Irô Niaritry Fatsiky Tamy Nôfotro

‘Nasian̈a fatsiky tamy nôfotro zaho, tsy ino zen̈y fa anjelin’i Satana, ke izio tsy vôly mamopoko zaho.’​—2 KORINTIANINA 12:7.

1. Ino aby prôblemo mavoa olo amy ziôty?

 MANDALO raha sarotro ma anao amy ziôty? Izikoa zen̈y, tsarova fa tsy anao zaraiky miatriky raha karaha zen̈y. Amy “fotoan̈a sarotro tsy mora hatrefin̈y” misy atsika ziôty, Kristianin̈y tsy mivadiky miatriky fanoheran̈a maresaka, prôblemo an̈aty fianakavian̈a, aretin̈y, prôblemo ara-bola, hakivian̈a, maty havan̈a, na raha sarotro hafa. (2 Timoty 3:1-5) Amy tany sasany, maro olo mijaly fôtony tsy ampy hanin̈y sady misy ady.

2, 3. Mety ho karakôry fihetsikin’olo koa fa voan’ny prôblemo marary karaha fatsiky, baka iô nan̈ino ratsy raha zen̈y?

² Raha karaha zen̈y mampiasaloha mare, intsaka eky izikoa maromaro amindrô io mantreky aminten̈a indraiky mipaka. Ho Ohabolana 24:10: “Izikoa an̈atiny fotoan̈a sarotro anao kivy, hihen̈y edy angôvonao.” Marin̈y ankitin̈y zen̈y! Izikoa atsika kivy lera misy raha sarotro mandalo amintsika, atsika tsy ho hisy angôvo aviô lôso tsy tapa-kevitry hiaritry firaka amparany eky. Nan̈ino?

³ Izikoa atsika kivy, atsika lôso tsy tafieritreritry tsara eky. Lôso hitantsika maventy be prôblemo mavoa atsika ke atsika hanomboko hitseky. Sasany aby mety hivolan̈a karaha ty: “A Zan̈ahary e, nan̈ino ma zaho ambelanao avoa raha karaha ty?” Izikoa ambelan’olo araiky hidôko an̈atin’ny fônany ao eritreritry ratsy karaha zen̈y, izy mety tsy hahita haravoan̈a eky na koa hanjary tsy hatoky ten̈a eky. Mpanompon’ny Zan̈ahary mety ho kivy mare ke handandan̈a tsy hiady “ady tsaran’ny finoan̈a” eky.​—1 Timoty 6:12.

4, 5. Nan̈ino atsika mivolan̈a fa baka amy Satana mahavy prôblemontsika sasany, kanefa ino raha atokisantsika?

⁴ Raha sarotro mavoa atsika aby io tsy baka amy Jehovah Zan̈ahary. (Jakoba 1:13) Noho atsika mifen̈y tsy hivadiky mahavy atsika miatriky fitsapan̈a sasany. Lan̈iany olo manompo Jehovah hian̈in’i Satana Devoly. Izy baka fahavalon’ny Zan̈ahary farany maventy sady izy ‘zan̈aharin’ny donia ty.’ (2 Korintianina 4:4) Efa hely fotoan̈a anan̈any, ke izy mitady fomba hampakivy olo tsy han̈ano sitrapôn’i Jehovah. Ampijalian’i Satana farany mare irô rahalahintsika eran-tany. (1 Petera 5:9) Marin̈y ndraiky fa tsy Satana mahavy prôblemo jiaby mavoa atsika, fa ndray zen̈y, prôblemo aby io araraotiny baka atsika halemy trôko.

⁵ Nata mampavozo mare karakôry Satana ndreky raha fiadivan̈a alefany, izy ho resintsika fo! Nan̈ino atsika matoky zen̈y? Fôtony Zan̈ahary Jehovah miady miaraka amintsika. Nataony hain’ny mpanomponany ino aby tetiky ampiasain’i Satana. (2 Korintianina 2:11) Volan̈an’ny Zan̈ahary man̈ambara amintsika ino aby fitsapan̈a mavoa ten̈a Kristianin̈y. ‘Fatsiky amy nôfotro’ ikahian’ny Baiboly raha navoa apostoly Paoly. Nan̈ino? Alô zahavantsika fomba an̈azavan’ny Volan̈an’ny Zan̈ahary volan̈a io. Ho hitantsika koa fa tsy atsika zaraiky fo mila fan̈ampian̈a baka amy Jehovah baka hahavita hiaritry raha sarotro.

