1. Nan̈ino atsika mila mahay raha momba iro anjely aby io?

IZIKOA tiantsika hahay olo araiky, matetiky ilain̈y mahay ry havany. Karaha zen̈y koa Zan̈ahary. Izikoa tiantsika hahay izy, atsika mila mahay tsarabe iro anjely aby io, fotony “Zanaka Zan̈ahary” ikahian̈a iro io. (Joba 38:7) Ino anjara asandro anjely aby io amy fikasan̈any Zan̈ahary? Ino aby raha nataondro anjely aby io, izikoa tantaranolombelon̈o zahan̈a? Misy ifandraisany amy fiain̈ananao ma fisiandro io? Amy fomba karakory?

2. Azovy ma niasa anjely aby io? Firy ma iro io?

² Matetiky Baiboly mikoran̈a momba anjely. Atsika hizaha sasany amy zen̈y, baka atsika hahay iro tsarabe. Azovy ma niasa anjely? Amy Kolosianina 1:16 mivolan̈a karaha ty: “Izy [Jesosy Kristy] nampiasain̈y niasa raha jiaby andan̈itry an̈y ndreky ambony tany eto.” Dikanizen̈y, Jehovah koa fa namoron̈o anjely, izy nan̈iraka Jesosy hiasa anjely tsiaraikiaraiky. Firy ma iro io? Koran̈iny Baiboly  fa anjatony tapitrisa anjely niasainy Zan̈ahary, ke iro jiaby mahery.—Salamo 103:20. *

3. Ino aby raha nikoran̈iny Joba 38:4-7 momba anjely aby io?

³ Baiboly mivolan̈a fa tamy Zan̈ahary niasa tany ty, ‘ravoravo zanaka Zan̈ahary jiaby, ke niaraka nihira.’ (Joba 38:4-7) Dikanizen̈y, tany ndreky olombelon̈o mbala tsendriky honohono ho hisy, anjely aby io efa nisy edy. Hitantsika baka aminy andininy io koa fa anjely aby io mahay ravoravo ndreky mahay malahelo, fotony koran̈iny io fa ravoravo ‘zanaka Zan̈ahary jiaby.’ Anjely jiaby tamy zen̈y nihavan̈a tsarabe ndreky nanompo Jehovah.

4. Akory an̈aboahany Baiboly fa anjely aby io man̈iry hahay raha momba olombelon̈o?

⁴ Rango Zan̈ahary niasa olombelon̈o, anjely tsy mivadiky aby io efa nan̈iry mare hahay raha momba olombelon̈o ndreky raha hataony Zan̈ahary, baka fikasan̈anany tanteraka. (Ohabolana 8:30, 31; 1 Petera 1:11, 12) Izikoa fa nandeha fotoan̈a, hitandro anjely aby io fa maro olo tsy nanompo Jehovah, Zan̈ahary be fitiavan̈a io. Anjely tsy nivadiky aby io tamy zen̈y nalahelo mare. Izikoa fa misy olo araiky niala Jehovah, ke mimpody manompo izy, iro ‘ravoravo’ mare. (Lioka 15:10) Hita baka amy zen̈y fa iro io ten̈a mieritreritry raha mahatsara olony Zan̈ahary. Tsy mahagaga izikoa Jehovah mampiasa iro hankahery ndreky hiaro olonany tsy mivadiky ambony tany eto. ( Vakia Hebreo 1:7, 14.) Zahava baka ohatra aby ty.

5. Ino aby ohatra amy Baiboly ahitan̈a fa anjely aby io ten̈a man̈ampy ankitin̈y?

 ⁵ Tanànany Sodoma ndreky Gomora koa fa niravan̈iny, nisy anjely aroe nitariky Lota ndreky ry zanany man̈angy hiala tao. (Genesisy 19:15, 16) Taon̈o maro tafaranizen̈y, paminan̈y Daniela natsipy tan̈atiny lavaka lion, kanefa tsisy raha navoa izy. Karaha ty nambarany: “Zan̈aharinaka efa nan̈iraka anjelinany namody vavany lion aby io.” (Daniela 6:22) Tamy faha apostoly aby io, nisy anjely nan̈avotro Petera nigadra. (Asan’ny Apostoly 12:6-11) Tamy Jesosy tambony tany teto, nisy anjely koa nankahery izy, taminizy nanomboko fanompoan̈anany. (Marka 1:13) Karaha zen̈y koa, tsy ela talohany namonoan̈a Jesosy, nisy anjely araiky niboaka taminany ndreky “nankahery izy.” (Lioka 22:43) Hay tsarabe fa nan̈amia angovo izy raha zen̈y, tamy fotoan̈a sarotro io!

