Sarin’ny Tany Nampan̈antinain̈y

Tamy Lalan̈a Mandeha a Silo: Tsaiky Misy Jery Ndreky Maditry

ANAO koa fa mieritreritry tanàna, na faritry tamy Tany Nampan̈antinain̈y tan̈y, misy lelahy ndreky viavy malaza ma avy an̈atin’ny jerinao? Pôsibla, fôtony ankamarozan’ny tantara amy Baiboly ao mikoran̈a momba olo efa be. Fa karakôry ndraiky tsaiky? Azôvy amindrô avy an̈atin’ny jerinao?

Sary an̈abo io man̈ampy atsika hifantoko amy tantara misy tsaiky. Sasany amindrô nan̈ambela ohatra tsara arehan’ny Kristianin̈y, fa sasany ndraiky ohatra ratsy. Bongo boribory an̈ivo io mety faritry nisy Silo. a

Mety tsaroanao donko fa tamin’ny Israelita aby io niditry tamy Tany Nampan̈antinain̈y, ta Gilgala marikitry Jeriko antsendriky nananganandrô tabernakelin’ny Zan̈ahary. (Josoa 4:19) Fa tany koa fa voazara, nafindra ta Silo tran̈olay masin̈y io, tsy ino zen̈y fa foiben’ny fanompoam-pivavahan̈an’ny Israely. (Josoa 18:1) Silo io 30 kilômaitara avaratran’i Jerosalema, amy faritry be bongon’i Efraima an̈y. Lelahy ndreky viavy man̈eran̈a Israely nandeha ta Silo. Maro tamindrô nivorivory tamy vavasaha tatsimon’ny tany nisy tabernakely. (Josoa 22:12) Mety nisy tsaiky koa ma tiô?

Nisy sasany navy. Samoela an̈isan’ny tsaiky haintsika. Ry olobeny, Elkana ndreky Hana, nipetraka tamy tanàna hely tambadikindrô bongo tandrefan̈a tan̈y. Isaka taon̈o, irô fivadiany nandeha ta Silo. Mety niaraka tamindrô koa zanakan’i Elkana tamy vadiny araiky hafa. Tamy farany, nitahin’i Jehovah Hana ke niteraka lelahy. Nataony Samoela an̈aranany. Tafara tatỳ, izy nindesindry olobeny nipetraka ta Silo ke hanompo tamy tabernakely tao niaraka tamin’i Ely mpisôron̈obe.​—1 Samoela 1:1–2:11.

Maro asan’ny tsaiky io tamy tran̈on’ny Zan̈ahary tao, fa azo antoko fa mety nisy fotoan̈a izy nafaka nandeha nitsangatsangana tamy bongo tankila tiô. (1 Samoela 3:1, 15) Sasany tamindrô io nisy lalan̈a rary vato sady feno vodin’ny kakazo ôlivy, karaha hitantsika amy sary amy pazy 9. Hitanarô tilikambo hely vita tamy vato io? Irô mpamboly na mpiambin̈y ôndrikôndriky baka lavitry aby io mety nanonga tiô niambin̈y rahandrô. Mety nanonga tiô koa Samoela tamin’izy mbala hely, nitazan̈a raha man̈odidin̈y. (Ampiràn̈a amy 2 Tantara 20:24.) Tan̈abo tarỳ nahatazan̈a tsara ke hita fo izikoa nisy bibidỳ.

Tamy fotoan̈a zen̈y, mbala be atiala fa tsy karaha ziô, aviô tan̈aty ala nahitavan̈a bibidỳ miôdiôdy. (Josoa 17:15, 18) Ahaizantsika zen̈y, raha nandalo tamin’i Elisa. Izy lelahy nanjary mpaminan̈in’ny Zan̈ahary farany maventy. Elisa koa fa niala ta Jeriko nanonga ta Betela, izy nandalo tamy faritry io. Izio 16 kilômaitara atsimon’i Silo. Asa akôry nataon’olo ta Betela tao koa fa nahita izy? Tao baka nanjary foiben’ny fivavahan̈a tamin’ny zanaka aombilahy volamena. (1 Mpanjaka 12:27-33; 2 Mpanjaka 10:29) Irô olo be tamy tanàna io tao nanohitry mpaminan̈in’i Jehovah io mare, ke nifindra tamy zanakandrô koa jerindrô.

Mpanjaka faharoe 2:23, 24 mivolan̈a fa nisy andian’ny tsaiky maromaro nikotran̈a mpaminan̈in’ny Zan̈ahary io karaha ty: ‘A saola be ty, manongà! A saola be ty, manongà!’ Zen̈y nahavy Elisa ‘nan̈ozon̈o irô tamin’ny an̈aran̈an’i Jehovah. Ke nisy orsy aroe vavy niboaka baka tan̈aty ala nankaifa efapolo aroe amby tamy tsaiky aby io.’ Karazan̈a orsy menan’ny Syrie io farandraha nasiaka ndreky kafiry mare izikoa tahirin̈y na izikoa misy olo tihikafiry zanany. (2 Samoela 17:8; Ohabolana 17:12; 28:15) Biby io nampiasain’ny Zan̈ahary nan̈ano didim-pitsaran̈anany tamin’olo tsy nan̈aja solonten̈anany fôtony mira tsy man̈isy fôtiny izy fo olo man̈ano zen̈y.

Tsaiky mety nifanôjo bibidỳ tamy bongon’i Silo tan̈y. Dikan’izen̈y fatatra finoan̈a ankitin̈y oloben’i Samoela matoa irô nitondra izy hanompo tamy tabernakely tan̈y.

Misy mpanompon’ny Zan̈ahary araiky taloha tan̈y koa nan̈aboaka finoan̈a ndreky fahafoizan-ten̈a karaha zen̈y. Tsy azôvy izio fa Jefta mpitsara. Tamy faritry be bongo ta Gileada, tantin̈ianan’i Jordana tan̈y izy nipetraka. Jefta nafana fô mare niaro Jehovah ke niady tamin’ny Amonita aby io. Izy nan̈ano vava fa olo voanalohany mitsena izy hamiany Jehovah. Kanefa azôvy olo nitsena izy voanalohany? Zanany man̈angy mbala virjiny. Izio zaraiky fo zanany. Ke izy nindesin’i Jefta tamy tran̈olay masin̈in’ny Zan̈ahary ta Silo tan̈y. Tan̈y zanany io nipetraka ndreky nanompo Zan̈ahary tan̈atin’ny taon̈otaon̈o.​—Mpitsara 11:30-40.

Samoela ndreky zanakan’i Jefta man̈angy tsy nivadiky salakady nahafoe ten̈a tamy Zan̈ahary. Irô ten̈a ohatra tsara tamy tsaiky nipetraka tamy faritry Silo tan̈y. Irô tsy nan̈ano karaha irô tsaiky 42 nierin̈olo be aby in̈y sady nan̈adroadro mpaminan̈in’i Jehovah.​—Ampiràn̈a amy 1 Korintianina 10:6, 11.

[Lamariky amy pazy ambany]

[Sary nazahoan̈a lalan̈a]

Pictorial Archive (Near Eastern History) Est.

[Sary nazahoan̈a lalan̈a]

Pictorial Archive (Near Eastern History) Est.

[Sary nazahoan̈a lalan̈a]

Safari Zoo, Ramat-Gan, Tel Aviv