1. Itthu xeeni mwiixuntte anyu voohimya sa Mpattuxa?

NIIREKE nyuwo muyariwe etthoko ya Anamoona a Yehova? Akhala wira ti siiso, okhuma enamwane anyu, nyuwo muhiixuttihiwa itthu voohimya sa Yehova. Nave anamuyari anyu aawiixuttihani wira Yehova tori Mpattuxa, ookhalana mikhalelo sooloka ni oniphavela wiiriha elapo okhala Eparayiisu.—Maph. 1:1; Mit. 17:24-27.

2. Atthu akina aniwoonela sai ale anikupali wira ookhala Mpattuxa?

² Atthu anceene, khanikupali wira Muluku ookhala ni khanikupali wira owo tori Mpattuxa. Awo anikupali wira okumi okhumelenle mekhaya, nuumala-vo sinapacerya othatuwa itthu saamukhaani sirina okumi mpakha itthu suulupale sikumi. Atthu anceene anikupali itthu iyo, toosoma vanceene. Woonasa wene, atthu awo anihimya wira siensia ohooniherya wira Biibiliya khahiyo eekeekhai ni atthu ale anikupali wira ookhala Mpattuxa, atthu oohisoma, ahinsuwela etthu ni oowaakuwa owokiwa.

3. Xeeni vari aya vooloka olipiha waamini wahu?

³ Niireke itthu anihimya aya atthu awo oosomexa pooti ohonona waamini wahu wira Yehova tori Mpattuxa? Eyo enlipa ni moota nnaakhula ahu makoho ala: ‘Etthu xeeni ennikupaliha wira Yehova tori Mpattuxa? Niireke mwaha woowi ookhala mutthu onileelale wala nroosoma noona itthu sinooniherya wira Yehova tori Mpattuxa?’ (1 aKor. 3:12-15) Hata ovinre ene okathi munceene nri ene Anamoona a Yehova, otheene ahu nihaana olipiha waamini wahu. Akhala wira nnoopaka eyo, khaninrowa owokiwa ni “moolumo oowoototha ni miyuupuwelo seethiru” sinivirikanya Nuulumo na Muluku. (aKol. 2:8; aHeeb. 11:6) Wira nincererye waamini wahu wira itthu siroopattuxiwa, mwaha ola ninrowa othokorerya itthu tthaaru: (1) Nthowa naya atthu anceene ahinikupali aya wira ookhala Mpattuxa, (2) moota wowuncererya omwaamini wanyu Yehova yoowo ori Mpattuxa ni (3) moota woohihiya waamini wanyu woolipa.

4. Moovarihana ni aHeeberi 11:1, waamini exeeni?

⁴ Atthu akina, anoona wira okhalana waamini ontaphulela okupali khula etthu ahisuwelaka akhala wira ti yeekeekhai wala nnaari. Masi moovarihana ni Biibiliya iwo khahiyo waamini wekeekhai. (Mmusome aHeeberi 11:1.) Moone wira waamini ori okupali ikeekhai nihinwerya ahu woona ntoko Yehova, Yesu, Omwene wa wiirimu moovarihana ni itthu sinooniherya ni sinnikupaliha. (aHeeb. 11:3) Sientista bioquímico yoowo ori Namoona a Yehova, ohimmye so: “Itthu nnaamini ahu ti seekeekhai, iyo sinnivarihana ni siensia”.

5. Xeeni atthu anceene ahinikupali aya wira itthu siroopattuxiwa?

⁵ Woonasa wene, nyuwo munniikoha so: ‘Sookhala itthu sinceene sinooniherya wira ookhala Mpattuxa, nto xeeni atthu anceene ahinikupali aya wira Muluku topattunxe okumi?’ Okhala wira atthu akina, khanatokose itthu sinooniherya wira ookhala Mpattuxa. Mwa ntakiheryo, Robert yoowo olelo-va ori Namoona a Yehova, ohimmye so: “Okhala wira oxikola khoniixuttihiwa wira itthu siroopattuxiwa, nto miyo koona wira eyo ekeekhai. Okathi kaarina aka iyaakha 22, kaahivaanela ni Anamoona a Yehova. Nto kaahiixutta mBiibiliyani wira Muluku topattunxe itthu sotheene”. *—Nwehe ekaaxa eni: “ Muhupi Aniroiheliwa Anamuyari”.