Nan̈ino Fitsapan̈a aby io Miran̈a Fatsiky

6. Ino ma raha tian’i Paoly volan̈iny amy “fatsiky amy nôfotro” io, aviô mety ino izio?

⁶ Naresaka fitsapan̈a navoa Paoly. Karaha ty raha nasain’ny Zan̈ahary nisoratiny: ‘Nasian̈a fatsiky tamy nôfotro zaho, tsy ino zen̈y fa anjelin’i Satana, ke izio tsy vôly hamopoko zaho, amy zen̈y zaho tsy han̈ambony ten̈a loatra.’ (2 Korintianina 12:7) Ino ma fatsiky tamy nôfotron’i Paoly io? Izikoa misy fatsiky tafilentiky an̈atin’ny ain̈y an̈y marary mare. Zen̈y man̈aboaka fa nisy raha nampijaly Paoly. Mety vatan̈anany narary, na koa fihetseham-pônany, na irô roe mitambatra foeky. Mety narary maso Paoly na mety nanan̈a aretin̈y hafa. Mety an̈isany fatsiky io koa olo aby tsy nan̈eky porofo namezany fa izy apostoly, ke tsy nan̈eky fa ten̈a raha maventy asa fitorian̈a ndreky fampianaran̈a nataony io. (2 Korintianina 10:10-12; 11:5, 6, 13) Fa ndray ino ndray ino fatsiky io, izio nilentiky mare sady tsy afaka.

7, 8. a) Ino dikan’ny volan̈a ‘tsy vôly nampijaly’ io? b) Nan̈ino atsika mila miaritry fatsiky jiaby mampijaly atsika amy ziôty?

⁷ Fatsiky io tsy vôly nampijaly Paoly. Tsara ho hay fa matoanteny nampiasain’i Paoly tiô nalainy baka tamy volan̈a griky “filiferan̈an’ny rantsantan̈ana.” Volan̈a io ampiasain̈y ara-bakiteny amy Matio 26:67, fa atao fan̈oharan̈a ndraiky izio amy 1 Korintianina 4:11. Amin’ny andininy aby io, volan̈a io ivolan̈ana avoa ôndry. Satana Devoly farandraha tsy tia Jehovah ndreky mpanomponany eky, ke azo antoko fa misaora ravoravo izy nahita fatsiky io tsy vôly nampijaly Paoly. Ravoravo koa Satana amy ziôty koa atsika fa maharen̈y mijaly amy fatsiky amy nôfotrontsika.

⁸ Ke karaha Paoly, mila haintsika akôry atao mandresy fatsiky aby io. Man̈avotro fahin̈anantsika fahaizantsika zen̈y. Tsarova fa tian’i Jehovah atsika hiain̈y tsisy farany amy donia vaovao. Efa tsy ho hisy an̈y eky irô prôblemo karaha fatsiky mampijaly atsika aby io. Ke baka atsika hahazo kadô tsarabe zen̈y, atsika namezan’ny Zan̈ahary ohatra tsara maro an̈atin’ny Volan̈anany ao an̈aboahan̈a fa nisy mpanomponany tsy mivadiky nahavita nandresy fatsiky tamy nôfotrondrô. Irô io olombelon̈o karaha atsika fo salakady tsy lavorary. Alô atsika handiniky sasany amindrô ‘vavolombelon̈o marobe’ aby io fôtony zen̈y mety han̈ampy atsika ‘hanohy lomoay irahin̈y ataontsika ndreky haharitry amy zen̈y.’ (Hebreo 12:1) Izikoa atsika misaintsain̈y raha niaretandrô, atsika hatoky fa ho vitantsika handresy lan̈iany fatsiky hampiasain’i Satana hamangoan̈a atsika.

