Kafai e kilo atu koe ki se pulalakau ‵lanu valevale, te lagi telā e ‵fonu i fetū, io me se koga fakaofoofogia e ‵tafe ifo i ei a vai, e mata, e lavea ne koe a tugālima o te ‵tou Mafuaga? A mea katoa ne faite i ‵tou tafa e fakaasi mai ei a uiga sē lavea o te Atua. (Lom 1:20) Mai te mafau‵fau faka‵lei ki mea e lavea ne tatou ki ‵tou mata, e mafai o lavea i ei ne tatou a te malosi, alofa, poto, fai mea tonu, mo te loto kaimalie o te Atua.—Sal 104:24.

Ne a nisi galuega fakaofoofogia a Ieova e lavea faeloa ne koe i aso takitasi? Kafai foki e nofo koe i fakai ‵lasi, e mafai foki o lavea ne koe a manu eva io me ko lakau. A te kilokilo atu kae mafau‵fau ‵loto ki mea ne faite ne Ieova, e mafai o fesoasoani mai ke fakafeoloolo aka i ei ‵tou loto mafatia, ‵saga ki mea e tāua atu, kae fakalasi aka ‵tou fakatuanaki ki a Ieova me e mafai eiloa o tausi mai a ia ki a tatou ki te se-gata-mai. (Mat 6:25-32) Kafai e isi ne au tama‵liki, ke fesoasoani atu ki a latou ke lavea ne latou a uiga sē fakanafagina o Ieova. Mai te ati aka o te loto fakafetai ki mea ne faite i ‵tou tafa, ka fai i ei ke fakapili‵pili atu tatou ki te ‵tou Mafuaga.—Sal 8:3, 4.

ONOONO KI TE VITIO E FAKAASI MAI I MEA NE FAITE A TE ‵MALU O TE ATUA—MAINAGA MO ‵LANU, KAE TALI AKA A FESILI MAI LALO:

• Kaia e mafai ei ne tatou o lavea a vaegā ‵lanu kese‵kese?

• Kaia e ma‵fuli ei a ‵lanu o se mea māfai e kilo mai koe i feitu kese‵kese?

• Kaia e kese‵kese ei a ‵lanu o te lagi?

• Ne a ‵lanu fakaofoofogia o mea ne faite ne Ieova e lavea ne koe i tafa o tou fale?

• Kaia e ‵tau o onoono kae mafau‵fau faka‵lei tatou ki mea ne faite ne Ieova i te lalolagi?