“Tsara fan̈ahy mare iro Vavolombelon̈o Jehovah aby io, ary tsy taminolo fo fa firaka taminy amboanaka madiniky aby io koa. Nisy madamo zay nan̈ano fampirantian̈a tiô, tandraraiky. Elaine an̈aran̈anany. Namezany biskoỳ amboanaka. Zahay tafara koa fa nandalo narikitry tany fan̈anaovandro fampirantian̈a tiô, tsy nan̈eky amboanaka aby io koa tsy nan̈aton̈o tarỳ, fotony iro tihahazo biskoỳ.

“Nandeha fanjava, karaha zen̈y fo nataonay. Ravoravo amboanaka aby io nahazo biskoỳ, fa zaho ndraiky ravoravo nikoran̈a taminiry Elaine. Fa tamy voanalohany, zaho tsy dia nazoto nikoran̈a tamindro loatra. Kadiriny 70 taon̈o zaho tamy zen̈y, avio tsy haiko tsarabe ino marin̈y ma raha inoany Vavolombelon̈o Jehovah. Sady zaho koa efa diso fan̈antin̈ana tamy Fivavahan̈a Protestant, ke ho zaho tamy jeriko tan̈y, sitrany zaho tômpiny fo mampianatra Baiboly ain̈inaka.

“Tan̈atiny fotoan̈a jiaby zen̈y, zaho nahita Vavolombelon̈o Jehovah nan̈ano fampirantian̈a fo tantany hafa tantanàna tan̈y. Tsara fan̈ahy mare koa iro. Isaka zaho nan̈ontany raha iro, nampiasa Baiboly fo iro namalian̈a fan̈ontanian̈a, ke nahainatokisako fo iro.

“Tandraraiky, nan̈ontany zaho karaha ty Elaine: ‘Anao ma mino fa biby aby io kadô baka amy Zan̈ahary?’ Ho zaho: ‘Ia, zaho mino zen̈y.’ Nivakiany Elaine taminaka baka tiô Isaia 11:6-9. Nanomboko tiô zaho nanjary tihianatra Baiboly, fa zaho fo mbala tsy tihangala boky ndreky gazety namiandro zaho.

“Brent an̈aran̈any ramoseny Elaine. Nilamin̈y koran̈anay tsy ela tafaranizen̈y, ndray fôhiky fo koran̈anay. Nirahindro namaky Matio firaka aminy Asan’ny Apostoly zaho, beky ho haiko karakory ma ten̈a Kristianin̈y zen̈y. Zen̈y ankitin̈y raha nataoko. Tsy ela tafaranizen̈y, tampisasahany taon̈o 2016, zaho nan̈eky nianatra Baiboly niaraka tamindro roe fivadiany.

“Efa tsy din̈iko aby haviany lera fianarako Baiboly isaka herin̈iandra ndreky lera fandihanan̈a amy Tran̈o Fivorian̈a. Ravoravo zaho nahay raha ten̈a koran̈iny Baiboly. Natao batisa zaho taon̈o araiky sy sasany tafaranizen̈y, ke nanjary Vavolombelon̈o Jehovah. Zaho iziô efa 79 taon̈o. Haiko fa nahita ny marin̈y ankitin̈y zaho. Nitahiany Jehovah zaho ke nikeny ho an̈isany fianakaviambenolo manompo izy erantany.”