Te hoê tere roa tei haamaitaihia

UA TAE mai te faataaraa a na tuahine e piti no te Repupirita demotaratia no Congo, ua faaoti hoi raua e rave i te hoê tere roa i te hoê vahi tei amaha i te tamaˈi no te apiti i te tairururaa mataeinaa “A faahanahana i te Atua” i Lisala. Hau atu i te haapiiraa pae varua e te amuimuiraa Kerisetiano ta raua i tiaturi e fanaˈo i te tairururaa, ua hinaaro ru raua e farerei i te mau tia o te amaa a te mau Ite no Iehova i Kinshasa. No te tamaˈi tivira i tera fenua, aita raua i ite i te hoê noa ˈˈe taata no te amaa e rave rahi matahiti i te maoro, e ua hinaaro raua e rave i tera taime maitai no te na reira.

Ua reva teie na tuahine e piti na nia i te vaa mai Basankusu te fenua i fanauhia ˈi raua, e tae atu i Lisala, te hoê tere fatata e 300 kilometera i te atea na roto i te uru raau e na roto e piti anavai. Ua naea e toru hebedoma no te rave i teie tere. I te mea e te tavini ra raua ma te taime taatoa, hoê e 3 matahiti e te tahi atu 19 matahiti, ua faaohipa raua i to raua tere no te haaparare i te parau apî maitai o te Basileia. Ua poro raua fatata 110 hora i te feia ta raua i farerei i roto i to raua tere, ma te vaiiho e 200 api parau iti e e 30 vea.

Na roto i te anavai, ua tere raua na ropu i te mau puaa pape e te mau moo pape o te ite-pinepine-hia i taua vahi ra. Aita raua i nehenehe e reva na roto i te anavai i te po—aita e tereraa i roto i te poiri! Ua farerei atoa raua e rave rahi vahi hiˈopoaraa a te faehau.

Noa ˈtu e e tere roa roa e te rohirohi, ua oaoa te mau tuahine i te tutavaraa. Ua î roa raua i te mauruuru e te oaoa i te taeraa i te tairururaa i Lisala. Ua î to raua aau i te anaanatae no te parau mau, e ua itoitohia raua i te amuiraa i na taeae e tuahine e 7 000 o tei tae mai. I muri aˈe i te tairururaa, ua faaruru raua i taua noa mau fifi ra no te hoˈi i ǒ raua, i reira to raua farereiraa i to raua utuafare ma te oraora maitai.