6. a) Miaro olony Zan̈ahary aminino ma anjely aby io? b) Ino aby fan̈ontanian̈a hivaliantsika?

⁶ Aminandra izioty, anjely aby io efa tsy miboaka aminolo karaha taloha eky. Ndray izy man̈ano zen̈y, anjely mahery aby io mbala miaro olony Zan̈ahary amy raha mety handrobaka fihavan̈andro aminany. Baiboly mivolan̈a karaha ty: “Anjeliny Jehovah mitoby man̈odidin̈y zay olo mavozo izy, ke mamonjy iro.” (Salamo 34:7) Nan̈ino ma raha zen̈y ten̈a tokony hankahery atsika? Fotony misy anjely ten̈a ratsy jery mitady hamono atsika. Azovy iro io? Baka aia iro io? Akory ataondro io man̈isy ratsy atsika? Alohany hamaliantsika zen̈y, zahavantsika antsendriky raha nandalo tamy voanalohany tantaranolombelon̈o tan̈y.

7. Azovy aby an̈isany olo voataon̈ony Satana hiala tamy Zan̈ahary?

⁷ Hitantsika tamy Toko faha-3 tamy boky ty fa nisy anjely araiky nan̈iry hitompoen̈y, ke nanohitry Zan̈ahary. Nanjary Satana Devoly an̈aranany. (Apokalypsy 12:9)  Kadiriny 1 600 taon̈o tafaranizy namitaka Eva in̈y, ankamarozanolo voantsoriny, ke tsy nanompo Zan̈ahary eky. Fa ndray izy man̈ano zen̈y, mbala nisy olo fo tsy nivadiky tamy Zan̈ahary, karaha ataondry Abela, Enoka ndreky Noa.—Hebreo 11:4, 5, 7.

8. a) Akory nahavy anjely sasany nanjary demony? b) Safodrano koa fa navy, ino raha tsy maintsy nataondro demony aby io, baka iro tsy naty?

⁸ Tamy faha Noa, nisy anjely hafa koa nanjary fahavalony Jehovah. Iro niala tandan̈itry tan̈y, nijotso tambony tany, baka io nanjary olo. Ino nahavy iro nan̈ano zen̈y? Genesisy 6:2 mivolan̈a: “Hitandro zanaka Zan̈ahary aby io  fa iro man̈angy zanakanolombelon̈o aby io maro tsara sora. Ke iro nifidy zay tiandro nataondro vady.” Jehovah tsy nandefitry tamindro. Izy nandefa Safodrano tambony tany, hamonoan̈a olo ratsy fan̈ahy jiaby. Olonany tsy nivadiky fo avotro. (Genesisy 7:17, 23) Anjely nivadiky na demony aby in̈y ndraiky voatery niala vatan̈anolombelon̈o, baka io nimpody tandan̈itry. Iro nan̈araka jeriny Devoly, ke Devoly io nanjary “sefony demony.”—Matio 9:34.

9. a) Natao karakory demony aby io, koa fa tafimpody tandan̈itry tan̈y? b) Ino raha hizahavantsika?

⁹ Anjely nivadiky aby in̈y koa fa tafimpody tandan̈itry tan̈y, efa tsy nikeny Jehovah ho an̈isany zanany eky, karaha Satana sefondro fo. (2 Petera 2:4) Iro efa tsy mahavita mivadiky olo karaha taloha eky, fa iro fo mbala mitaon̈o olo han̈ano raha ratsy. Iro dia araiky amy Satana, “mamitaka tany jiaby misy olo.” (Apokalypsy 12:9; 1 Jaona 5:19) Karakory an̈anovandro zen̈y? Iro mamitaka olo. ( Vakia 2 Korintianina 2:11.) Atsika hizaha sasany amy fitakandro zen̈y.

10. Karakory ataondro demony aby io mamitaka olo?

¹⁰ Demony aby io mamitaka olo baka olo ho azondro. Olo araiky mety hifandray amindro mivantan̈a na baka aminolo hafa. Baiboly tsy man̈omba atsika hikoran̈a amindro foeky, na han̈ano raha mety hahavy atsika hifandray amindro anjely ratsy aby io. (Galatianina 5:19-21) Iro demony aby io mira olo mamintan̈a. Iro man̈ano fandriky isankarazany, baka mahavita mamitaka karazan̈olo jiaby.