Fatsiky Nampijaly Mefiboseta

9, 10. a) Ino aby nahavy fatsiky tamy Mefiboseta? b) Akôry nan̈aboahan’i Mpanjaka Davida hatsaram-pan̈ahy tamin’i Mefiboseta, aviô akôry angalantsika tahaka Davida?

⁹ Diniha hely tantaran’i Mefiboseta, zanakan’i Jonatana kamaradin’i Davida. Tamin’i Mefiboseta dimy taon̈o, nisy olo nitondra hafatra fa naty Jonatana babany ndreky Mpanjaka Saoly dadilahiny. Nialamboetry man̈angy nitaiza izy. ‘Taitry mare izy ke direkty niraparapa izy nitondra Mefiboseta nilefa. Lavo tsaiky io ke nanjary nalemy vity.’ (2 Samoela 4:4) Hay be fa misaora karaha fatsiky tamin’i Mefiboseta antsanany lera izy be.

¹⁰ Farandraha tian’i Mpanjaka Davida eky Jonatana baban’i Mefiboseta. Ke taon̈o maromaro tafara tatỳ, izy nan̈aboaka hatsaram-pan̈ahy feno fitiavan̈a tamin’i Mefiboseta. Nampodin’i Davida taminany tanin’i Saoly jiaby, baka iô Ziba mpanompon’i Saoly nitindreny hikarakara tany io. Karaha ty koa ho Davida tamin’i Mefiboseta: ‘Hihina amy latabatranaka fo anao.’ (2 Samoela 9:6-10) Misaora nahazo angôvo mare Mefiboseta koa fa nan̈aboahan’i Davida fitiavan̈a, ke raha zen̈y nan̈ampy izy niatriky jalinany tamin’ny antsanany io. Tsara leson zen̈y! Atsika koa mila man̈aboaka hatsaram-pan̈ahy amin’olo aby miaritry fatsiky amy nôfotro.

11. Ino raha nivolan̈in’i Ziba momba Mefiboseta, kanefa akôry ahaizantsika fa izy navandy? (Zahava lamariky amy pazy ambany.)

¹¹ Tafara tatỳ, Mefiboseta tsy maintsy niaritry fatsiky amy nôfotro hafa koa. Ziba mpanomponany baka nankaratsy izy tamy Mpanjaka Davida. Tamy fotoan̈a io Mpanjaka Davida tsy maintsy nilefa niala ta Jerosalema fôtony Absaloma zanany nivadiky taminany. Ziba nivolan̈a fa Mefiboseta zen̈y nivadiky, ke kinia nidôko ta Jerosalema tan̈y fôtony izy nan̈anten̈a hanjary mpanjaka. a Ninoan’i Davida vandin’i Ziba, ke nadosony tamin’i Mefiboseta tany jiaby namezany izy in̈y aviô namezany Ziba.​—2 Samoela 16:1-4.

12. Ino raha nataon’i Mefiboseta tamy raha navoa izy io, baka iô nan̈ino izy ohatra tsara amintsika?

¹² Mefiboseta fo izikoa fa nifanôjy tamin’i Davida, nambarany izy ny marin̈y. Izy efa nioman̈a han̈araka Davida fa navy baka tan̈y Ziba namitaka izy ke nivolan̈a fa handeha hisolo ten̈a izy. Nivalian’i Davida ma raha ratsy io? Ia fa tapany fo. Nizarainy tamindrô roe lahy tany in̈y. Fatsiky tamy nôfotro karazany hafa koa araiky zen̈y tamin’i Mefiboseta. Kivy ma izy? Tsy nikeny ma fanapahan-kevitrin’i Davida io? Nivolan̈a ma izy fa tsy rariny raha navoa izy io? Ehe, izy nanetry ten̈a ke nikeny fo raha tapakan’ny mpanjaka. Izy nifantoko tamy lafin-tsarandraha ke ravoravo fôtony tafimpody soamantsara araiky ten̈a manan̈a zo ho mpanjakan’ny Israely. Mefiboseta ten̈a nan̈ambela ohatra tsara fôtony izy niaritry fo ndray nisy antsa, nankaratsian’olo, aviô diso fan̈antinan̈a.​—2 Samoela 19:24-30.

