab le capítulo 13 tiʼ Romailoʼob bey xan Tito 3:1, 2 yéetel 1 Pedro 2:13, 17 ilaʼabeʼ le «jalaʼach wíinikoʼoboʼ» letiʼe gobiernoʼob yanoʼob way Luʼumaʼ, maʼ Jéeoba yéetel Jesusiʼ.
18. ¿Baʼax naʼataʼab tu jaʼabiloʼob 1980?
18 Ka máan le jaʼaboʼoboʼ joʼopʼ u bin u maas sáasiltal u beel le utsoʼoboʼ. Tu jaʼabil 1985 naʼataʼab baʼax u kʼáat u yaʼal u kʼaʼamal máak utiaʼal u yantal kuxtal minaʼan u xuul tiʼ yéetel u kʼaʼamal máak bey u amigo Dioseʼ (Romailoʼob 5:18; Santiago 2:23). Tu jaʼabil 1987 naʼataʼab baʼax u kʼáat u yaʼal le u jaʼabil jáalkʼabil wa Jubileo utiaʼal le máaxoʼob meyajtik Diosoʼ.
19. ¿Baʼax tu beetaj Jéeoba u naʼatik u kaajal teʼ tsʼook jaʼaboʼobaʼ?
19 Tu jaʼabil 1995 maas naʼataʼab bix u jaʼatsal le «j-tamanoʼob tiʼ le yuukoʼob» wa chivoʼoboʼ, yéetel tu jaʼabil 1998 jach tsoʼol tu beel baʼax u kʼáat u yaʼal le templo tsʼaʼab u yil Ezequieloʼ, yéetel tsoʼol xan bix u béeychajal le baʼax tu yiloʼ. Tu jaʼabil 1999 naʼataʼab baʼax kʼiin yéetel bix u waʼatal teʼ kiliʼich kúuchil le pʼekbeʼen baʼaloʼ (Mateo 24:15, 16, NM; 25:32). Yéetel tu jaʼabil 2002 naʼataʼab baʼax u kʼáat u yaʼal u meyajtaʼal Dios «tiʼ pixan yéetel tiʼ jaaj» (Juan 4:24).
20. ¿Baʼax uláakʼ tsʼoʼok u yáantik Jéeoba u naʼat u kaajal?
20 Jéeobaeʼ maʼ chéen tsʼoʼok u beetik u naʼataʼal bix unaj u nuʼuktaʼal u kaajaliʼ yéetel bix unaj u naʼatal baʼax ku yaʼalik le Bibliaoʼ, tsʼoʼok xan u beetik u naʼataʼal bix u kʼáat ka kuxlak le máaxoʼob meyajtikoʼ. Jeʼex tu jaʼabil 1973 naʼataʼabeʼ, le tsʼuʼutsʼ chamaloʼ upʼéel baʼal ku kʼaskúuntik u wíinklil máak yéetel upʼéel baʼal jach kʼeban tu táan Dios (2 Corintoiloʼob 7:1). Diez jaʼaboʼob tiʼ leloʼ La Atalaya 1 tiʼ noviembre tiʼ 1983 tu tsolaj wa maʼalob ka yanaktoʼon upʼéel tsʼoon. Le baʼaxoʼob tsʼoʼok k-ilkaʼ chéen wa jaypʼéel tiʼ le baʼaloʼob eʼesik bix u sáasilkúuntik Jéeoba u beel le máaxoʼob meyajtikoʼ.
Maʼ u xuʼulul k-xíimbal teʼ bej táan u bin u maas sáasiltaloʼ
21. ¿Bix unaj k-tuukul utiaʼal maʼ u xuʼulul k-xíimbal teʼ bej táan u bin u maas sáasiltaloʼ?
