UMBUESÁ 21
Mayé yamuñhã yambeu arama ñheenga purangawaá resé?
Kuaírantuwana, Jeová ireino rupí usú umbawa pañhe yapurarawaá irum. Pañhe awá uprecisari ukuá kuá ñheenga purangawaá resé. Jesus umundú idiscípuloitá ta umbeu arama kuá ñheenga purangawaá pañhe miraitá supé! (Mateu 28:19, 20) Mayé Umbeusaitá Jeová resé ta umuñhã maã Jesus umunduwaá?
1. Mayé Mateu 24:14 uyumuñhã uikú yané tempo upé?
Jesus umbeu: ‘Aintá urikuté ta umbué kuá ñheenga purangawaá pañhe mundo kití.’ (Mateu 24:14) Umbeusaitá Jeová resé ta upitá surí ta umuñhã rupí kuá murakí importantewaá. Yambeu kuá ñheenga purangawaá resé usasá piri 1.000 ñheenga rupí! Yaprecisari yamuñhã esforço asuí yayupreparari puranga yamuñhã arama kuá murakí. Yamuñhã kuá murakí añhũ Jeová ajuda resewara.
2. Mayé yamuñhã kuá murakí?
Yaputari yambeu Bíblia resé miraitá supé mamentu ta uikuwaá. Mayé cristãoitá ta umuñhãwaá yawé kuxiíma kuera, yandé yambeu Bíblia resé ‘ukaitá rupí’. (Ato 5:42) Aiwã, yapoderi yakuntari siya miraitá irum muíri akayú. Amuramé ti yawasemu miraitá ta ruka upé, ape yambeu yuíri Bíblia resé rua rupí. Yasikari yakuntari Jeová resé asuí ivontade resé miraitá supé ma horantu yapoderiwaá yakuntari.
3. Awá urikuté umbeu ñheenga purangawaá resé?
Pañhe cristãoitá supiwaá ta urikuté ta umbeu kuá ñheenga purangawaá resé amú miraitá supé. Kuá murakí importante yandé arama. Yandé yamuñhã pañhe maã yapoderiwaá yajudari arama miraitá ta uyusalvari. (Releri 1 Timóteo 4:16.) Ti yapurandú ne maã isikuyara, ñhãsé Bíblia umbeu: “Perikuwana sikuyaraímawaá, ape kurí pemeẽ amuitá supé sikuyaraímawaá yuíri.” (Mateu 10:7, 8) Amuramé yepeyepé ti ta usendú uputari yandé. Ma ti yapituú yambeu Bíblia resé ñhãsé yaputari yasendú Jeová asuí yamusurí ipiá.
REYUMBUÉ PIRI ARAMA
Remaã maã xinga Umbeusaitá Jeová resé ta umuñhã ta umbeu arama Bíblia resé pañhe kuá mundo upé. Asuí remaã mayé Jeová uajudari uikú yandé.
Ta umbeu Bíblia resé pañhe kuá mundo upé: (A) Costa Rica, (B) Estados Unidos, (C) Benin, (D) Tailândia, (E) Yap, (F) Suécia
4. Yasikari kirimbá yambeu Bíblia resé pañhe miraitá supé
Umbeusaitá Jeová resé ta uyuesforçari retana ta umbeu arama ñheenga purangawaá resé miraitá supé pañhe mamé. Pemaã kuá VÍDEO. Ariré pekuntari kuá resé:
-
Maã remanduári maã resé Umbeusaitá Jeová resé ta umuñhãwaá ta umbeu arama Bíblia resé?
Peleri Mateu 22:39 asuí Romawaraitá 10:13-15. Ariré pekuntari kuá resé:
-
Mayé yané murakí uxari ta ukuá yasaisuwaá miraitá?
-
Mayé Jeová umaã awá umbeu ñheenga purangawaá resé? — Pemaã versículo 15.
5. Yapurakí Deus irum
Yandé yakuá Jeová uabençoari uikú yané murakí. Remaã maã usasá Nova Zelândia upé yané mũ irum iserawaá Paul. Yepé ara karuka ramé umbeu ramé Bíblia resé ukaitá rupí, aé uwasemu yepé kuñhã upuranduwaá Deus irum uikú kuema rameté. Kuá kuñhã usari Deus rera Jeová asuí upurandú yepé mira usika arama ipiri umbué arama Bíblia resé ixupé. Paul uñheẽ: “Musapiri hora riré, ixé anupá kuá kuñhã rukena resé.”
Peleri 1 Korintowaraitá 3:9. Ariré pekuntari kuá resé:
-
Mayé kuá exemplo uxari yakuá Jeová uajudari uikú yamuñhã arama kuá yané murakí?
Peleri Ato 1:8. Ariré pekuntari kuá resé:
-
Marã yaprecisari Jeová ajuda yambeu arama Bíblia resé miraitá supé?
Rekuáwana será kuá resé?
Muíri semana yayumuatiri ramé yayumbué mayé yapoderi yambeu puranga piri Bíblia resé. Reyumuatiriwana será yané irum? Regustari será maã resé remaã ape?
6. Yasendú maã Deus umunduwaá yamuñhã arama
Apóstoloitá tempo ramé, yepeyepé ta usikari ta umuñhã Jesus discípuloitá ta upituú ta umbeu Bíblia resé. Ma cristãoitá ti ta upituú asuí ta usikari juíz ajuda ti arama ta upituú ta murakí. (Filipowaraitá 1:7) Umbeusaitá Jeová resé ta umuñhã kuayé yané tempo upé yuíri. a — Pemaã nota.
Peleri Ato 5:27-42. Ariré pekuntari kuá resé:
-
Marã ti yasú yapituú yambeu Bíblia resé? — Pemaã kuá versículoitá 29, 38 asuí 39.
SÁ YEPÉ MIRA UPURANDÚ: “Marã Umbeusaitá Jeová resé ta usú ukaitá rupí?”
-
Mayé resuaxara?
MAÃ REYUMBUÉ
Jesus umbeu idiscípuloitá supé ta umbué arama Bíblia resé pañhe tetamaitá rupí. Jeová uajudari uikú imiraitá ta umuñhã arama kuá murakí.
Remanduári arama
-
Mayé yamuñhã yambeu arama ñheenga purangawaá resé pañhe kuá mundo upé?
-
Mayé yané murakí uxari ta ukuá yasaisuwaá miraitá?
-
Indé arama será kuá murakí upoderi umusurí yandé? Marã?
REPUTARI SERÁ REKUÁ PIRI?
Remaã mayé Umbeusaitá Jeová resé ta umbeu Bíblia resé tawa turusuwaá upé.
Ta umuñhã yepé campanha importantewaá ta umbeu arama Bíblia resé Paris upé (5:11)
Maã Umbeusaitá Jeová resé ta umuñhã ta uajudari arama miraitá ta uyawáuwaá ta retama suí amú tetama kití?
Ta uajudari uyawáuwaitá ta retama suí ta uyumbué arama Bíblia resé (5:59)
Margarita usari ivida umbeu arama ñheenga purangawaá resé. Remaã marã umuñhã ramé kuayé umusurí aé.
Remaã mayé cristãoitá ta umuserana ta ruayanaitá tribunal upé ti arama ta upituú ta umbeu Bíblia resé.
a Nota: Deus umundú yambeu arama ñheenga purangawaá resé. Yawé arama, ti yaprecisari apigaitá ta uxari yandé yamuñhã kuá murakí.