Niaretan’i Nehemia Fitsapan̈a Navoa Izy

13, 14. Ino aby fatsiky tsy maintsy niaretan’i Nehemia tamin’izy nimpody hanangana ndraiky riban’i Jerosalema?

¹³ Diniha koa fatsiky an̈ohatra tsy maintsy niaretan’i Nehemia tamin’izy nimpody ta Jerosalema tamy taonjato fahadimy T.K. Mbala tsisy riba tanàna io tamy zen̈y. Hitany tsisy fiarovan̈a foeky tanàna io. Nikorontan̈a ndreky kivy aviô naloto tamason’i Jehovah koa irô Jiosy tafimpody tan̈y aby io. Mpanjaka Artaksersesy efa nan̈aomba irô hanangana ndraiky riban’i Jerosalema. Fa ndray zen̈y, tsy ela hitan’i Nehemia fa halandrô governairan’ny tanàna nan̈odidin̈y tiô asa nan̈irahan̈a izy io. ‘Tsy ravoravo irô koa fa naharen̈y fa nisy olo navy han̈ano raha tsara amy vahoakan’Israely.’​—Nehemia 2:10.

¹⁴ Mpanohitry aby io nifen̈y erakan’ny vitandrô hampijanon̈o asan’iry Nehemia. Nimenasendrô irô, namoraon̈andrô vandy, nankaratsindrô, nampitahôrindrô, aviô irô nan̈iraka olo hitsikilo irô tan̈y foeky misy hampakivy iry Nehemia. Hay be fa karaha fatsiky nilentiky tan̈atin’ny ain̈in’i Nehemia tan̈y raha zen̈y. Ke resindrô ma izy? Ehe! Izy tsy kivy foeky fôtony izy natoky Zan̈ahary tanteraka. Ke izikoa fa tafitsangana amy zay riban’i Jerosalema, hitandrô tsarabe fa nanohan̈a irô Jehovah salakady tia irô.​—Nehemia 4:1-12; 6:1-19.

15. Ino prôblemo nisy tamindrô Jiosy aby io ke nampijaly Nehemia?

¹⁵ Governaira Nehemia ke izy tsy maintsy niatriky prôblemo hafa tan̈ivon’ny vahoakan’ny Zan̈ahary. Prôblemo aby io miran̈a fatsiky nampijaly izy mare koa fôtony nisy vokany tamy fifandraisan’ny vahoaka io tamy Jehovah. Irô mpan̈arivo aby io baka nitaky zanabola be loatra, ke irô rahalahindrô masikiny aby io tsy maintsy nafoe tany ndreky nivarotro zanaka ho andevo foeky misy han̈ifan̈a trosandrô ndreky latety amian̈a Persy. (Nehemia 5:1-10) Maro Jiosy efa tsy nan̈aja Sabata eky aviô tsy nanohan̈a Levita ndreky tempoly. Sasany tamindrô koa nanambady ‘man̈angy baka ta Asdoda, Amona, ndreky Moaba.’ Nampalahelo Nehemia mare raha zen̈y! Fa tsisy ndray araiky tamindrô fatsiky aby io nahavita nampijanon̈o izy. Nifen̈y fo izy nazoto nan̈araka lalàn̈a marin̈in’ny Zan̈ahary. Karaha Nehemia, irarian̈a atsika tsy han̈ambela raha ratsy ataon’olo hampivadiky atsika amy Jehovah.​—Nehemia 13:10-13, 23-27.

Maro Olo Tsy Mivadiky Nahavita Niaritry

16-18. Ino prôblemo tan̈atin’ny tokantran̈on’i Isaka ndreky Rebeka, Hana, Davida, ndreky Hosea ke nampijaly irô mare?

