Ehe. Vavolombelon̈o Jehovah tsy manohitry fan̈anaovan̈a vaksiny. Zahay mahita fa anjarany Kristianin̈y tsiaraikiaraiky manapakevitry na izy han̈ano na tsy han̈ano. Maro Vavolombelon̈o Jehovah nan̈ano vaksiny.

 Zahay mifidy fitahan̈a ten̈a tsara, baka io zahay ten̈a mankasitraka fandrosoan̈a amy resaka fahasalaman̈a, fotony mampihen̈y fahafatesanolo marary raha zen̈y. Ten̈a man̈ano mersy mare iro pikarakara fahasalaman̈a ndreky olo jiaby miaraka miasa amindro zahay, indraka eky an̈atiny valan̈aretin̈y ty.

 Miaraka miasa amy piasany fahasalaman̈a koa Vavolombelon̈o Jehovah. Ohatra, rango tamy vo nanombohany valan̈aretin̈y COVID-19 ty, zahay tsy voly man̈aboaka lahatsoratra misy fampatsiarovan̈a maro amy volan̈a anjatony amy tranonkalanay ao, mandrisiky olo han̈araka torohevitry momba fiarovanten̈a amy valan̈aretin̈y io. An̈isanizen̈y fan̈ajan̈a elan̈elan̈a, tsy mivorivory, fiobohan̈a, fanasan̈a tan̈ana, fan̈anaovan̈a takombava, baka io torohevitry sasany takiny fanjakana.​—Romanina 13:1, 2.

 Efa ampolony taon̈o Vavolombelon̈o Jehovah efa mankamafy raha aby ty fo amy raha aby aboaka:

•   Resaka fikarakaran̈a fahasalaman̈a zen̈y fanapahankevitrinolo tsiaraikiaraiky.​—Galatianina 6:5.

   “[Gazety ty] tsy mandrisiky olo han̈araka fitahan̈a araiky na mampitovy fitahan̈a hafa, baka io izy ty man̈amia torohevitry momba fitahan̈a. Tanjon̈o aminany ty, han̈ambara ny raha misy baka io anjarany pamaky tsiaraikiaraiky mitsara na mangala fanapahankevitry.”​—Mifohaza! 8 Fevrie 1987.

   “Izikoa fan̈ontanian̈a momba anao ndreky zanakanao han̈ano vaksiny sa tsy han̈ano, anjaranao manapakevitry amy zen̈y.”​—Mifohaza! 22 Aoty 1965.

•   Zahay koa fa marary, zahay mandeha dokotera fotony ten̈a valera aminay fahin̈ana io.​—Asan’ny Apostoly 17:28.

   “Vavolombelon̈o Jehovah mitady karazan̈a fitahan̈a azo antoko maro lera iro misy problemony fahasalaman̈a. Iro ten̈a mankafy fiain̈ana ke man̈ano fomba jiaby aradalàn̈a ndreky tsy mifanohitry amy Baiboly baka iro ho ela velon̈o.”​—Tilikambo Fiambesan̈a 1 Zie 1975.

   “Vavolombelon̈o Jehovah ten̈a mankasitraka aody ndreky fitahan̈a atao amindro. Iro tiho salama tsara, baka ho ela velon̈o. Karaha ataony Lioka, Kristianin̈y tamy taonjato voanalohany tan̈y, misy Vavolombelon̈o Jehovah sasany koa izioty dokotera. Vavolombelon̈o Jehovah ten̈a mankasitraka asa mare ndreky fahafoizanten̈any dokotera aby io. Ravoravo koa iro amy fitahandro dokotera aby io iro.”​—Tilikambo Fiambesan̈a 1 Fevrie 2011.