11. Ino ma sikidy zen̈y? Nan̈ino atsika tsy tokony han̈ano izio?

¹¹ Sikidy an̈isany fandriky ataondro demony aby io. Ino ma sikidy zen̈y? Izio raha ataonolo hahaizan̈a raha momba fiain̈ana, na raha tsy hainolo. An̈atinizen̈y mitety  vintan̈a, man̈ano sikidy karata, mamaky soritry felantan̈ana, mizaha orosikopy, mitady dikany nofy. Maro olo mieritreritry fa tsisy maharatsy man̈ano sikidy, kanefa Baiboly mivolan̈a fa pan̈ano sikidy aby io ndreky anjely ratsy aby io asa araiky. Ohatra, aminy Asan’ny Apostoly 16:16-18 mivolan̈a fa nisy tsaiky man̈angy araiky “nahay raha mbala ho avy”, fotony nisy “demony pan̈ambara raha mbala ho avy” nipetraka taminany. Fa izikoa fa nadoso taminany demony io, izy tsy nahavita nan̈ano zen̈y eky.

12. Ino ivolan̈ana fa ten̈a voafitaka olo mikoran̈a aminolo maty?

¹² Demony aby io koa mandrisiky olo hifandray aminolo maty. Matetiky olo vo naty havan̈a voafitaka amy zen̈y, fotony iro mieritreritry fa olo maty mbala maharen̈y raha. Pisikidy aby io mety hangala tahaka feonolo maty, na hampita hafatra baka aminolo efa maty. Zen̈y mahavy olo maro mieritreritry fa olo naty aby in̈y mbala velon̈o fo. Iro mieritreritry fa ho kirikiry alahelondro, izikoa iro mikoran̈a amindro in̈y. Vandy fo zen̈y, fotony demony aby  io mahavita mangala tahaka feonolo maty, baka io man̈iraka pisikidy hitondra hafatra handeha aminy havany mbala velon̈o. (1 Samoela 28:3-19) Efa hitantsika tamy Toko faha-6 fa olo koa fa maty, tsisy eky. (Salamo 115:17) Voafitakandro anjely ratsy aby io zay “olo mikoran̈a aminolo maty”, sady man̈ano raha halany Zan̈ahary. ( Vakia Deoteronomia 18:10, 11; Isaia 8:19) Ke mitandrema fo baka anao tsy voafikandro demony aby io.

¹³ Anjely ratsy aby io tsy vitany mamitaka olo fo fa mampavozo olo koa. Satana ndreky demony aby io mahay fa ‘efa hely andrandro’ tavela. Iro tsy himboan̈a hamitaka olo eky. Zen̈y mahavy iro romotro mare. (Apokalypsy 12:12, 17) Nisy olo taloha navozo demony aby io, kanefa iro nanjary tsy navozo eky. Karakory nataondro? Ino raha tokony hataonolo araiky baka izy tsy ho voafitakandro anjely ratsy aby io?

14. Karaha nataondro Kristianin̈y ta Efesosy, karakory tokony hataonolo araiky man̈iry hiala amy fandrikindro demony aby io?

¹⁴ Ambarany Baiboly amintsika raha tokony hatao, baka atsika hahavita hanohitry anjely ratsy aby io ndreky hiala fandrikindro io. Zahava raha nataondro Kristianin̈y ta Efesosy, taloha tan̈y. Taminiro mbala tsy Kristianin̈y, iro nan̈ano aody. Karakory nataondro niala tamy zen̈y? Baiboly mivolan̈a karaha ty: “Maro olo pan̈ano aody namory bokindro, ke nan̈oro zen̈y hitanolo jiaby.” (Asan’ny Apostoly 19:19) Karaha zen̈y koa raha tokony hataonolo araiky, izikoa tiany hanompo Jehovah. Mila iroany raha jiaby mifototro fan̈anovan̈a aody, na boky io na gazety, na sary na hira, na aody nazo tamy pisikidy, na raha hafa atao fiambin̈y ain̈y.—1 Korintianina 10:21.

