Nuumala Salomoni okhala mwene a wIsarayeli, Yehova aahimuleela wira: ‘Mukivekele etthu eniphavela anyu’. Salomoni aahaakhula so: ‘Miyo ka mmiravo, nkinsuwela etthu yoopaka . Xontte mukivahe ankhili wira kiweettiheke saana atthu anyu’. Yehova aahimuleela wira: ‘Okhala wira mukivekenle ankhili, miyo kinimookhalihani mutthu a ankhili waavikana atthu otheene a mulaponi. Nave, kinimoovahani mihakhu sinceene. Mwaiwelela sooruma saka kinimuncererya mahiku a ekumi anyu’.

Salomoni aahipacerya oteka etemplo. Owo aahirumeela eweero yooreera, eboronze, miri, ni maluku. Ikonto sinceene sa alopwana ni athiyana ooratta yaahivara muteko ole wooteka etemplo. Nuuvira iyaakha 7, etemplo ele yaahimalihiwa, vano waahiphiya okathi wira ovahereriwe Yehova. Eyo yaahikhalana altari wira ovahiweke mukuttho. Salomoni aahikokhora ohoolo wa altari khuvekela ohimyaka so: ‘Yehova, etemplo ela khahiyo yuulupale ni yooreerexa ni kheniphiyerya owaakhelani. Masi xontte, mweemererye okokhorela wahu ni nwiriyaneke mavekelo ahu’. Yehova oonenle sai etemplo ele ni nivekelo na Salomoni? Omalihakaru ovekela, waahikhuruwa mooro wiirimu ni waahipaha mikuttho saari valtari. Etemplo ele yaahimusivela Yehova. Okathi aIsarayeli yoonale aya mooro owo yaahihakalala.

Ovuwa wa mwene Salomoni waahimwareela wIsarayeli wotheene ni ilapo soorakamela. Atthu yaanirwa onvekela wira aakhaliherye ni mixankiho saya. Hata Pwiyamwene a elapo ya òSaba aahirwa omweehererya ni makoho ooxankiha. Vaavo Salomoni aakhunle awe makoho ale, pwiyamwene ole aahihimya so: ‘Nkaatthunne okupali itthu atthu yaakilenle aya voohimya sa nyuwo, masi vano kooweha wira ankhili anyu aavikana itthu kiiwale aka. Attottopeliwe Yehova Muluku anyu’. AIsarayeli otheene yaanikhalana okumi wooloka ni woohakalaliha. Masi itthu saarowa oturukeya.