14 Xookil

 U amigoʼob Dioseʼ maʼatech u beetkoʼob baʼaloʼob kʼaastak

Satanaseʼ mantatsʼ ku yilik ka u beet máak baʼaloʼob kʼaastak. Wa a kʼáat a beetaba u amigo Dioseʼ kʼaʼabéet a pʼektik le baʼaloʼob u pʼekmaj letiʼoʼ (Salmo 97:10). Koʼox ilik jujumpʼéel tiʼ le baʼaxoʼob u pʼekmaj Diosoʼ:

U yantal baʼax u yil utúul xiib yéetel utúul koʼolel. «Maʼ tusik a núup yéetel yaanal máax.» (Éxodo 20:14, NM.) U yantal baʼax u yil utúul xiib yéetel utúul koʼolel maʼ tsʼokaʼan u beeloʼobeʼ upʼéel kʼeban tu táan Dios (1 Corintoiloʼob 6:18).

Le káaltaliloʼ. «Maʼ bíin utiaʼaltoʼob u [reino] Jajal Dios le máaxoʼob [...] ku káaltaloʼoboʼ.» (1 Corintoiloʼob 6:10.)

Le abortooʼ yéetel u kíimsik máak u yéet máakiloʼ. «Maʼ a kíimsaj.» (Éxodo 20:13.)

Le ookoliloʼ. «Maʼ a wookol.» (Éxodo 20:15.)

U tuus máak. Jéeobaeʼ u pʼekmaj «le chiʼob ku tuusoʼoboʼ» (Proverbios 6:17).

 U sen pʼuʼujul máak yéetel u beetik loob. Jéeobaeʼ «ku pʼektik yéetel tuláakal u yóol le máaxoʼob [u] yaabiltmajoʼob le [...] looboʼ» (Salmo 11:5). Ichil «le máaxoʼob ku binoʼob tu paach le kʼaakʼas tsʼíibolaloʼoboʼ» tiaʼan le máaxoʼob «séebaʼan u pʼuʼujuloʼob[oʼ]» (Galaciailoʼob 5:19, 20).

U buul máak. «Maʼ u yantal mix baʼal a wileʼex yéetel le máax  [...] [tsʼíiboltik] taakʼin[oʼ].» (1 Corintoiloʼob 5:11.)

U pʼektaʼal le máaxoʼob yaanal u razaʼoboʼ. «Yaabilt a [enemigoʼex], payalchiʼineneʼex tu yoʼolal le máaxoʼob pochʼikeʼexoʼ yéetel ku chʼaʼapachtikeʼexoʼ.» (Mateo 5:43, 44.)

Le baʼaxoʼob ku yaʼaliktoʼon Diosoʼ utiaʼal k-utsil. U jaajileʼ maʼ chéen chʼaʼabil u beetaʼal le baʼaxoʼob ku yaʼalik Diosoʼ, baʼaleʼ yéetel u yáantaj Jéeoba bey xan yéetel u yáantaj u j-jaajkunajoʼobeʼ, techeʼ jeʼel u páajtal a náachkuntkaba tiʼ le baʼaxoʼob u pʼekmajoʼ (Isaías 48:17; Filiposiloʼob 4:13; Hebreob 10:24, 25).