15. Ino koa raha mila ataontsika, izikoa tiantsika hahavita hanohitry anjely ratsy aby io?

 ¹⁵ Tsy ela tafarany Kristianin̈y ta Efesosy aby in̈y nan̈oro bokindro momba mazy in̈y, apostoly Paoly nivolan̈a karaha ty tamindro: ‘Atsika mitolon̈o amy fan̈ahy ratsy aby io.’ (Efesianina 6:12) Dikanizen̈y, demony aby io tsy mety han̈eky resy zen̈y. Ke ino koa raha mbala mila nataondro Kristianin̈y aby io? Paoly nivolan̈a karaha ty: “An̈abony raha jiaby zen̈y, aleva ampinga maventy, finoan̈a zen̈y, hindesinaro hamono zanapaly mirehitry alefany araiky ratsy [Satana].” (Efesianina 6:16) Mahay hahavita hanohitry anjely ratsy aby io fo atsika, izikoa finoan̈antsika fatatra tsarabe.—Matio 17:20.

16. Ino raha mila ataontsika, baka finoan̈antsika ho fatatra tsarabe?

¹⁶ Ino raha mila ataontsika, baka finoan̈antsika ho fatatra tsarabe? Atsika mila mianatra Baiboly. Fatatra lakorovatobe araiky, izikoa fatatra fototronany. Ho fatatra karaha zen̈y koa finoan̈antsika, izikoa atsika mahay tsarabe ny marin̈y amy Baiboly ao. Dikanizen̈y, atsika mila mamaky ndreky mianatra Baiboly isanandra. Finoan̈a karaha zen̈y hiaro atsika amy raha ataondro anjely ratsy aby io, karaha ataony lakorovatobe miaro tanàna in̈y.—1 Jaona 5:5.

17. Ino raha mila ataontsika, izikoa tiantsika haharesy anjely ratsy aby io?

¹⁷ Ino koa raha mila nataondro Kristianin̈y ta Efesosy? Nila fiarovan̈a hafa koa iro, fotony demony fo namehy ­tanàna nisy iro io. Paoly nivolan̈a tamindro karaha ty: “Mivavaha mandraka hariva, na fotoan̈a karakory na fotoan̈a karakory, ambany fitarihany fan̈ahy, sady man̈anova vavaka ndreky fangatahan̈a karazany jiaby.” (Efesianina 6:18) Demony koa mamehy donia misy atsika ty, ke atsika mila mangataka fiarovan̈a baka amy Jehovah, baka tsy resindro. Mazava ho azy fa atsika koa fa mivavaka, mila manon̈ono an̈aran̈a Jehovah. ( Vakia Ohabolana 18:10.) Isanandra, atsika ­tokony hangataka Jehovah ‘han̈adoso atsika aminy  araiky ratsy’, Satana Devoly zen̈y. (Matio 6:13) Jehovah hamaly vavaka baka amy fo karaha zen̈y.—Salamo 145:19.

18, 19. a) Nan̈ino atsika matoky fa ho vitantsika handresy anjely ratsy aby io? b) Ino fan̈ontanian̈a hivaliantsika amy toko fan̈araka ty?

¹⁸ Ten̈a ratsy raha ataondro anjely ratsy aby io. Ndray zen̈y, tsisy raha tokony hatahorantsika iro, izikoa atsika man̈aton̈o Zan̈ahary ndreky man̈ano sitraponany, baka io manohitry Devoly. ( Vakia Jakoba 4:7, 8.) Misy farany angovondro anjely ratsy aby io. Tamy faha Noa, iro efa nisaziny Zan̈ahary, ke tsy maintsy ho avy andra hitsarany Zan̈ahary iro io. (Joda 6) Aleva onon̈o koa fa anjeliny Jehovah aby io mahery, ke iro io afaka miaro atsika. (2 Mpanjaka 6:15-17) Tiandro atsika hahavita handresy anjely ratsy aby io. Tsy vitanizen̈y fo fa iro mba mandrisiky atsika hanan̈o zen̈y koa. Irarian̈a atsika tsy hiala Jehovah ndreky iro anjely tsy mivadiky aby io. Irarian̈a koa atsika tsy hikasikasiky raha momba anjely ­ratsy aby io foeky, fa han̈araka raha koran̈iny Baiboly fo. (1 Petera 5:6, 7; 2 Petera 2:9) Atsika koa man̈ano zen̈y, ho vitantsika handresy anjely ratsy aby io.

¹⁹ Nan̈ino fo ma anjely ratsy aby io ndreky raha ratsy jiaby mampijaly olombelon̈o mbala tsy adosony Zan̈ahary? Amy toko fan̈araka ty atsika hamaly fan̈ontanian̈a io.