“Anamoona a Yehova ale, khayaareerela murima atthuru paahi, mene yannaareerela murima naalapweene. Nihuku tinno, Elaine eemenleene vakarinyani, ahaavaha alapwaaka ibiscoitu. Ovinyera nihukunene nenne, ikwaha sootheene naaviraahu vale, alapwaaka yaatthuna okela okarinyani weera ‘yavahiwe ibiscoitu.”’

“Meeri sannavira, alapwaaka sannaasivela ibiscoitu ni miyo waannakisivela otthekula woowaakuveya ni Anamoona a Yehova, mene miyo nkaatthuna opisa kitthekulaka ni yaawo”. Miyo keera kikhalanneene iyaakha 70, mene, nnamweera kaakhalanneene iyakha iya, miyo nkaasuwela soororomela sa Anamoona a Yehova. Mwaha wooweera miyo kaanyoonyiheya ni ikereja sintxipale, kaahiithanlela omusoma Biblya meekhaaka.

“Ehuhu ene yeele, miyo kannawoona Anamoona a Yehova yeemenleene ni ikarinya saya empari ekina ya ecidade, awosa-tho yaari ooreera murima”, ni ikwaha sootheene yaakhula makoho aka envarihelaka muteko Biblya. Eyo yaakeeriha waaroromela Anamoona Yehova.

“Nihuku nimoha Elaine aakikoha: ‘Nyuwo munnaroromela weera asinama yoovaha ya Muluku?’ Miyo kaahaakhula: ‘Aani moohihovela!’ Avinyaka Elaine aamusoma Yesaya 11:6-9 saari soolepa sene seiya saakeerihe otthuna omuxuttera vantxiple Biblya. Mene, keera kihitthunaka nlelo waakhela ibuukhu sa Anamoona Yehova.

“Ovinyera vaavale, miyo wannakisivela otthekula ni Elaine wamoha naiyawe Brent woohima sa Biblya”. Ntheli nne, naakooperera weera kimusome Biblya ovinyera ebuukhu ya Matheyo mpaka ebuukhu ya Miteko sa arummwa weera kisuwele ontaphulela eheeni okhala mukristu eekhaikhai. Miyo kaahaakhulela opaka etthu ele ntheli nne naahimmaaya. Woohipisa kaapatxera omusoma Biblya ni Brent ni Elaine. Eyo yeereya eyaakha ya 2016.

“Miyo yannakisivela yoosomaaka ya Biblya ni orowela mithukumano isemana sootheene. Miyo wannakisivela vantxipale oxuttera ele Biblya onxuttihaawe. Evirakaru eyaakha emoha, miyo kaapatiziwa. Olelo va ni iyaakha 79, kinnahakalala vantxipale mwaha woophwanya ettiini yeekhaikhai. Yehova ookireeliha mwaha wooweerela empari emusi ya arumeyi awe oowiivaherera.”