6. Xeeni atthu akina ahinikupali aya wira ookhala Mpattuxa?

⁶ Atthu akina khanikupali wira okhala Mpattuxa, mwaha woowi awo anihimya wira anikupali paahi itthu anwerya aya oweha. Masi ohimya ekeekhai awo annikupali itthu sinceene ahinwerya aya oweha. Mwa ntakiheryo awo annikupali lei de gravidade, maana annisuwela wira  ekeekhai. Enamuna ya waamini enilavuliwa mBiibiliyani enivarihana ni itthu sinnikupaliha wira “ele ehinoona ahu, yookhala tthiri”. (aHeeb. 11:1) Onitthuneya okathi ni wiimananiha osoma itthu iyo sinooniherya, etthu yeeyo atthu anceene ahiniphavela aya. Mutthu ohintokosa wira ookhala Mpattuxa, pooti wuupuwelaka wira Muluku khokhanle.

7. Niireke atthu otheene oosomexa khanikupali wira Muluku topattunxe olumwenku? Mutthokiherye.

⁷ Masientista makina, yaahisoma itthu sinooniherya wira ookhala Mpattuxa. Nto yaahikupali wira Muluku topattunxe olumwenku. * Ntoko Robert nimulavunle ahu wanipacerya, masientista makina yoona wira khokhanle Mpattuxa mwaha woowi khiyaatonko wiixuttihiwa wuniversidade. Hata vari siiso, masientista manceene aamusuwela ni annimphenta Yehova. Tthiri ntoko masientista  awo, otheene ahu nihaana olipiha omwaamini wahu Muluku hata nisomme ene vanceene wala vakhaani. Khuuvo mutthu okhanle oonipakela eyo.

8-9. (a) Nikoho xeeni ninrowa ahu waakhula? (b) Xeeni vaari aya vooloka osoma soopattuxiwa?

⁸ Munrowa wuncererya sai omwaamini wanyu Mpattuxa? Nrowe nithokorerye inamuna xexe.

⁹ Musomeke soopattuxiwa. Munoowerya wuncererya omwaamini wanyu Mpattuxa, nwehaka inama, miri ni itheneeri. (Esal. 19:1; Yes. 40:26) Vaavo munrowa anyu osomaka itthu iyo, munrowa otepaka okupali wira Yehova tori Mpattuxa. Iliivuru sahu, sinniruuha myaha sinitthokiherya inamuna soovirikana sa soopattuxiwa. Woonasa wene, nyuwo munuupuwela wira myaha iyo ti soovila wiiwexexa. Masi hata vari siiso, muhihiye wala otupha myaha iyo, muhaana osoma. Mwiira siiso, munimwiixutta itthu sinceene. Nave muhiliyale otthikela oweha iviidiyu sinilavula voohimya sa soopattuxiwa siri esaite ahu jw.org, seiyo saakumiheriwe akonkresu avinre iyaakha vakhaani!

10. Nvahe ntakiheryo na moota soopattuxiwa sinooniherya aya wira ookhala Mpattuxa. (aRoma 1:20)

¹⁰ Vaavo munisoma anyu soopattuxiwa, nweheke oratteene itthu soopattuxiwa iyo sinniixuttiha aya voohimya sa Mpattuxa ahu. (Mmusome aRoma 1:20.) Mwa ntakiheryo, nyuwo munnisuwela wira nsuwa ninnikumiherya oviha onnikhaliherya okhalana okumi valaponi-va. Hata vari siiso, nsuwa ninnikumiherya etthu eniihaniwa raios ultravioletas sikhanle oonikumiherya mixankiho. Nto hiyo apinaatamu nihaana okhapeleliwa mwaha wa raios ultravioletas. Tthiri hiyo ninnikhapeleliwa. Moota xeeni? Elapo yookhalana etthu ennikhapelela eniihaniwa gás ozônio, yeeyo ennikhapelela mwaha wa raios ultravioletas saarowa onikumiherya mixankiho. Niireke khamunikupali wira ookhala opanke etthu eyo? Nave owo toophenta ni Mpattuxa aankhili?

11. Munrowa ophwanya woowi myaha sinrowa wookhaliheryani wuncererya omwaamini wanyu Mpattuxa? (Nwehe ekaaxa eni: “ Itthu Sinrowa Wookhaliheryani Wuncererya Waamini Wanyu”.)

¹¹ Mwaaphavelaka itthu sikina sinrowa wookhaliheryani wuncererya omwaamini wanyu Mpattuxa, munwehe Índice da Publicações da Torre de Vigia ni esaiti ahu jw.org. Nyuwo pooti oweha myaha ni iviidiyu sirina muru oni: “Niireke Eroopattuxiwa?”. Iviidiyu ni myaha iyo saamukhaani sinnooniherya itthu sootikiniha sa inama ni soopattuxiwa sikina. Nave sinnooniherya moota masientista anitakiha aya soopattuxiwa wira apake ele aniphavela aya.

