HAAPIIRAA 3
Ua tiaturi Rahaba ia Iehova
A feruri na e tei Ieriko tatou, te hoê oire i te fenua Kanaana. Aita to reira mau taata e tiaturi ra ia Iehova. O Rahaba te iˈoa o te tahi vahine no ǒ.
I to ˈna apîraa, ua faaroo Rahaba i te mau aamu no nia i tei tupu a vahi ai Mose i te miti Uteute e a aratai ai oia i to Iseraela i rapaeau ia Aiphiti. Ua ite atoa o ˈna mea nafea Iehova i tauturu atu ai ia upootia i nia i to ratou mau enemi. I teie nei, ua faaroo oia e te puhapa ra to Iseraela i te hoê vahi fatata ˈtu ia Ieriko!
Ua faatapuni Rahaba i na mânu no te mea ua tiaturi o ˈna ia Iehova
I te tahi po, e piti taata no Iseraela tei haere e hiˈo ia Ieriko ma te huna. E mânu ïa tera na taata. A tae atu ai raua i to Rahaba fare, ua titau manihini atu o ˈna ia tomo atu e ia faaea i reira. I te maororaa po, ua faaitehia i te arii o Ieriko e e taata tei haere mai e hiˈo ma te huna i te oire e tei roto hoi i te fare o Rahaba. Ua faaue atura te arii ia haru ia raua. Faatapuni aˈera Rahaba i na mânu e piti i nia i te tapoˈi o to ˈna fare e ua parau i te mau taata o te arii: ‘Ua haere mai nei tera nau taata i ǒ nei, ua faarue ê na râ i te oire. Ia tapapa atu outou i teie nei, e haru ïa outou ia raua!’ Ua ite anei oe no te aha Rahaba i faatapuni ai i na mânu?— No te mea ua tiaturi o ˈna ia Iehova e ua ite oia e e horoahia te fenua Kanaana i te mau Iseraela.
Hou na mânu e faarue ai i to Rahaba fare, ua parau atu raua e e ora mai o ˈna e to ˈna utuafare ia haamouhia Ieriko. Eaha ta raua i faaue ia ˈna ia rave?— Ua na ô raua: ‘A rave i teie taura uteute e a faatautau i te reira i te haamaramarama. Ia na reira oe, e ora mai te taata atoa i roto i to fare.’ Ua rave Rahaba mai tei parauhia ˈtu. Ua ite anei oe i tei tupu?—
Ua faaora Iehova ia Rahaba e to ˈna utuafare
Tau mahana i muri aˈe, ua haaati te mau Iseraela i te oire ma te mamû e ono mahana, hoê taime i te mahana. I te hitu râ o te mahana, e hitu ïa taime i te haaatiraa i te oire e i muri iho, ua tuô ratou. Parari aˈera te mau patu o te oire ia Iehova, te tia noa ra râ te fare i faatautauhia te taura uteute i te haamaramarama! Te ite ra anei oe i nia i te hohoˈa?— Ua ora mai Rahaba e to ˈna utuafare!
Eaha ta oe e haapii mai i te hiˈoraa o Rahaba?— Ua tiaturi Rahaba ia Iehova no te mea ua faaroo oia e rave rahi ohipa faahiahia ta ˈNa i faatupu. E nehenehe atoa oe e ite atu â i te mau mea faahiahia no nia ia Iehova. E tiaturi atoa anei oe ia ˈNa mai ia Rahaba?— Ua papu ia matou e e!