¹⁶ Baiboly ao misy ohatran’olo maro niatriky raha sarotro mety ampotovisin̈y amy fatsiky. Matetiky prôblemo an̈atin’ny tokantran̈o fo mahavy fatsiky aby io. Baka tamy vadin’i Esao aroe vavy ‘nahavy Isaka ndreky Rebeka nalahelo mare’ kanefa irô olobeny. Ndray Rebeka aby nivolan̈a fa sitrany foeky izy maty. (Genesisy 26:34, 35; 27:46) Miniminia koa Hana. ‘Nampijaly izy’ mare Penina rafivaviny, fôtony Hana tsy niteraka. Efa matetiky donko Hana nangin̈y sady niaritry tamy raha zen̈y tan-tran̈onany ao. Nisy fotoan̈a aby Penina nankaratsy izy tamason’olo lera irô jiaby niaraka nandeha nan̈aton̈o fety ta Silo niaraka tamin’ny havandrô ndreky kamaradindrô. Ke tamy zen̈y, miran̈a nahainalentiky tan̈atin’ny ain̈in’i Hana fo fatsiky io.​—1 Samoela 1:4-7.

¹⁷ Mba miniminia koa raha niaretan’i Davida nohon’ny Mpanjaka Saoly rafozandahiny nafana fô izy. Tsy maintsy nisitriky tan̈atin’ny lavabato tankodahodan’ny tany paiky ta En-jedy tan̈y izy baka izy tsy hofoaty. Izy tsy maintsy nan̈aniky bongo be ndreky tany feno vatovato nampavozo. Misaora namparômotro izy raha tsy rariny navoa izy io fôtony tsisy raha ratsy nataony tamy Saoly. Kanefa izy tsy maintsy niasa nilefa fo tan̈atin’ny taon̈otaon̈o. Nohon’ny Saoly nafana fô izy fo naviany zen̈y.​—1 Samoela 24:14, 15; Ohabolana 27:4.

¹⁸ Iritrireta koa prôblemo tan̈atin’ny tokantran̈on’i Hosea mpaminan̈y. Nandiadia izy vadiny. Raha nataon’ny vadiny zen̈y misaora miran̈a fatsiky nitrebiky tan̈atin’ny fôn’i Hosea. Misaora nalahelo mare koa izy tamy vadiny niteraka aroe tsy ninany.​—Hosea 1:2-9.

19. Karakôry fan̈injehan̈a niaretan’i mpaminan̈y Mikaia?

¹⁹ Fatsiky amy nôfotro koa fan̈injehan̈a. Diniha baka raha niain̈an’i mpaminan̈y Mikaia. Izy olo marin̈y, ke azo antoko fa nalahelo mare izy nahita fa Ahaba mpanjaka ratsy fan̈ahy nangala mpaminan̈y diso maro sady nino vandindrô. Nivolan̈in’i Mikaia tamin’i Ahaba fa baka amy ‘fan̈ahy mavandy’ raha nivolan̈indrô mpaminan̈y aby io. Ke ino raha nataon’ny sefondrô mpaminan̈y aby io koa fa naharen̈y zen̈y? ‘Namezany hipy’ Mikaia! Fa mbala ratsiratsin’izen̈y raha nataon’i Ahaba tamy Jehovah nampitandrin̈y fa ho resy izy lera hiady han̈ampody Ramota-gileada. Nasain’i Ahaba nigadrain̈a Mikaia, aviô nataony hely fo hanin̈y namian̈a izy. (1 Mpanjaka 22:6, 9, 15-17, 23-28) Tsarova koa Jeremia ndreky raha nataon’olo nan̈ian̈a izy sady tihamono izy aby io.​—Jeremia 20:1-9.

20. Ino aby fatsiky tsy maintsy niaretan’i Naomy, aviô ino kadô nazony?

²⁰ Malahelo mare koa atsika lera misy havantsika maty. Miran̈a fatsiky amy nôfotro koa raha zen̈y. Nalahelo mare iziô Naomy koa fa naty vadiny ndreky zanany aroe lahy. Tan̈atin’izy mbala nalahelo be in̈y, izy nimpody ta Betlehema. Izy nivolan̈a tamindrô kamaradiny aby io fa tsy Naomy ikahian̈a izy fa Mara. An̈aran̈a io baka nahavolan̈a tsarabe irifirin’ny raha navoa izy io. Tamy farany, nitahin’i Jehovah fo fiaretan̈anany ke izy nahazo zafy. Tsaiky io nanjary razamben’i Mesia.​—Rota 1:3-5, 19-21; 4:13-17; Matio 1:1, 5.

