Nvareryeke akhala wira soohimmwa iyo ti sekeekhai. Ikomentaario sanyu sivarihaneke ni Nuulumo na Muluku, vaweryaneya muhaana osoma mBiibiliyani mwene. Akhala wira munilavula sa siensia, ihapari isya, yoowiiraneya, wala etthu ekina, nvarerye vahinatthi vakhala wira soohimmwa muniromola anyu ti sekeekhai wala nnaari.

Musuweleke otthokiherya. Okathi onitthokiherya anyu soolepa, muhaana othokorerya-tho iversiikulu saattamenle eversiikulu eyo. Mutthokiheryeke muhivirikanyaka soolepa sikina sa mBiibiliyani, nave murumeeleke iliivuru sikumiheriwe ni “murumeyi òroromeleya ni ànkhili”. (Math. 24:45) Mwarumeela soohimmwa sihinikhuma mBiibiliyani, muhaana okhalana ephoole wira muhincererye wala ovirikaniha ele mulipa-oolepa aaphavela awe ohimya.

Mwaakhaliherye alipa-oowiriyana oweha wira itthu iyo ti sekeekhai. Nuumala osoma yoolepa wala oromola, mpakeke makoho aahiiso malikanyiho oophwanelela wira mwaakhaliherye alipa-oowiriyana oweha ovareleya waya muteko mwaha owo.