Tamy taon̈o 2012 boky io niboaka tamy volan̈a pangasinan, volan̈anolo sasany a Philippines an̈y. Miasa amindro tsaiky aby an̈y izio, baka io koa izio mahafeno raha takiny Ministerany Fampianaran̈a an̈y, fotony mila atao amy volan̈a an̈y fampianaran̈a tsaiky aby io.

Mandilatra 100 karazany volan̈anolo a Philippines an̈y, ke rango efa ela iro very hevitry nifidy volan̈a ampianaran̈a tsaiky lekoly. Iro amy Ministerany Fampianaran̈a aby io nan̈eky tsarabe fa “malaky mahay raha” tsaiky aby io, izikoa “volan̈a mahazatra iro antran̈o” ampianaran̈a iro. Nanapakevitry amy zay iro fa atao amy volan̈a isankarazany programo ampianaran̈a tsaiky madiniky a lekoly.

An̈isany volan̈a nifidindro volan̈a pangasinan io. Direkterany lekoly io fo nivolan̈a fa vitsy boky mety vakiny pianatra amy volan̈a io. Ke navy amy fotoan̈any tsarabe Boky Misy Tantara Baka amy Baiboly, naboakany Vavolombelon̈o Jehovah io, tamy fivoriambeny vondroparitry, tamy Novambra 2012 io.

Kadiriny folo arivo boky nirasain̈y tamy fivoriambe io. Ravoravo mare tsaiky aby io ndreky raimandrenindro, fotony tamy volan̈andro nan̈anovan̈a boky io. Nisy olo fivadiany zay nivolan̈a karaha ty: “Tiany zanakanay zalahy boky io e! Haindro tsarabe baka raha volan̈inizio.”

Tafarany nivitany fivoriambe io, nisy Vavolombelon̈o Jehovah sasany nitondra boky io tamy lekoly araiky a Dagupan an̈y. Haravoan̈any papianatra aby tan̈y tamy zen̈y nahazo boky io! Iro io baka efa sahiran̈a nitady boky amy volan̈a io. Boky mandilatra 340 namian̈a iro. Niaraka iro nahazo izio, efa nampianatra tsaiky aby io hamaky teny tamy boky io edy. Io baka volan̈a haindro tsaiky aby io.

Ravoravo koa Vavolombelon̈o Jehovah, fotony nahavita nan̈aboaka boky hampianaran̈a tsaiky aby io. Karaha ty nivolan̈inolo nan̈ampy tamy fandikan̈a Boky Misy Tantara Baka amy Baiboly io: “Efa hainay rango efa ela fa miditry amy fonolo raha vakiny, izikoa atao amy volan̈anany. Zen̈y mahavy Vavolombelon̈o Jehovah mifen̈y mare mandika Baiboly ndreky boky baka amy Baiboly amy volan̈a mandilatra zato karazany.”