12. Vaavo nimmusoma ahu Biibiliya, itthu xeeni ninreerela ahu ovaha ephoole?

¹² Mmusomeke Biibiliya. Sientista bioquímico nimulavunle ahu wanipacerya, khaakupali wira ookhala Mpattuxa. Masi nuuvira okathi, owo aahikupali wira ookhala Mpattuxa. Owo onihimya so: “Waamini waka khonlipa paahi ni itthu kinsuwela aka sa siensia. Masi-tho, onlipa ni itthu kisomme aka ni kitokonse aka mBiibiliyani”. Woonasa wene, nyuwo munnisuwela itthu Biibiliya oniixuttiha awe. Hata vari siiso, wira muncererye omwaamini wanyu Mpattuxa, nyuwo muhaana ohihiya osoma Nuulumo na Muluku. (Yox. 1:8; Esal. 119:97) Nwehe moota Biibiliya onitthokiherya awe oratteene sowiiraneya sa mulaponi. Nave nvaheke ephoole iprofesia sa mBiibiliyani ni moota Biibiliya otheene onivarihana awe. Akhala wira munoopaka eyo, nyuwo munoolipiha waamini wanyu wira ookhala Mpattuxa a ankhili, oophenta ni omukumihenrye Biibiliya. *—2 Tim. 3:14; 2 Ped. 1:21.

13. Nvahe ntakiheryo na moota miruku sa mBiibiliyani sinnikhaliherya aya vanceene.

¹³ Vaavo munimusoma anyu Biibiliya, nweheke moota miruku onnivaha awe sinnikhaliherya aya. Mwa ntakiheryo, iyaakha sinceene sivinre  Biibiliya aahinilopola wira ophenta musurukhu onnikumiherya itthu soohiloka ni onnikumiherya “maxakha manceene”. (1 Tim. 6:9, 10; Mir. 28:20; Math. 6:24) Niireke nlopolo nno ninnivareleya muteko olelo-va? Eliivuru A Epidemia do Narcisismo, enihimya so: “Okhala wene, atthu oowaasivela mihakhu khanihakalala ni anniriipiwa murima”. Akhala wira mutthu onniphavela okhalana musurukhu munceene, owo onnikhalana mixankiho sinceene sa mmuupuweloni ni sa weerutthuni. Tthiri nlopolo na mBiibiliyani noowi nihiphenteke musurukhu, ninninikhaliherya vanceene! Niireke munnuupuwela malakiheryo makina a mBiibiliyani yookhalihenryeni vanceene? Vaavo nnuupuwela ahu miruku sooloka siri mBiibiliyani, ninniweha wira Mpattuxa ahu oophenta onnisuwela oratteene itthu sinniphwanyiha mireerelo. Nto eyo enoonikhaliherya okathi wotheene ororomela malakiheryo awe. (Yak. 1:5) Vaavo nimpaka eyo ninnihakalala vanceene.—Yes. 48:17, 18.

14. Omusoma Biibiliya, onrowa owiixuttihani exeeni voohimya sa Yehova?

¹⁴ Mmusomeke Biibiliya wira mmusuwele oratteene Yehova. (Yoh. 17:3) Vaavo munrowa anyu omusomaka Biibiliya, nyuwo munoosuwela omutthu ni mikhalelo sa Yehova. Nto iyo mikhalelo seiyo mwiixuntte anyu okathi mwaasoma anyu soopattuxiwa. Mikhalelo iyo, sinimookhaliheryani woona wira Yehova mutthu eekeekhai, khahiyo etthu yowoothereriwa paahi. (Okhum. 34:6, 7; Esal. 145:8, 9) Vaavo munrowa anyu omusuwelaka Yehova oratteene, waamini wanyu onimuncerereya, omphenta wanyu onimuncererya ni ompatthani ni yena onoolipa vanceene.

15. Xeeni vari aya vooloka waaleela atthu akina omwaamini wanyu Muluku?

¹⁵ Mwaaleeleke atthu akina omwaamini wanyu Muluku. Opaka eyo, enimookhaliheryani olipiha waamini wanyu. Masi etthu xeeni mukhanle anyu oopaka akhala wira mutthu onihimya wira onnaanyiherya akhala wira Muluku ookhala wala nnaari ni nyuwo khamunsuwela moota womwaakhula? Mwiimananiheke waavya yoolepa ya mBiibiliyani enaakhula nikoho nno ni moota etthokiheriwa aya muliivuruni mwahu, nuumala-vo mmuleeleke mutthu owo. (1 Ped. 3:15) Nave nyuwo pooti onvekela namalaleerya mukina wira ookhaliheryeni waakhula nikoho nno. Hata mutthu owo ohirowaka weemererya ele Biibiliya onihimya awe, nyuwo munoottottela mureerelo ele mutokonse anyu. Maana sinimookhaliheryani olipiha waamini wanyu. Mwiira siiso, nyuwo khamunrowa owokiwa ni sowiixuttiha sowoothiwa sa atthu ale oosomexa yaawo anihimya wira khokhanle Mpattuxa.

