LESON 57
Ino Raha Tokony Hataonao Izikoa Anao Nan̈ano Fahotan̈a Maventy?
Anao ndray ten̈a tia Jehovah ndreky mifen̈y mare tsy man̈ano raha halany, ndraikindraiky anao mety tafan̈ano raha tsy mety. Fa kanefa misy fahotan̈a sasany ten̈a maventy ankitin̈y. (1 Korintianina 6:9, 10) Izikoa anao nan̈ano fahotan̈a maventy, aza adin̈a fa Jehovah mbala tia anao, von̈ono han̈ambela hadisovan̈anao ndreky han̈ampy anao fo.
1. Mila man̈ino atsika baka hambelany Jehovah hadisovan̈antsika?
Malahelo mare olo tia Jehovah izikoa fa nan̈ano fahotan̈a maventy. Ndray zen̈y, mankahery iro fampan̈antinan̈any Jehovah amy vahoakanany ty: “Ndray mena dà fahotan̈anaro, hataoko fotsy mangatsakatsaka karaha lanezy.” (Isaia 1:18) Atsika koa ten̈a mibebaka ankitin̈y amy fahotan̈a vitantsika, Jehovah han̈ambela hadisovan̈antsika. Karakory ma mibebaka zen̈y? Izio alahelo mare vokatrany raha ratsy vita, baka io mangataka familankeloko amy Jehovah. Tsy maintsy mifen̈y mare olo araiky nan̈ano raha tsy nety han̈ova eritreritrinany, ndreky hiala amy fahazaran̈a nitariky izy hanota io. Mila mifen̈y koa izy miain̈y mifan̈araka amy toro lalan̈any Jehovah.—Vakia Isaia 55:6, 7.
2. Akory ampiasany Jehovah iro antipan̈ahy aby io izikoa atsika man̈ano fahotan̈a maventy?
Atsika koa nan̈ano fahotan̈a maventy, Jehovah man̈iraka atsika “mikaiky antipan̈ahy amy fiangonan̈a.” (Vakia Jakoba 5:14, 15.) Iro antipan̈ahy aby io ten̈a tia Jehovah ndreky tia ondrikondrikinany. Iro io efa nampianarin̈y fomba han̈ampian̈a atsika hihavan̈a ndraiky amy Jehovah.—Galatianina 6:1.
Akory ataony antipan̈ahy man̈ampy atsika lera atsika nan̈ano fahotan̈a maventy? Antipan̈ahy aroe na telo man̈ampy atsika, ke iro mampiasa Soratra Masin̈y. Iro koa man̈amia atsika torohevitry mety arehan̈a ndreky mankahery, han̈ampy atsika tsy himpody amy fahotan̈a nataontsika in̈y. Iro mety tsy han̈omba atsika han̈ano raha sasany amy fiangonan̈a firaka atsika matanjaka arapan̈ahy ndraiky koa. Fa na azovy na azovy nan̈ano fahotan̈a maventy kanefa tsy mety mibebaka, iro antipan̈ahy aby io handroaka izy, baka hiarovan̈a fiangonan̈a.
ALEVA ONON̈O
Diniha akory ataonao hankasitraka fitiavany Jehovah anao, izikoa anao nan̈ano fahotan̈a maventy.
3. Hihavan̈a tsarabe amy Jehovah ndraiky koa atsika izikoa mamosa raha nataontsika
Misy vokany amy Jehovah fahotan̈a ataontsika, ke zen̈y mahavy atsika mila mivolan̈a aminany raha nataontsika. Vakia Salamo 32:1-5, avio iaraha dinihin̈y fan̈ontanian̈a ty:
-
Nan̈ino ma tsara atsika mamosa amy Jehovah fahotan̈a nataontsika fa tsy man̈asitriky izio?
Ndray atsika efa nan̈ambara raha nataontsika tamy Jehovah, mila mangataka fan̈ampian̈a aminy antipan̈ahy koa atsika. Alifasa VIDEO io, avio iaraha dinihin̈y fan̈ontanian̈a ambany io.
-
Tamy video in̈y, akory nataony antipan̈ahy nan̈ampy Canon himpody tamy Jehovah?
