TUSEMERIIRE kwoleka okusiima habw’ekisembo kinu ekirukukira byona. Yesu akooleka ngu kikuru kusiima obu yakirize abasaija 10 abaali barwaire oburwaire obwamaani obutarukukira. Omu ha basaija ikumi akagaruka “nakugiza, Ruhanga niraka likoto.” Yesu yagarukamu nagamba ati: “Ikumi tibasemeziibwege? baitu omwenda bali nkaha?” (Luka 17:12-17) Isomo ki erutukwega? Kyanguhire kwebwa ebintu ebirungi abandi ebi barukuba batukoliire.

Ekicunguro kisembo ky’embaganiza kandi nikyo kikyakizereyo ebindi byona. Hati, orayoleka ota ngu n’osiima ekicunguro?

• Manya ebirukukwata hali ogu ayakituhaire. Ekicunguro tikirukwija kuleetera abantu boona obwomeezi obutahwaho bataine ekibakozereho. Yesu obwakaba n’asaba akagamba: “Bunu nubwo bwomezi obutahwaho, okumanya iwe Ruhanga omu owamananu, nogu ouwatumire, Yesu Kristo.” (Yohana 17:3) Kakuba bakugambira ngu haroho omusaija ay’akirize obwomeezi bwawe obwokaba okyali muto, tiwakugondeze kumanya bingi ebirukukwata ha musaija onu n’ensonga habwaki y’akujunire? Yahwe Ruhanga ayatuhaire ekisembo ekirukucungura obwomeezi bwaitu, nagonza tutagarukira ha kumumanya kwonka baitu tumwirre  haihi. “Mui’re haihi Ruhanga, nauwe alibai’ra haihi.”​—Yakobo 4:8.

• Ikiririza omu kicunguro. “Anyakuikiriza omwana, ayina obwomezi obutahwaho.” (Yohana 3:36) Kwoleka okwikiriza nikimanyisa ki? Nikimanyisa kukora ebikorwa ebirukwoleka ngu n’oikiririza omu kicunguro. (Yakobo 2:17) Bikorwa bya mulingo ki ebi tusemeriire kukora? Ekisembo kifooka kyawe obwogorra emikono okakiikiriza. Nahabweki, osemeriire kwikiriza ekicunguro. Omu mulingo ki? Osemeriire kumanya Ruhanga ebyarukukwetagisa kandi obikorreho. * Saba Ruhanga akuganyire kandi akuhe omuntu ow’omunda arukwera. Obworaaba nosaba yoleka ngu n’oikiririza omu kicunguro habwokuba nikiija kutusobozesa kutunga obusinge obutalihwaho, obulinzi hamu n’obwomeezi oburungi hali abo boona abarukukikiririzaamu.​—Abaheburaniya 11:1.

• Baho ha mukoro gw’okwijuka okufa kwa Yesu. Yesu akatandikaho omukoro ogurukutwijukya obukuru obw’ekicunguro ogubaho buli mwaka. Obwakaba natandikaho omukoro gunu, Yesu akagamba ati: “Nukwo mukolege muti okuijuka nyowe.” (Luka 22:19) Abakaiso ba Yahwe nibaija kwijuka okufa kwa Yesu Kyakabiri, Apuli 11, 2017, omu kairirizi. Omukoro gunu nigwija kumara esaaha emu, kandi nigwija kubamu n’orubazo orukusoborra habwaki okufa kwa Yesu kikuru n’omulingo tugasirwa omu kicunguro hati, n’omu busumi obw’omaiso. Omwaka oguhoire, abantu obukaikuru 20 nubo babaireho ha mukoro gunu. Nitukuraaliza kwija kuba naitwe obutaraaba nitwoleka okusiima ha bw’ekisembo Ruhanga yatuhaire.