Fiboahan’ny Fizaran̈a 1 amy Tantaran’ny Fanompoan̈an’i Jesosy an̈isany raha araiky maventy iambesan’ny Vavolombelon̈on’i Jehovah amy taon̈o ty. Mandeha an-tapitrisany amindrô efa nahita video io. Mbala vo fizaran̈a araiky fo niboaka, kanefa tantara io misy fizaran̈a 18. Akôry ma fomba an̈amboaran̈a video mifampitohy io, aviô ino raha efa nataonao nanohàn̈ana izio?

 Ankamarozan’ny video amy Tantaran’ny Fanompoan̈an’i Jesosy io atao amy sampan̈an’i Aostralazia, aviô kadiriny 50 firaka 80 iô olo amy toeran̈a iô lera mangala video tapany amin’izio. a Mpisaoma tantara ndreky ekipy mpangala video aby io amian̈a hanin̈y matsan̈a hariva aviô goûter. Efa voaoman̈a tsialohaloha ino raha aloky. An̈isany miasa amy Sampan-draharaha Mikarakara Hanin̈y Esther, karaha ty ho izy: “Zahay mivanga hanin̈y amin’olo samihafa amy zen̈y zahay mahazo raha tsara kanefa mora. Ovainay fo koa hamaraozan’ny hanin̈y alokinay amy zen̈y tsy maro raha very.” Kadiriny efatra dôlara iô (18 000 ariary iô) vola ividianan̈a hanin̈in’olo araiky isan’andra.

 Kanefa tsy hanin̈y fo raha ilaindrô fa fiarovan̈a koa. Fiarovan̈a amin’ino? Matetiky tsara sady mafana andra an Aostralia an̈y, ke mahery mare rayon ultraviolet. Misy rahalahy ndreky ranabavy sasany niasa mare nanangana tran̈olay ndreky plasy mba misy alokaloko, karaha io olo tsy main’ny taninandra ela loatra salakady tsy kajon’ny hafanan̈a. Ataondrô mahampy fo kraimo miaro amy masoandra, parasolo aviô rano. Nivolan̈a karaha ty Kevin, rahalahy miasa amy Sampan’asa Momba Feo Ndreky Video: “Ankamarozan’ny mpiara-manompo man̈ano asa aby io betelita kilasimody. Irô ravoravo fo ady manetry ten̈a mare man̈ano asa aby io ndreky asa hafa. Tsy vita tetikasa ty izikoa tsisy irô.”

 Misy tapany sasany amy tantara io nalain̈a video amy sehatra efa namboarin̈y hangalan̈a video, fa sasany ndraiky alain̈a video an̈aty rano ke tsy mety alain̈a video amy birôn’ny sampan̈a ao fôtony manjary tsy miboaka tsara. Ke irô mandeha amy toeran̈a hafa. Amy video man̈aboaka tantara sasany amy Baiboly, ohatra, tsy mety alain̈a amy toeran̈a misy pôtôn’ny jiro, na lalabe godoron aviô tran̈o môdairiny, fôtony tamy fotoan̈a zen̈y mbala tsisy raha karaha zen̈y. Ke mpisaoma tantara ndreky ekipy mpangala video tsy maintsy mandeha lavitry koa fa hangala video tapany amy tantara karaha zen̈y. Tsy maintsy ajarisin̈y ndreky indesin̈y baka iô apetraka amy toeran̈a azo antoko lamba ndreky fitaovan̈a jiaby hampiasain̈y amy izio. Alohan’ny hangalan̈a video, misy rahalahy araiky mangala antoko fa efa misy gropy ndreky rano mety igiahan̈a aviô WC amy toeran̈a io. Irô mpisaoma tantara ndreky ekipy mpangala video aby io mipetraka amy Vavolombelon̈on’i Jehovah marikitry iô, na an̈atin’ny tômôbily, na amin’ny hôtely na tran̈o madiniky hafa mety handrian̈a.

 Ndraikindraiky mandany vola mare fangalan̈a video amy toeran̈a hafa, salakady mandany fotoan̈a ndreky mampakajo koa. Ke tamin’ny 2023, niken’ny Filan-kevi-pitantan̈ana hividianan̈a ekran maventy be araiky mandeha 2,5 tapitrisa dôlara (mandilatran’ny 11 000 tapitrisa ariary). Ekran io fandifasan̈a video. Izio apetraka afaran’ny mpisaoma tantara amy zen̈y karaha tany hafa tany misy izy. Mazava tsara sary aboakan’ny ekran io salakady mifan̈araka tsara amy sary aby io hazavan̈a aboakany, ke karaha tsy an̈aty tran̈o nangalan̈a video aby io. Ke amy ziôty, matetiky atsika efa tsy voatery mandany vola be mangala video antany hafa. Karaha ty ho Darren, rahalahy an̈isan’ny Kômitin’ny Sampan̈an’i Aostralazia: “Tsy kajo be irô mpisaoma tantara aby io koa fa ampiasain̈y ekran be io, aviô ekipy mpangala video koa afaka mimpodimpody mangala video firaka irô afa-pô. Izikoa ambelan̈a an̈y, ohatra, atsika mangala video masoandra tsôfotro, zisty minity vitsivitsy fo anan̈antsika. Fa amin’ny ekran be aby io ndraiky, mety ampodimpody masoandra tsôfotro io firaka mahazo ny ten̈a mety.”

 Fizaran̈a tsiaraikiaraiky amy video Fanompoan̈an’i Jesosy io ilan̈a mpisaoma tantara an-jatony. Fa mbala maromaron’izen̈y koa olo ilain̈a amin’ny ekipy mpangala video. Ino raha tsapandrô momba ezaka atao hikarakaran̈a irô?

 Baka a Melbourne ranabavy Amber. Nan̈ano dia kadiriny 700 kilômetara izy baka ho afaka handray anjara amy tetikasa io. Karaha ty raha nisoratiny: “Niaraka avion-naka nibaidan̈a tamin’ny aeroport, ranadahy aby tamy Betela efa nikarakara zaho mare. Maro Betelita nikaiky zaho hihina na hiaraka higiaka dite tamindrô. Nataondrô raha hahavy zaho ho alaizy zaho koa fa navy tamy tany fangalan̈a video, baka iô nataondrô tsapako fa zaho tiandrô. Maro hatsaran̈a nazoko tan̈y. Tsy hitako sôron̈o aby izy in̈y!”

 Derek ndraiky miaraka miasa amin’ny ekipy mikarakara lafiny tekniky. Karaha ty nambarany: “Maro sampan-draharaha nan̈ampy zahay rango nanampaon̈an’ny tetikasa ty. Zaho ravoravo manan̈a rahalahy ndreky ranabavy maro mafoe fotoan̈a ndreky fanan̈ana aviô angôvo hanohan̈ana tetikasa ty. Irô vôn̈ono han̈ampy salakady tsara fan̈ahy. Hay be fa, na zahay na irô, samby tahin’i Jehovah. Zaho matoky fa tsy vokatran’ny asa ty fo raha maventy amy Jehovah fa firaka amy fomba an̈anaovan̈a izy koa.”

 Zahay mankasitraka anao fôtony an̈isan’ny manohan̈a fan̈aboahan̈a video mifampitohy io koa anao izikoa fa man̈ano fan̈amezan̈a, an̈isan’izen̈y fan̈amezan̈a nataonao tamin’ny donate.jw.org.