21, 22. Very ino aby Joba, baka iô akôry nataony niatriky raha zen̈y?

²¹ Aleva onon̈o baka akôry tsapan’i Joba tamin’izy naharen̈y fa niaraka naty tampoko zanany folo, mboany bibinany ndreky mpanomponany jiaby. Nivadiky ambony ambany tiô fiain̈ananany! Kanefa mbala tan̈atin’izy niatriky raha jiaby zen̈y, nampararin’i Satana koa izy. Joba nieritreritry fa hamono izy foeky aretin̈y io. Nanehoko mare baka vatan̈anany, ke efa fahafatesan̈a edy niritriretiny fa aodin’izio.​—Joba 1:13-20; 2:7, 8.

²² Nahainampiaho raha koa vadiny, karaha raha mbala tsy ampy alahelo ndreky tehokon’i Joba. Nahinakinaka izy nahita Joba ke ho izy: ‘Ozon̈a Zan̈ahary baka iô matesa!’ Volan̈a zen̈y misaora miran̈a fatsiky nitrebiky tan̈aty vatan̈an’i Joba efa naneko be in̈y. Baka tiô koa raha nataondrô kamaradinany telo lahy. Tsy nan̈amia korazy izy irô fa nan̈ano nahay raha kanefa nan̈amia tsin̈y izy ndreky nivolan̈a fa izy zen̈y nanota. Zen̈y ho irô antony nahavy Joba nijaly. Azo antoko fa vandy aby zen̈y mira nahainampilentiky fatsiky tan̈atin’ny ain̈in’i Joba fo. Aza adin̈a koa fa tsy hain’i Joba ino nahavy izy voan’ny prôblemo jiaby io. Tsy hainy koa fa izy tsy hofoaty. Kanefa “tamy raha jiaby zen̈y, Joba tsy nanota sady tsy nan̈amia tsin̈y Zan̈ahary foeky.” (Joba 1:22; 2:9, 10; 3:3; 14:13; 30:17) Izy tsy nivadiky foeky, nata maro mare fatsiky nitrebiky tamin’ny ain̈inany. Ten̈a mankahery môdelinany!

23. Nan̈ino irô olo tsy mivadiky nikoran̈intsika aby io nahavita niaritry fatsiky isan-karazany?

²³ Mbala tsy ohatra jiaby izy nikoran̈intsika aby io, fa mbala misy maro hafa amy Baiboly ao. Irô olo tsy nivadiky aby io samby tamy fatsiky tsy maintsy niaretandrô. Tsy mitovy koa prôblemo navoa irô. Ndray zen̈y, misy raha itovizandrô. Irô samby tsy vôly nanompo Jehovah. Tsy mora fitsapan̈a navoa irô, kanefa resindrô fo Satana fôtony Jehovah nan̈amia angôvo irô. Tamy fomba karakôry? Ho hitantsika amy lahatsoratra man̈araka valin’izen̈y.Ho hitantsika ao koa akôry fomba hiaretantsika raha jiaby miran̈a fatsiky mitrebiky amintsika.

[Lamariky amy pazy ambany]

Akôry Hamalianao Ty?

• Nan̈ino prôblemo aby io mety ampitovisin̈y amy fatsiky amy nôfotro?

• Ino aby fatsiky amy nôfotro niaretan’i Mefiboseta ndreky Nehemia?

• Azôvy amin’ny lelahy ndreky viavy niaritry fatsiky tamy nôfotro koran̈in’ny Baiboly ao ny ten̈a tianao alain̈a tahaka, aviô nan̈ino?

[Fan̈ontanian̈a]

[Sary]

Mefiboseta niaritry fo ndray izy nisy antsa, nankaratsian’olo, aviô kivy

[Sary]

Nehemia niaritry fo ndray nisy olo nanohitry izy