Iro antipan̈ahy aby io natao han̈ampy atsika, ke atsika tsy tokony havozo hivolan̈a ny marin̈y amindro. Vakia Jakoba 5:16, avio iaraha dinihin̈y fan̈ontanian̈a ty:
-
Nan̈ino tsy ho sarotro aminy antipan̈ahy han̈ampy atsika, izikoa atsika mivolan̈a ny marin̈y?
Volàn̈a amy Jehovah fahotan̈a nataonao, mivolàn̈a ny marin̈y aminy antipan̈ahy aby io, avio ikia fan̈ampian̈a feno fitiavan̈a baka amy Jehovah
4. Ino mahatsara fandroasan̈a io?
Izikoa olo araiky nan̈ano fahotan̈a maventy kanefa mbala tsy mety man̈araka fitsipikiny Jehovah fo, izy tsy afaka ho an̈isany fiangonan̈a eky. Izy roasin̈y, ke atsika tsy mahazo miaraka aminany, avio tsy mahazo mivolan̈a aminany foeky. Vakia 1 Korintianina 5:6, 11 ndreky 2 Jaona 9-11, avio iaraha dinihin̈y fan̈ontanian̈a ty:
-
Levira koa ambela an̈aty lafariny, mitombo lafariny io. Karaha zen̈y koa, ino koa vokany amy fiangonan̈a, izikoa iro mbala minaman̈a aminolo nan̈ano fahotan̈a maventy kanefa tsy mibebaka?
Maro amindro olo voaroaka aby io mbala mimpody voaray ndraiky koa, fotony iro tontohitry fa tsy mety ankitin̈y raha nataondro. (Salamo 141:5) Alifasa VIDEO io, avio iaraha dinihin̈y fan̈ontanian̈a ambany io.
-
Tamy video tio in̈y, nan̈ino nan̈ampy Sonja izy navoaroaka in̈y?
Nan̈ino ma fandroasan̈a io…
-
man̈amia voninahitry an̈arany Jehovah?
-
ahitan̈a fa Jehovah io man̈ano ny marin̈y ndreky be fitiavan̈a ankitin̈y?
5. Jehovah mamela helokontsika izikoa atsika mibebaka
Jesosy nan̈ano fan̈oharan̈a han̈azavan̈a amintsika raha tsapany Jehovah, izikoa misy olo araiky mibebaka. Vakia Lioka 15:1-7, avio iaraha dinihin̈y fan̈ontanian̈a ty:
-
Ino raha ianaranao momba Jehovah baka amy zen̈y?
Vakia Ezekiela 33:11, avio iaraha dinihin̈y fan̈ontanian̈a ty:
-
Nan̈ino olo nan̈ano fahotan̈a maventy mila man̈aboaka fa izy nanen̈iny ankitin̈y?
Jehovah mikarakara tsarabe olonany, karaha ataony piambin̈y ondrikondriky in̈y fo
MISY OLO MIVOLAN̈A: “Zaho tsy hivolan̈a aminy antipan̈ahy, tsao zaho roasindro.”
-
Izikoa misy olo mivolan̈a karaha zen̈y aminao, akory ho anao aminany?
INO RAHA NIANARANAO TATO?
Hamela helokontsika Jehovah, izikoa atsika manen̈iny mare nan̈ano fahotan̈a maventy, avio tsy man̈ampody izin̈y eky.
Fan̈ontanian̈a Fameren̈ana
-
Nan̈ino ma tsara atsika mamosa fahotan̈a nataontsika amy Jehovah?
-
Ino raha tsy maintsy ataontsika, baka Jehovah hamela helokontsika?
-
Izikoa atsika nan̈ano fahotan̈a maventy, nan̈ino ma atsika mila mivolan̈a amindro antipan̈ahy aby io?
ZAHAVA
Zahava akory nan̈aboahany Jehovah famindrampo tamy lelahy araiky, karaha koran̈iny Isaia 1:18.
Nan̈ino ma mahatsara olo jiaby fandroasan̈a io?
“Nan̈ino ma Fandroasan̈a io Porofony Fitiavan̈a?” (Tilikambo Fiambesan̈a 15 Avrily 2015)
Hianara akory han̈azavanao fandroasan̈a io aminolo tsy Vavolombelon̈o Jehovah.
Zahava amy tantara “Zaho Mila Mimpody amy Jehovah,” nan̈ino lelahy araiky tsy nan̈araka fahamarin̈ana nianarany tontohitry fa Jehovah nan̈ampy izy himpody aminany.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
