Yoobi 10:1-22
10 “Miyo kinnithanya okumi aka.
Kinoohimya okhupanya waka.
Kinoohimya oriipiwa waka murima!
2 Kinoomuhimeerya Muluku wiira: ‘Muhikihimyane mulattu.
Mukileele nthowa naya munikhala anyu ntoko nwanani aka.
3 Muniphwanya-ni mwaakihasulaka,Mwaanyokhaka muteko wa matata anyu,Nave mwaawiriyanaka miruku sa atakhali?
4 Niireke wiira nyuwo murina maitho a pinaatamu,Aahiiso muniweha ntoko pinaatamu oniweha awe?
5 Niireke wiira mahiku anyu anoolikana ni mahiku a apinaatamu,Aahiiso iyaakha sanyu sinoolikana ni iyaakha sa mutthu,
6 Wiira mphavelaseke etampi akaNi muthipeleleke waavya etampi aka?
7 Nyuwo moosuwela wiira miyo nkirina mulattu;Nave khuuvo oniwerya okoopola mmatatani mwanyu.
8 Matata anyu takuupale ni takipanke,Masi vano muniphavela okipwetexa.
9 Xontte, muupuweleke wiira mukuupale ni oloko,Masi vano munikittikiherya vantthupini.
10 Kiira nyuwo mookimwarexa ntoko eleeti,Nave mookikikittha* ntoko ekeexo?
11 Nyuwo mookiwariha nrapala ni ethayi,Nave mookitthava ni makhuva ni mitika.
12 Mookivaha okumi ni ophenta woororomeleya;Mookikhapelela ni moosuka okumi aka.*
13 Masi vamurimani vanyu, muhuupuwela okiirela itthu sootakhala.
Miyo koosuwela wiira itthu iya sinikhuma wa nyuwo.
14 Vaakhanle wiira koottheka, nyuwo mwaamukiweha,Nave khimwaarowa okilevelela etampi aka.
15 Vakhala wiira kookhalana mulattu, weeso kootakhaliwa!
Hata kihirina mulattu, miyo nkinwerya weemexa muru aka,Okhala wiira koosareya wuuliwa muru ni oxanka.
16 Keemexa muru aka, nyuwo munnikixaya siisaale ntoko kharamu onixaya awe,Nave munnitthikela okooniherya owerya wanyu wiira mukikumiherye maxakha.
17 Munnaakumiherya anamoona asya anikivirikanya,Nave munnincererya onanariwa wanyu ni miyo,Nto annikikhumelela maxakha vasulu va maxakha makina.
18 Xeeni muhalaka okihiya kikhumaka mmirimani mwa amaama?
Fataari kaakhwiiye kihinatthi owehiwa ni mutthu.
19 Vaarowa okhalaka ntoko wiira nkinakhale;Kaarowa ovirelela mmahiye, kikhumaka mmirimani’.
20 Kiira mahiku aka ari vakhaani? Muluku okihiye mekhaka;Maitho awe akihuluwe wiira kimumule vakhaani,*
21 Kihinatthi orowa nipuro nenlo kihinrowa aka otthika,Elapo yeeyo yootepa oriipela,
22 Elapo ya epiphi yuulupale,Elapo ya muuttutthi woowoopiha ni yoowaakanyereya.Weiwo waarya onlikana aya ni epiphi”.
