Ehe. Baiboly man̈ambara fa Zan̈ahary zaraiky fo tokony hivavahantsika, sady atao aminy an̈arany Jesosy. Karaha ty nivolan̈iny Jesosy tamy pianatranany: “Rainay any an-danitra, hohamasinina anie ny Anaranao.” (Matio 6:9, Fandikan-teny Katolika) Jesosy tsiary nampianatra pianatranany hivavaka aminolo masin̈y, na aminy anjely na aminolo hafa, ankoatrany Zan̈ahary.

 Karaha ty koa nivolan̈iny Jesosy tamy pan̈aradia izy: “Izaho no lalana sy fahamarinana ary fiainana; tsy misy olona mankany amin’ny Ray afa-tsy amin’ny alalako.” (Jaona 14:6, Kat.) Jesosy zaraiky fo nahazo lalan̈a tamy Zan̈ahary han̈ano Pan̈elan̈elan̈a atsika ndreky Zan̈ahary.—Hebreo 7:25.

Karakory izikoa zaho sady mivavaka amy Zan̈ahary avio mivavaka aminolo masin̈y?

 Ty an̈isany raha nivolan̈iny Zan̈ahary tamy Didy Folo: “Izaho Iaveh Andriamanitrao dia Andriamanitra saro-piaro.” (Eksodosy 20:5, Kat.) Ino ma dikanizen̈y? Karaha ty andininteny io amy Soratra Masina—Fandikan-tenin’ny Tontolo Vaovao: “Zaho Jehovah Zan̈aharinao io Zan̈ahary mitaky hanompoanao zaho zaraiky fo.” Zan̈ahary foeky man̈iraka fa izy zaraiky fo tokony hitompoentsika. Dikanizen̈y, aminany zaraiky fo atsika tokony hivavaka.—Isaia 48:11.

 Mampameloko Zan̈ahary atsika izikoa mivavaka aminolo hafa, na aminolo masin̈y zen̈y na aminy anjely. Nisakanany anjely araiky zay apostoly Jaona izikoa fa nitady hivavaka taminany. Karaha ty nivolan̈iny anjely io: “Tandremo, aza manao izany, fa mpanompo namanao ihany koa aho, sy naman’ny havanao izay manana ny fanambaràn’i Jesoa. Andriamanitra no iankohofy.”—Apokalypsy 19:10, Kat.