Iro Olo Tamboanalohany Tan̈y ma Nipetraka ta Edena?

MINIMINIA hely baka anao amy zaridain̈y araiky maventy be. An̈atinizio ao mangin̈y, tsisy panabataba. Anao tsy miasaloha foeky, avio salama vatan̈a tsy marary. Tsara zahan̈a koa an̈atiny zaridain̈y ao.

Misy folera par kolera an̈aty ao, misy ten̈arano, misy raha maitsoitso tarafiny masoandra na ambany alokaloko. Misy tsiko tsara miarakamy fofokondraha man̈itry. Avio misy feony ravindraha mihetsiketsiky, feony rano mantopa amy vato, misy voron̈o man̈ena ndreky feony biby maro. Misora tianao midoko amy tany karaha zen̈y!

Maro olo mino fa tamy tany karaha zen̈y olombelon̈o voanalohany nipetraka. Efa ela mare nampianaran̈a iro pivavaka amy fivavahan̈a jodaisma ndreky Fivavahan̈a Miaboko Kristianin̈y ndreky fivavahan̈a silamo fa Zan̈ahary niasa Adama ndreky Eva, avio iro napetrany tamy zaridain̈y Edena tao. Baiboly man̈ambara fa niadan̈a sady sambatra iro tao, nifankahazo tsara, avio biby tsy nasiaka. Nifandray tsara tamy Zan̈ahary koa iro. Ke Zan̈ahary nampan̈anten̈a fa hiain̈y tsisy farany amy tany tsarabe io iro.​—Genesisy 2:15-24.

Fivavahan̈a hindoa koa mino fa nisy paradisa taloha tan̈y, fa hafa ndraiky izio amindro. Iro Bodisty aby io ndraiky mino fa karaha paradisa tany jiaby taloha, avio olo sambatra. Ho iro, efa komansy tamy zen̈y iro nanan̈a pitariky iro na Bouddha. Maro koa fivavahan̈a an Afriky mampianatra tantara mira amy tantarany Adama ndreky Eva.

Ke na fivavahan̈a na lovantsofin̈y, samy mampianatra fa nisy ankitin̈y paradisa io taloha tan̈y. Karaha nambarany panoratra araiky zay: “Olo baka tamy kolontsain̈y maro nino fa nisy paradisa taloha tan̈y, ke raha jiaby lavorary, olo nanan̈a fahafahan̈a tsarabe, niadan̈a ndreky sambatra iro. Tsisy raha nampijaly iro, tsisy raha nampiasaloha iro, avio tsisy ady. ... Ke maro olo nanjary ngoma mare paradisa io, ndreky nifen̈y han̈ampody izio ndraiky, fa tsisy nahavita.”

Izio ma tany araiky favian̈a iro tantara ndreky lovantsofin̈y aby io? Iro ngoma paradisa io ma ngoma raha ten̈a efa navy nisy? Marin̈y ankitin̈y ma fa nisy zaridain̈iny Edena zen̈y taloha tan̈y? Adama ndreky Eva zen̈y ma efa navy nisy marin̈y?

Olo sasany man̈adroadro izio ndreky misalasala amy fisianizio. Mandroso mare siansy izioty, ke maro olo mivolan̈a fa zaridain̈iny Edena zen̈y angano fo. Fa ny raha mahagaga, misy olo pivavaka mbala misalasala fo amy fisianizio. Maro baka pitondra fivavahan̈a mampianatra fa zaridain̈iny Edena zen̈y tsiary nisy. Izio zen̈y ho iro tsy tantara marin̈y fa angano ndreky fan̈oharan̈a fo.

Amy Baiboly ao misy fan̈oharan̈a maro ankitin̈y. Avio Jesosy tia nampiasa fan̈oharan̈a malaza tamy zen̈y. Fa amy Baiboly, tantarany Edena io tsy fan̈oharan̈a fa tantara ten̈a nisy ankitin̈y. Ke asa mety atokisan̈a raha hafa koran̈iny Baiboly, izikoa tsy ten̈a nisy zaridain̈iny Edena io? Fa hidinihintsika antsendriky, nan̈ino misy olo misalasala, avio marin̈y ma fisalasalan̈andro io. Nan̈ino ma atsika tsiaraikiaraiky mila mahay raha nandalo ta Edena tan̈y io?