16. Etthu xeeni enrowa wiiraneya akhala wira nnoohiya waamini wahu?

¹⁶ Hata nivirinhe ene okathi munceene nimurumeelaka Yehova, nihaana ohihiya olipiha waamini wahu. Mwaha wa xeeni? Mwaha woowi akhala wira khanniivaha ephoole, waamini wahu pooti ovukuwa. Muhiliyale wira waamini onihela muhina okupali ikeekhai sihinooneya. Nto vannikhweya oliyala itthu nihinwerya ahu woona. Eyo ti etthu yaamwiirinhe Paulo ohimya wira ohikhalana waamini “etampi enaakuva onihopha”. (aHeeb. 12:1) Nihaana opaka exeeni wira nihimorele muraakho owo?—2 aTes. 1:3.

17. Etthu xeeni enrowa onikhaliherya olipiha waamini wahu?

¹⁷ Yoopacerya, okathi wotheene mmuxontteleke Yehova wira oovaheeni munepa awe woowaarya. Mwaha wa xeeni? Mwaha woowi waamini oniirela mpantta mikhalelo sinikumiheriwa ni munepa woowaarya. (aGal. 5:22, 23) Nto nihikhaliheriwaka ni munepa woowaarya, khaninrowa owerya olipiha omwaamini wahu Mpattuxa. Musuweleke wira akhala wira nnonvekela Yehova munepa awe woowaarya, owo onoonivaha. (Luka 11:13) Okathi mukina hiyo pooti ovekela mooluluwanya nihimyaka wira: “Muncererye waamini wahu”.—Luka 17:5.

18. Moovarihana ni Esalimo 1:2, 3, eparakha xeeni olelo-va nirina ahu?

 ¹⁸ Ya nenli, okathi wotheene musomeke Nuulumo na Muluku. (Musome Esalimo 1:2, 3.) Okathi yaalempwale aya esaalimo ela, aIsarayeli vakhaani paahi ti yaarina ikoopiya sa Nlamulo na Muluku. Masi mamwene ni makhulupale aanamukuttho yaanikhalana ikoopiya sa Nlamulo. Nto khula iyaakha 7, “alopwana n’athiyana n’anamwane” ni anamurwa yaawo yaakhala wIsarayeli yaahaana othukumana wira yiiwe osommwa wa Nlamulo na Muluku. (Otum. 31:10-12) Nave mahiku a Yesu, atthu vakhaani paahi ti yaarina iroolu sa Soolempwa. Iroolu sinceene saapwehiwa musinagoga. Masi olelo-va, atthu anceene aakhalana Biibiliya oomalela wala oohimalela. Tthiri eyo eparakha yuulupale. Ninrowa wooniherya sai wira ninnixukhurela okhalana Biibiliya?

19. Nihaana opaka exeeni wira nilipihe waamini wahu?

¹⁹ Nnimooniherya wira ninnixukhurela eparakha ya okhalana Biibiliya nimusomaka khula nihiku. Nto nihaana opaka eprokrama ahu ya omusoma Biibiliya ohiya omusoma vaavo nnoona ahu wira nookhalana okathi. Musuweleke wira omusoma Biibiliya khula nihiku, onoonikhaliherya oolipiha waamini wahu.

20. Otheene ahu, nihaana opaka exeeni?

²⁰ Moovirikana ni “atthu oosuwela ni a miruku” a olumwenku ola, yaawo ahinimukupali Biibiliya waamini wahu onivarihana ni itthu seekeekhai siri mBiibiliyani. (Math. 11:25, 26) Nto Biibiliya onninikhaliherya osuwela nthowa naya moolumwenkuni sihireere aya mixankiho ni moota Yehova onrowa awe omaliha mixankiho sotheene. Nto mwiimananiheke olipiha waamini wanyu ni mwaakhaliheryeke atthu anceene olipiha omwaamini waya Mpattuxa ahu. (1 Tim. 2:3, 4) Nave muhihiye olipelela nihiku atthu otheene valaponi anrowa aya olavulaka moolumo ari Wiisuupulula 4:11 yaawo ani: “Yehova, Muluku ahu oowerya, nyuwo munniphwanelela waakhela ovuwa . . . okhala wira moopattuxa itthu sotheene”.