FIZARAN̈A 9
Miaraha Manompo Jehovah
“Mivavaha amy pan̈amboatra lan̈itry ndreky tany.”—Apokalypsy 14:7
Hitantsika tamy boky ty fa amy Baiboly ao misy toro lalan̈a maro han̈ampy anaro tran̈o araiky. Tiany Jehovah ho sambatra anaro. Izikoa fanompoan̈a izy ataonaro voalohantoeran̈a, izy mivolan̈a fa ‘ho azonaro edy raha jiaby ilainaro.’ (Matio 6:33) Tiany mare izikoa anaro hanjary kamaradinany. Tsisy raha tsara mandilatra zen̈y. Ke ataova raha jiaby hankatsaran̈a fihavan̈ana aminany. —Matio 22:37, 38.
1 ATAOVA RAHA HIHAVAN̈ANARO TSARABE AMY JEHOVAH
KORAN̈INY BAIBOLY: “ ‘Zaho ho babanaro, baka io anaro hanjary zanako lelahy ndreky zanako man̈angy’, volan̈iny Jehovah.” (2 Korintianina 6:18) Tiany Jehovah anaro hanjary kamaradinany, ke zen̈y mahavy izy mandrisiky anaro hivavaka aminany isanandra. (1 Tesalonianina 5:17) Ambarà izy raha an̈aty fonaro ndreky raha jiaby mampiasa loha anaro, fa izy von̈ono hitandren̈y anaro. (Filipianina 4:6) Izikoa anao miaraka mivavaka amy fianakavian̈anao, ho hitandro fa anao ten̈a matoky Jehovah.
Anaro koa mila mitandren̈y izy, ke tokony hianatra Baiboly ndreky boky momba Baiboly. (Salamo 1:1, 2) Aleva onon̈o tsarabe raha ianaranaro amy Baiboly ao. (Salamo 77:11, 12) Mitandren̈y Jehovah koa anaro, izikoa tsy manapatapaka fivorian̈a.—Salamo 122:1-4.
Mila mikoran̈a aminolo raha momba Jehovah koa anaro, baka ho tsara fihavan̈ana aminany.—Matio 28:19, 20.
AKORY AN̈ANOVAN̈A ZEN̈Y?
-
Manokàna fotoan̈a isanandra hamakian̈a Baiboly ndreky hivavahan̈a
-
Ilain̈y mangala diandian̈a, fa izio fo tsy tokony hatakalonaro fanompoan̈a Jehovah
2 MAZOTOA MAN̈ANO FOTOAMPIVAVAHAN̈ANY FIANAKAVIAN̈A
KORAN̈INY BAIBOLY: “Man̈aton̈a Zan̈ahary, fa izy han̈aton̈o anaro edy.” (Jakoba 4:8) Anaro mila manokan̈a fotoan̈a isaka herin̈iandra, han̈anovan̈a fotoampivavahan̈any fianakavian̈a. (Genesisy 18:19) Fanompoan̈a Zan̈ahary io tokony ho hita amy fiain̈anantsika isanandra. Zen̈y mahavy anao mila mazoto mikoran̈a raha momba Jehovah amy fianakavian̈anao, “na anao mipetraka antran̈o, na mandeha amy lalan̈a, na mandry, na mifoha.” (Deoteronomia 6:6, 7) Man̈anova karaha Josoa. Nivolan̈iny karaha ty: “Izikoa zahay tran̈o araiky edy, zahay hanompo Jehovah.”—Josoa 24:15.
AKORY AN̈ANOVAN̈A ZEN̈Y?
-
Manokàna fotoan̈a han̈anovan̈a fotoampivavahan̈any fianakavian̈a. Ataova mahakasiky anaro jiaby raha dinihinaro amy zen̈y