21 Utúul sukuʼun úuch káajak u beetik u nuxibileʼ, tu yaʼaleʼ «maʼ chéen chʼaʼabil u éejemtik máak le kʼeexoʼob ku beetaʼaloʼoboʼ». ¿Baʼax áant le sukuʼun u kʼam le yaʼab kʼeexoʼob tsʼoʼok u yantal ichil le cuarentaiocho jaʼaboʼob joʼopʼok u kʼaʼaytik u maʼalob péektsilil le Reinooʼ? Letiʼeʼ ku yaʼalik: «Baʼax áantik máakeʼ letiʼe u tuukul jeʼex u tuukul Jéeobaeʼ. Wa maʼ k-kʼamik le kʼeexoʼoboʼ yaan k-pʼáatal paachil, maʼ ken k-múul xíimbal yéetel u kaajal Dios. Ken talamchajakten in kʼamik wa baʼax kʼeexileʼ, kin tuukul tiʼ le baʼax tu yaʼalaj Pedro tiʼ Jesusaʼ: “Yuumtsil, ¿Tiʼ máax jeʼel u páajtal k-bineʼ? A tʼaanoʼobeʼ u tʼaaniloʼob kuxtal minaʼan u xuul”. Teen túuneʼ kin waʼalik: “¿Tuʼux maas jeʼel in bineʼ? ¿Yaan wa in súut tu éekʼjochʼeʼenil le yóokʼol kaabaʼ?”. In tuukul beyaʼ ku yáantken in kʼam tuláakal le kʼeexoʼob ku yantal ichil u kaajal Diosoʼ» (Juan 6:68).
22. ¿Bix u yáantkoʼon le sáasil ku tsʼáaik Jéeobaoʼ?
22 Le yóokʼol kaabaʼ tiaʼan ich éekʼjochʼeʼenileʼ. Jeʼex u bin u maas sáasilkuntaʼal tumen Jéeoba u beel le máaxoʼob meyajtikoʼ, yaan u maas ilaʼal u jelaʼaniloʼob tiʼ le máaxoʼob maʼatech u meyajtkoʼob Diosoʼ. ¿Bix u yáantkoʼon le sáasil ku tsʼáaik Jéeobaoʼ? Jeʼex maʼ tu lukʼul u joolil upʼéel bej kex ka juʼuluk yéetel sáasileʼ, u Tʼaan Dios xaneʼ maʼ tu luʼsik le talamiloʼoboʼ. Baʼaleʼ, le sáasil ku taal tiʼ Diosoʼ ku yáantkoʼon k-tséelt le talamiloʼoboʼ yéetel ku yáantkoʼon utiaʼal maʼ u xuʼulul k-xíimbal teʼ bej táan u bin u maas sáasiltaloʼ. Bey túunoʼ maʼ u jáawal k-chʼenxikintik u tʼaan Dios ku keʼetel yéetel «jumpʼéel sáasil ku sáasilkunaj tiʼ jumpʼéel kúuchil éekʼjochʼeʼen» (2 Pedro 1:19).
¿Kʼajaʼan wa tech?
• Jéeobaeʼ, ¿bix tsʼoʼok u bin u maas sáasilkúuntik u beel máaxoʼob meyajtik utiaʼal ka u naʼatoʼob bix unaj u nuʼuktaʼal u kaajal?
• ¿Baʼaxoʼob tsʼoʼok u naʼataʼal yaan yil yéetel baʼax ku yaʼalik le Bibliaoʼ?
• Techeʼ, ¿baʼax kʼeexiloʼob tsʼoʼok a wilik u yantal, yéetel baʼax áantech utiaʼal ka a kʼamoʼob?
• ¿Baʼaxten a kʼáat xíimbal teʼ bej táan u bin u maas sáasiltaloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 27]
Le noj muchʼtáambal beetaʼab tu jaʼabil 1922 teʼ Cedar Point (Ohio, Estados Unidosoʼ), tu jach líiʼsaj u yóol le sukuʼunoʼob utiaʼal u kʼaʼaytajoʼoboʼ
[U tsolajil le oochel teʼ táan juʼun 29]
N. H. Knorr táan u yeʼesik le Traducción del Nuevo Mundo de las Escrituras Griegas Cristianas tu jaʼabil 1950