Mairamé usasá yepé maã puxiwerawaá, amuramé miraitá ta upurandú: “Marã usasá kuayé?” Resú repitá surí Bíblia uñheẽwaá rupí kuá resé!

1. Mayé puxiwerawaá uyupirũ kuá mundo upé?

Yurupari upitá Jeová ruaxá. Aé uputari umundú miraitá resé. Yawé arama, aé umuñhã Adão asuí Eva ta upitá yuíri Deus ruaxá. Mayé Yurupari umuñhã kuayé? Aé ukuntari yepé gananisá Eva supé. (Gênesi 3:1-5) Aé umuñhã Eva umaité Jeová ti uxari aé urikú yepeyepé maã purangawaá. Umbeuwaá rupí Yurupari umuñhã ta umanduári miraitá ta usú ta uikú surí piri ti ramé ta usendú Deus. Ariréwara, aé ukuntari yepesá gananisá. Aé umbeu Eva ti usúma umanũ. Yawewaá resewara Bíblia useruka Yurupari “ugananiwerawaá aé, ñhãsé aeté gananisá ipaya aé”. — João 8:44.

2. Maã Adão asuí Eva ta uparawaka ta umuñhã?

Jeová umeẽ siya maã purangawaá Adão asuí Eva supé. Deus umbeu ta upoderi ta uú pañhe iwá iyá Éden upé, ãnhũ yepé umbaá. (Gênesi 2:15-17) Ma aintá ti ta usendú asuí ta uú ñhã iyá. Eva ‘uyuka iwá iyá asuí uú’, ariré Adão ‘uú yuíri’. (Gênesi 3:6) Adão asuí Eva aintá perfeito kuera, ape ti iwasú ta umuñhã arama satambikawaá. Ma aintá ta uparawaka ti ta usendú Jeová. Ta umuñhã ramé kuayé ta umuñhã pecado asuí tiã ta uputari Deus mayé ta Ruixawa. Yawewaá resewara ta upurará retana. — Gênesi 3:16-19.

3. Maã usasá yané irum Adão asuí Eva ta umuñhãwaá resewara?

Mairamé Adão asuí Eva ta umuñhã pecado, aintá ta upitá tuyué asuí ta umanũ. Aiwã, ta umusasá pecado pañhe yandé arama. Bíblia umbeu Adão resé: “Ape kuayé pecado uwiké kuá mundo kití yepé apigá irum, asuí pecado resewara manũsá usika, yaweté yuíri kuá manũsá uwari aintá resé pañhe kuaitá apigawaitá ñhãsé aintá umuñhã aintá pecado pañhe aintá.” — Romawaraitá 5:12.

Ape, marã taá yapurará? Amuramé yapurará ti resewara yaparawaka puranga yepeyepé maã. Amuramé yapurará amuitá ta uparawaka resewara puxiwera. Asuí yuíri amuramé yapurará ñhãsé usasá yepé maã tiwaá yasarú. — Releri Eclesiaste 9:11.

 REYUMBUÉ PIRI ARAMA

4. Awá será umuñhã yapurará?

Siya miraitá ta umaité Deus umundú kuá mundo upé. Supí será? Pemaã kuá VÍDEO.

Peleri Tiago 1:13 asuí 1 João 5:19. Ariré pekuntari kuá resé:

• Será Deus umuñhã puxiwerawaá asuí umuñhã yapurará?

5. Remaã maã usasá Yurupari umundú resewara kuá mundo upé

1. Adão asuí Eva aintá perfeito kuera asuí ta uviveri paraíso upé. Ma aintá ta usendú Yurupari asuí ta upitá Jeová ruaxá.

2.   Yarikú pecado, yapurará asuí yamanũ ta umuñhãwaá resewara.

3. Jeová usú umbawa pecado, purarasá asuí manũsá irum. Miraitá ta usú kurí ta upitá masiíma asuí ta usú ta uviveri yepé paraíso upé.

6. Jeová uyupreocupari yapurarawaá irum

Será Deus uyupreocupari yapurará ramé? Yasú yamaã maã rei Davi asuí apóstolo Pedro ta umpinimawaá kuera. Peleri Salmuitá 31:7 asuí 1 Pedro 5:7. Ariré pekuntari kuá resé:

• Mayé umbeu kuá versículoitá, Jeová umaã mayé yapurará asuí uputari uajudari yandé. Mayé reyusaã rekuá resewara kuá resé?

 MAÃ REYUMBUÉ

Yurupari, Adão asuí Eva ta umuñhãwaá usika puxiwerawaá yané resé. Jeová uyupreocupari yané rupí asuí kuaírantuwana usú umbawa pañhe yapurarawaá irum.

Remanduári arama

• Mayé Yurupari uganani Eva?

• Maã usasá yané irum Adão asuí Eva ta umuñhãwaá resewara?

• Maã uxari yakuá Jeová uyupreocupari yapurarawaá irum?