KUTUKONYERA kumanya Masiya, Yahwe Ruhanga akaterekereza banabbi ba Baibuli baingi, kuhandiika h’akuzarwa, obuhereza hamu n’okufa kw’omujuni onu ayanihizibwe. Obunabbi bunu bwoona obwa Baibuli bukahikirizibwa omu Yesu Kristo. Bulimu ebintu bingi ebirukukwata hali Yesu kandi buhikiire. Kukyoleka kurungi, ka tucumitirize ha bunabbi  obumu obwarangire ebirukukwata ha kuzarwa kwa Masiya n’emyaka ey’obuto bwe.

Nabbi Isaya akaranga ngu Masiya yakubaire mwijukuru w’Omukama Daudi. (Isaya 9:7) Kandi mali Yesu akazarwa omu ruka’ra rwa Daudi.—Matayo 1:1, 6-17.

Mika, nabbi wa Ruhanga ondi akaranga ngu omwana onu yakubaire mulemi kandi ngu yakuzalirwe omu “Beterehemu  Efurata.” (Mika 5:2) Omu kasumi Yesu aka yazalirwemu hakaba haroho embuga z’emirundi ebiri ezayetwaga Beterehemu. Orubuga orumu rwali haihi na Nazalesi omu bukiizi bw’obumoso obw’ensi egyo, kandi orundi rwali haihi na Yerusalemu omu Yuda. Beterehemu ehereire Yerusalemu ira yayetwaga Efurata. Yesu akazalirwa omu rubuga orwo, nk’obunabbi nkoku bwarangire!—Matayo 2:1.

Obunabbi bwa Baibuli obundi bukoleka ngu Omwana wa Ruhanga akaba ali w’okwetwa “kuruga omu Misiri.” Omwana Yesu akatwarwa omu Misiri. Akagarurwa hanyuma y’okufa kwa Herode, omu mulingo ogwo obunabbi obu bwahikirizibwa.—Hoseya 11:1; Matayo 2:15.

Orusorongo rw’ebyahandiikirwe oruli “ Obunabbi Obukukwata Hali Masiya,” hansi y’omutwe “Obunabbi” haroho bingi ebyarangirwe hali Masiya. Nosabwa kubirengesaniza n’ebyahandiikirwe ebiri hansi y’omutwe “Okuhikirizibwa kwabwo.” Kukora ekyo nikiija kukukonyera kugumya okwikiririza kwawe omu Kigambo kya Ruhanga eky’amananu.

Nocumitiriza ha byahandiikirwe binu, okijuke ngu obunabbi bunu bukahandiikwa myaka bikumi n’ebikumi Yesu atakazairwe. Yesu akagamba: “Kisemerire byona okuhiki’ra, ebyampandikirweho omubiragiro bya Musa, n’omu bunabbi, n’omu Zabuli.” (Luka 24:44) Nkoku osobora kukigumya omu Baibuli yawe, mali bikahikirizibwa omu bwijwire!