Anao Mila Ten̈a Tapakevitry Tsarabe
Anao Mila Ten̈a Tapakevitry Tsarabe
“Ty zaraiky fo raha ten̈a man̈ampy olo pifima sigarety ho tafiala amy sigarety: Ten̈a tapakevitry tsarabe hiala amizio.”—“Aza Mifima Eky!”
ANAO koa tihiala amy sigarety, anao mila tapakevitry tsarabe antsendriky hiala izio. Ino raha han̈ampy anao amy zen̈y? Mba diniha hely baka hatsaran̈a ho azonao izikoa anao tsy mifima sigarety.
Anao hahavita hitsitsy vola. Anao koa mahalany sigarety pake araiky isanandra, mety ho lany vola an̈etsiny isaka taon̈o. “Tsy nampoiziko foeky fa kaiky vola be karaha zen̈y laniko amy sigarety.”—Gyanu, Népal.
Hahaitsara fiain̈ananao. “Zaho koa fa voly sigarety, hitako fa ten̈a tsara fiain̈ananaka sady mbala mahaitsara fo.” (Regina, Afrika Atsimo) Mahaitsara fomba fandrin̈esanolo araiky fofokondraha ndreky sirondraha, izy koa fa voly sigarety. Ny raha misy koa, izy loso mahaimatanjaka ndreky mahaitsara vatan̈a ndreky sora.
Hahaitsara fahasalaman̈anao. “Hahaihalaky ho janga olo araiky izikoa fa voly sigarety na firy taon̈o izy na firy taon̈o.”—Foibe Miady Aminy Aretin̈y, Etazonỳ.
Hahaihatoky ten̈a fo anao. “Niala tamy sigarety zaho fotony tsy tiako handivozinizio. Zaho tiako mikomandy ain̈inaka fa tsy izy.”—Henning, Danemark.
Hahazo hatsaran̈a koa ry havanao ndreky ry namanao. ‘Sigarety io koa mamparary ry havanao ndreky namanao. Hita tamy fan̈adikadin̈ana fa andrivony olo matiny kanserany poumon ndreky aretimpo, baka amy setroko sigaretinolo.’—Fikambanan̈a Amerikain Miady amy Kansera.
Mamparavoravo Zan̈ahary niasa atsika. “Havako aby, irarian̈a atsika han̈adio ain̈intsika, baka atsika ho afaka amy raha jiaby mandoto nofotro ndreky sain̈y.” (2 Korintianina 7:1) “Hamianaro ain̈inaro ... masin̈y, baka io ankasitrahiny Zan̈ahary.”—Romanina 12:1.
“Izikoa fa haiko fa tsy tiany Zan̈ahary olo mandoto vatan̈a, direkty zaho tapakevitry niala sigarety.”—Sylvia, Espagne.
Ny raha hita, matetiky tsy ampy izikoa tapakevitry fo fa mila fan̈ampian̈a baka aminolo hafa koa. An̈isanizen̈y fan̈ampian̈a baka amy naman̈a ndreky havan̈a koa. Ino raha mety han̈ampiandro anao?