Tu kʼiinil 13 tiʼ diciembre tiʼ 2024, le Tribunal de Distrito de Saviolovski yaan Moscúoʼ tu yaʼaleʼ le sukuʼun Alexánder Serebriakovoʼ yaan u kʼaʼalal cinco años cárcel. Le sukuʼunaʼ tsʼokaʼaniliʼ u yáax juzgartaʼal tu kʼiinil 8 tiʼ agosto tiʼ 2022, aʼalaʼab kaʼacheʼ seis años ken u máans cárcel, chéen baʼaleʼ maʼ kʼaʼaliʼ.

Kex junpʼéel año yáax juzgartaʼak Alexándereʼ ook le policíaʼob tu yotochoʼ ka tu machoʼob. Tu kʼiinil 20 tiʼ septiembre tiʼ 2023, bisaʼab kʼalbil mientras u páaʼtik u juzgartaʼal tu kaʼatéen.

Teʼ kaʼapʼéel juicioʼob beetaʼab tiʼ Alexánderoʼ taʼak u pool de ke letiʼ bin organizartik le reuniónoʼob ku beetik u testigoʼob Jéeobaoʼ. Le ka tsʼoʼok le u kaʼapʼéel juicio beetaʼabtiʼoʼ Alexándereʼ tu yaʼalaj: «Apóstol Pabloeʼ tu tsʼíibtaj: ‹Tuláakal le máaxoʼob u kʼáatoʼob u tsʼáaʼob ichil u kuxtaloʼob baʼax tu kaʼansaj Cristo yéetel u adorartoʼob Dioseʼ yaan xan u chʼaʼpachtaʼaloʼob› (2 Timoteo 3:12). Apóstol Pabloeʼ kex maʼ chéen juntéen juzgartaʼabeʼ chúukpaj u yóol tiʼ Jéeoba. Teen xaneʼ tsʼoʼok in chʼaʼtuklik u seguer in meyajtik Jéeoba. Jach kin tsʼáaik u graciasil tiʼ Dios tumen letiʼeʼ tsʼoʼok u tsʼáaikten muukʼ yéetel jeetsʼelil, le jeʼeloʼ tsʼoʼok u yáantken utiaʼal maʼ u jach lúubul in wóol. Le oʼolal maʼ tu xuʼulul in waʼalik: ‹¡Alabartaʼak Jéeoba!›».

K-ojel Jéeobaeʼ bey junpʼéel lugar seguro utiaʼal u taʼakikuba máakeʼ le oʼolal mantatsʼ k-kʼáatiktiʼ ka u yáant Alexánder (Nahúm 1:7).